ក្រុងកំពង់សោម៖លោក នួន ប៊ុនថុល អភិបាលក្រុងអភិបាលក្រុងកំពង់សោមនៅវេលាម៉ោង ១៦និង៣០នាទីថ្ងៃទី០២ ខែមិថុនា ឆ្នាំ២០២៦បានដឹកនាំគណៈបញ្ជាការឯកភាពរដ្ឋបាលក្រុងកំពង់សោម និងមានការសម្រលសម្រួលនីតិវិធីពីលោក កង ធីរ៉េម ព្រះរាជអាជ្ញារង នៃអយ្យការអមសាលាដំបូងខេត្តព្រះសីហនុ កម្លាំងសមត្ថកិច្ចចម្រុះ ចុះត្រួតពិនិត្យរដ្ឋបាលនៅផ្ទះវីឡាជួលមួយកន្លែង ម្តុំស្ពានត្រជាក់ចិត្ត ស្ថិតក្នុងភូមិគគីរ សង្កាត់បិតត្រាំង ក្រុងកំពង់សោម ខេត្តព្រះសីហនុ ។
ជាលទ្ធផល សមត្ថកិច្ចរកឃើញជនបរទេសសរុប ២៦នាក់ ស្រី ៣នាក់ រួមមាន ជនជាតិចិន ៣នាក់ និងជនជាតិវៀតណាម ២៣នាក់ មិនមានលិខិតឆ្លងដែនជាប់ខ្លួន ។ក្រោយការត្រួតពិនិត្យឧបករណ៍អេឡិចត្រូនិច បានរកឃើញថា មានពាក់ព័ន្ធនឹងករណីឆបោកតាមប្រព័ន្ធបច្ចេកវិទ្យា (Online Scams) ។ដកហូតសម្ភារៈ រួមមាន ៖ កុំព្យូទ័រយួរដៃ ១១គ្រឿង, ទូរស័ព្ទ ២០គ្រឿង, រថយន្ត ២គ្រឿង និងម៉ូតូ ១គ្រឿង ។
បច្ចុប្បន្ន ជនបរទេសទាំង ២៦នាក់ ត្រូវបាននាំមកស្នងការដ្ឋាននគរបាលខេត្តព្រះសីហនុ ដើម្បីសាកសួរ និងបន្តនីតិវិធី។ ចំណែកទីតាំងខាងលើ ដោយមានតំណាងម្ចាស់ទីតាំងឈ្មោះ ឌឹម គាំ ភេទស្រី ជនជាតិខ្មែរ អាយុ ៣៦ឆ្នាំ ត្រូវបានបិទសៀលជាបណ្តោះអាសន្ន ដើម្បីបន្តនិតីវិធីតាមផ្លូវច្បាប់៕នាគសមុទ្រ
