កំពង់ចាម: ឯកឧត្តម អ៊ុន ចាន់ដា អភិបាលខេត្តកំពង់ចាម និងឯកឧត្តម ខ្លូត ផន ប្រធានក្រុមប្រឹក្សាខេត្ត នារសៀលថ្ងៃទី១៦ ខែតុលា ឆ្នាំ២០២៤នេះ បានអញ្ជើញប្រារព្ធពិធីសាសនាក្រុងពាលី សូត្រមន្ត បួងសួងសុំសេចក្តីសុខ ក្នុងពិធីប្រណាំងទូក បណ្តែតប្រទីប អុចកាំជ្រួច និងតាំងពិព័រណ៍សមិទ្ធផល រដ្ឋបាលខេត្ត, រដ្ឋបាលក្រុង-
ស្រុក ដេីម្បីអបអរសាទរបុណ្យចេញព្រះវស្សា នៅក្រុងកំពង់ចាម ។
គួរបញ្ជាក់ថា ដើម្បីថែរក្សាប្រពៃណី លើកស្ទួយវិស័យកីឡាអុំទូក និងបង្កបរិយាកាស សប្បាយរីករាយ ជូនបងប្អូនប្រជាពលរដ្ឋក្រោមម្លប់សុខសន្តិភាព រដ្ឋបាលខេត្តកំពង់ចាមនឹងរៀបចំពិធីប្រណាំងទូក ង ទូកខ្នាតអន្តរជាតិ នៅក្រុងកំពង់ចាម ក្នុងថ្ងៃបុណ្យចេញព្រះវស្សា រយះពេល ពេញ១ថ្ងៃ នៅវេទិកាអុំទូក ស្ថិតក្នុងភូមិជ្រោយថ្ម សង្កាត់បឹងកុក ក្រុងកំពង់ចាម ដែលនៅពេលរាត្រី មានការរៀបចំបណ្តែតប្រទីប និងអុចកាំជ្រួច។ ព្រមជាមួយការតាំងពិព័រណ៍សមិទ្ធផលរបស់ រដ្ឋបាលក្រុង-ស្រុក មន្ទីរ-អង្គភាពជុំវិញខេត្ត, ពិព័រណ៍ផលិតផលនានា និងការប្រគុំតន្ត្រីខ្នាតធំ មា នរយៈពេល៣ថ្ងៃ ចាប់ពីថ្ងៃទី១៦- ១៨ ខែតុលា ឆ្នាំ២០២៤នេះ ។
សូមជម្រាបថាសម្រាប់ទូកដែលបានដាក់ពាក្យសុំចូលប្រកួតមានចំនួន ៥៩ទូក មកពីក្រុង ស្រុកទាំង១០ ក្នុងខេត្តកំពង់ចាម ក្នុងនោះទូកអុំបុរសខ្នាតវែង ២១ទូក ស្មេីនឹង ១០គូ និងទូកខ្នាតអន្តរជាតិចំនួន ៣៨ទូក ស្មើនឹង ១៩គូ ចំពោះកម្លាំងកីឡាករគឺ មានចំនួនសរុប ២៣៩៦នាក់ និងកម្លាំងត្រៀម ៥៥៧នាក់ សរុបចំនួន ២៩៥៣នាក់ ចំពោះការប្រណាំងទូក ង និងទូកខ្នាតអន្តរជាតិ គឺមានចម្ងាយ ១៧០០ម៉ែត្រ ដែលចាប់ផ្តើមអុំរយៈពេល១ថ្ងៃពេញ គឺនៅថ្ងៃទី១៧ ខែតុលា ឆ្នាំ២០២៤ ដោយមានការប្រគល់រង្វាន់ជ័យលាភី លេខ១ លេខ២ និងលេខ៣ ដោយឡែកក្នុងនោះក៏មានស្តង់តាំងពិព័រណ៍ជាង ១០០ស្តង់ និងការប្រគំតន្ត្រីផងដែរ ៕
