- ខេត្តកំពង់ធំ៖ ក្រសួងអធិការកិច្ច បានសម្រេចចាត់តាំងគណៈប្រតិភូជំនាញឱ្យចុះបំពេញបេសកកម្មជាបន្តទៀតនៅខេត្តកំពង់ធំ ដើម្បីប្រមូលព័ត៌មាន បំភ្លឺ និងស្រាវជ្រាវបន្ថែមជុំវិញករណីបណ្តឹងតវ៉ាដ៏ចម្រូងចម្រាសមួយ ដែលពាក់ព័ន្ធនឹងការចោទប្រកាន់លើមន្ត្រីបសុព្យាបាលខេត្តថាបានអនុវត្តតួនាទីមិនប្រក្រតី លើអាជីវកម្មពិឃាតសត្វគោ និងក្របី។
យោងតាមលិខិតផ្លូវការចុះថ្ងៃទី០៥ ខែមិថុនា ឆ្នាំ២០២៦ ផ្ញើជូន ឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ ដោយប្រធានគណៈប្រតិភូស្ទង់ស្រាវជ្រាវ លោក ស៊ីម ស៊ុយង បានឱ្យដឹងថា បេសកកម្មនេះធ្វើឡើងដើម្បីឆ្លើយតបទៅនឹងដីកាបង្គាប់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា (ដីកាលេខ ២១៣០ ខន/០២៦ ចុះថ្ងៃទី១២ ខែមករា ឆ្នាំ២០២៦) ដែលបានណែនាំឱ្យក្រសួងអធិការកិច្ចពិនិត្យ និងស្រាវជ្រាវលើករណីនេះ។
ដើមចមនៃទំនាស់ និងការចោទប្រកាន់
សេចក្តីរាយការណ៍នៅក្នុងឯកសារបានបញ្ជាក់ថា កន្លងមកឈ្មោះ សុង សារុណ តំណាងឱ្យអាជីវករពិឃាតសត្វគោ និងក្របី នៅស្រុកបារាយណ៍ ខេត្តកំពង់ធំ បានដាក់ពាក្យបណ្តឹងតវ៉ាមកក្រសួងអធិការកិច្ច។ បណ្តឹងនោះបានចោទប្រកាន់លើ លោក ចាន់ បញ្ញាវ័ន្ត ប្រធានការិយាល័យផលិតកម្មនិងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ ព្រមទាំងបុគ្គលមួយចំនួនទៀត រួមមាន ឈ្មោះ ខៀវ កានីត, ឈ្មោះ យ៉េន ផានី និងឈ្មោះ ដេង សុខ លីន ថាបានអនុវត្តតួនាទីមានភាពមិនប្រក្រតី ពាក់ព័ន្ធនឹងការធ្វើអាជីវកម្មពិឃាតសត្វគោ ក្របី នៅក្នុងស្រុកបារាយណ៍ និងក្រុងស្ទឹងសែន។
មុននឹងឈានដល់ការចុះបំពេញការងារលើកនេះ គណៈប្រតិភូក្រសួងអធិការកិច្ចបានចុះធ្វើការស្រាវជ្រាវបឋម ដោយបានស្តាប់ការបំភ្លឺពីដើមបណ្តឹង ចុងបណ្តឹង សាក្សី និងបានជួបប្រជុំជាមួយមន្ត្រីជំនាញ ក៏ដូចជាអាជ្ញាធរពាក់ព័ន្ធរួចរាល់ហើយ ព្រមទាំងបានធ្វើរបាយការណ៍ជូនរដ្ឋមន្ត្រីក្រសួងអធិការកិច្ចផងដែរ។ ទោះជាយ៉ាងណា ដើម្បីមានមូលដ្ឋានកាន់តែច្បាស់លាស់ និងគ្រប់គ្រាន់សម្រាប់រាយការណ៍ថ្វាយសេចក្តីសម្រេចដ៏ខ្ពង់ខ្ពស់ពី សម្តេចធិបតី នាយករដ្ឋមន្ត្រី ក្រសួងបានសម្រេចបញ្ជូនក្រុមការងារចុះទៅបន្តនីតិវិធីជួបប្រមូលសក្ខីកម្មបន្ថែម។
កម្មវិធីការងារលម្អិតរបស់គណៈប្រតិភូ (ចាប់ពីថ្ងៃទី០៨ ដល់ថ្ងៃទី១២ ខែមិថុនា ឆ្នាំ២០២៦)
យោងតាមតារាងកម្មវិធីការងារដែលរៀបចំដោយ លោក ចាន់ ប៊ុនដា គណៈប្រតិភូបានបែងចែកជាពីរក្រុមដើម្បីចុះជួបភាគីពាក់ព័ន្ធតាមកាលវិភាគដូចខាងក្រោម៖
ថ្ងៃចន្ទ ទី០៨ ខែមិថុនា ឆ្នាំ២០២៦ (ម៉ោង ១៤:០០)៖ គណៈប្រតិភូជារួមធ្វើដំណើរចេញពីក្រសួងអធិការកិច្ច ឆ្ពោះទៅកាន់ខេត្តកំពង់ធំ។
ថ្ងៃអង្គារ ទី០៩ ខែមិថុនា ឆ្នាំ២០២៦ (ម៉ោង ០៨:៣០ និង ម៉ោង ១៤:០០)៖
ក្រុមទី១៖ ចុះជួបជាមួយលោកចៅសង្កាត់ព្រៃតាហ៊ូ (នៅសាលាសង្កាត់ព្រៃតាហ៊ូ) នៅពេលព្រឹក និងជួបជាមួយ លោក លីម សុខគាំង នៅមន្ទីរអធិការកិច្ចនាពេលរសៀល។
ក្រុមទី២៖ ចុះជួបជាមួយលោកមេភូមិព្រៃតាហ៊ូ នៅពេលព្រឹក និងជួបជាមួយ លោក អ៊ុម ពិសិដ្ឋ នៅមន្ទីរអធិការកិច្ចនាពេលរសៀល។
ថ្ងៃពុធ ទី១០ ខែមិថុនា ឆ្នាំ២០២៦៖
ម៉ោង ០៨:៣០៖ គណៈប្រតិភូជារួម ចុះជួបជាមួយ លោក ស៊ូ ចន្នី នៅមន្ទីរសេដ្ឋកិច្ចនិងហិរញ្ញវត្ថុខេត្ត។
ម៉ោង ១៤:០០៖ ជួបពិភាក្សាជាមួយលោកអភិបាលក្រុងស្ទឹងសែន និងចុះពិនិត្យទីតាំងសត្វឃាតដ្ឋានក្រុងស្ទឹងសែនផ្ទាល់។
ថ្ងៃព្រហស្បតិ៍ ទី១១ ខែមិថុនា ឆ្នាំ២០២៦ (ម៉ោង ០៨:៣០)៖ គណៈប្រតិភូជារួម បើកកិច្ចប្រជុំបូកសរុបលទ្ធផលនៃការចុះអង្កេតស្រាវជ្រាវ នៅមន្ទីរអធិការកិច្ចខេត្ត។
ថ្ងៃសុក្រ ទី១២ ខែមិថុនា ឆ្នាំ២០២៦ (ម៉ោង ០៨:៣០)៖ គណៈប្រតិភូជារួម រៀបចំរបាយការណ៍លទ្ធផល ដើម្បីគោរពជូនរដ្ឋមន្ត្រីក្រសួងអធិការកិច្ច។
ការស្នើសុំកិច្ចសហការពីអាជ្ញាធរខេត្ត
ដើម្បីឱ្យបេសកកម្មរយៈពេលប្រាំថ្ងៃនេះប្រព្រឹត្តទៅដោយរលូន និងទទួលបានលទ្ធផលផ្លែផ្កា ប្រធានគណៈប្រតិភូ លោក ស៊ីម ស៊ុយង បានស្នើសុំយ៉ាងទទូចដល់ ឯកឧត្តម នួន ផារ័ត្ន អភិបាលខេត្តកំពង់ធំ មេត្តាជួយសម្របសម្រួល និងចាត់ចែងឱ្យអាជ្ញាធរភូមិ សង្កាត់ និងមន្ត្រីជំនាញពាក់ព័ន្ធទាំងអស់ ចូលរួមសហការផ្តល់ការបំភ្លឺ និងព័ត៌មាននានាជូនដល់គណៈប្រតិភូតាមការគួរ។
សាធារណជនកំពុងរង់ចាំមើលលទ្ធផលនៃការស៊ើបអង្កេតនេះ ដែលនឹងត្រូវធ្វើឡើងដោយតម្លាភាព ដើម្បីរកយុត្តិធម៌ជូនភាគីជម្លោះ ក៏ដូចជាពង្រឹងប្រសិទ្ធភាពការងាររបស់មន្ត្រីរាជការនៅថ្នាក់ក្រោមជាតិ ស្របតាមអភិក្រមរបស់រាជរដ្ឋាភិបាលអាណត្តិថ្មី៕
អត្ថបទដោយ៖ ប៊ុន រដ្ឋា
