សៀមរាប: ខណៈអាជ្ញាធរខេត្តណែនាំដល់អាជ្ញាធរមូលដ្ឋាន និងមន្ត្រីពាក់ព័ន្ធពន្លឿនការដោះស្រាយបន្ទាន់
រយៈពេល ៥ថ្ងៃ គិតចាប់ពីថ្ងៃទី២៤ ដល់ទី២៩ ខែកញ្ញា ឆ្នាំ២០២៦ លំនៅឋានរបស់បងប្អូនប្រជាពលរដ្ឋចំនួនប្រមាណ ១២ ០០០ខ្នង នៅតាមបណ្ដាក្រុងស្រុកទាំង១៣ នៃខេត្តសៀមរាប បានរងផលប៉ះពាល់ដោយសារជំនន់ទឹក
ភ្លៀង មានគ្រួសាររងផលប៉ះពាល់សរុបចំនួន១៥ពាន់៤៧២គ្រួសារ ខណៈ ១ពាន់៣១០គ្រួសារត្រូវបានជម្លៀសទៅកាន់ទីទួលសុវត្ថិភាព ។ ដើម្បីជាការឆ្លើយតបបន្ទាន់ នៅរសៀលថ្ងៃទី២៩ ខែកញ្ញា ឆ្នាំ២០២៦ លោក អ៊ឹង គឹមលាង អភិបាលរងខេត្ត និងជាប្រធានលេខាធិការដ្ឋាននៃគណៈកម្មាធិការគ្រប់គ្រងគ្រោះមហន្តរាយ ខេត្តសៀមរាប បានដឹកនាំមន្ទីរអង្គភាព និងមន្ត្រីពាក់ព័ន្ធ ចុះពិនិត្យស្ថានភាពផលប៉ះពាល់ដោយសារជំនន់ទឹកភ្លៀង នៅក្នុងភូមិសាស្ត្រស្រុកពួក ស្រុកអង្គរជុំ និងភូមិសាស្ត្រស្រុកស្រីស្នំ។ ក្នុងឱកាសនោះ លោកបានណែនាំឲ្យអាជ្ញាធរមូលដ្ឋានដាក់គ្រឿងចក្រស្ដារបើកមុខទឹកដែលជន់លិច បង្កផលប៉ះពាល់ និងដើម្បីរំដោះមុខទឹកប្រឡាយឃុំត្រីញ័រ ស្រុកពួក និងរំដោះទឹកមុខសាលាបឋមសិក្សាធ្វាស, កាយបើកមុខទឹកដាក់លូរំដោះទឹកឆ្លងផ្លូវឃុំត្រាំសសរ ស្រុកស្រីស្នំ និងបានណែនាំដល់អាជ្ញាធរស្រុកអង្គរជុំ ឲ្យត្រូវលើកផែនការស្ដារប្រឡាយ និងរំដោះទឹក កុំឲ្យជន់លិចនៅឆ្នាំបន្ទាប់។ ក្នុងឱកាសនោះ លោកអភិបាលរងខេត្ត ក៏បានជម្រុញដល់អាជ្ញាធរ និងមន្ត្រីជំនាញ បន្តតាមដានដោយយកចិត្តទុកដាក់ចំពោះសុខទុក្ខប្រជាពលរដ្ឋ ជាពិសេសលំនៅឋានដែលបានរងការជនលិច។ ក្នុងអាជ្ញាធរ ត្រូវសហការជាមួយមន្ត្រីជំនាញ ពិនិត្យជាក់ស្ដែងលើផលប៉ះពាល់ចំពោះដំណាំគ្រប់ប្រភេទ និងហេដ្ឋារចនាសម្ព័ន្ធ ដែលត្រូវបានរងផលប៉ះពាល់ ជំរុញធ្វើយ៉ាងណាដោះស្រាយឱ្យបានទាន់ពេលវេលា និងល្អប្រសើរ។
សូមជម្រាបថា ក្រៅពីលំនៅឋានប្រជាពលរដ្ឋដែលរងផលប៉ះពាល់ ដោយសារជំនន់ទឹកភ្លៀង ក៏មានហេដ្ឋារចនាសម្ព័ន្ធ និងផ្នែកមួយចំនួនទៀត ក៏រងផលប៉ះពាល់ដូចគ្នា។ ក្នុងនោះប៉ះពាល់សាលារៀន ៦០កន្លែង, មន្ទីរពេទ្យ/មណ្ឌលសុខភាព ៩កន្លែង, អគាររដ្ឋបាល ៩កន្លែង, វត្ត/វិហារសាសនា ១៨កន្លែង។ ប៉ះពាល់ផ្លូវកៅស៊ូប្រវែង ១២ ៤០០ម៉ែត្រ និងខូចខាត ៥៩ម៉ែត្រ, ប៉ះពាល់ផ្លូវបេតុងប្រវែង ១១ ០១៥ម៉ែត្រ និងខូចខាតប្រវែង ១៥ម៉ែត្រ, ប៉ះពាល់ផ្លូវដីស/គ្រួសក្រហម ប្រវែង ២២៤ ៩៤៤ម៉ែត្រ និងខូចខាតប្រវែង ៤ ៥៤៥ម៉ែត្រ, ប៉ះពាល់ទំនប់ ១១ ៤៤០ម៉ែត្រ និងដាច់/ខូច ប្រវែង ១ ៩០០ម៉ែត្រ និងប៉ះពាល់ស្ពាន/លូកាត់ផ្លូវ ប្រវែង ១១២ម៉ែត្រ និងដាច់/ខូច ប្រវែង ១១២ម៉ែត្រ។ ដោយឡែកចំពោះវិស័យផលិត កម្មកសិកម្ម បានប៉ះពាល់លើស្រូវពង្រោះ ២៦ ៨៣៤ហិកតា, ដំណាំដំឡូងមី ៩០៧ហិកតា, ដំណាំពោត ១៣ហិកតា, ដំណាំរួមផ្សំ ៧៥ហិកតា, សត្វគោ/ក្របី ជម្លៀស ៨៦៨ក្បាល, សត្វជ្រូកជម្លៀស ១ ២២៣ក្បាល និងងាប់ ៨០ក្បាល និងសត្វមាន់/ទា ជម្លៀស ១ ០៦០ក្បាល និងងាប់ ២៤០ក្បាល៕
