(ខេត្តកំពង់ធំ)៖ នៅរសៀលថ្ងៃទី ២២ ខែមេសា ឆ្នាំ ២០២៥ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានដឹកនាំសហការីត្រួតពិនិត្យសកម្មភាពចាក់បេតុងស្ថាបនាផ្លូវថ្មី០១ខ្សែទៀត ដែលមានប្រវែង ៣០០ម៉ែត្រ ទទឹងទំហំ៥ ម៉ែត្រ និងកម្ពស់ ០,១៥ ម៉ែត្រ (១៥សង់ទីម៉ែត្រ) ដែលជាចំណងដៃរបស់
គណៈបញ្ជាការយោធាខេត្តដុងណាយ នៃកងទ័ពប្រជាជនវៀតណាម ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់សប្តស័ក ពស២៥៦៩នេះ។
ឧត្តមសេនីយ៍ទោ សោម ស៊ុន សូមថ្លែងអំណរគុណដ៏ជ្រាលជ្រៅជាទីបំផុតចំពោះគណៈបញ្ជាការយោធាខេត្តដុងណាយ នៃកងទ័ពប្រជាជនវៀតណាមដែលបានផ្តល់ថវិកាជួយស្ថាបនាផ្លូវបេតុង០១ខ្សែថ្មីទៀតនៅពេលនេះ។ ហើយកន្លងមកគណៈបញ្ជាការយោធាខេត្តដុងណាយ នៃកងទ័ពប្រជាជនវៀតណាម ក៏បានជួយសាងសង់អាគារសារប្រជុំ០១ខ្នង និងគ្រឿងបំពាក់ផ្សេងៗ ដែលមានតម្លៃជាទឹកប្រាក់ជាង ១៣ មុឺនដុល្លារ និងអាគារគិលានដ្ឋាន០១ខ្នងដែលមានតម្លៃជាទឹកប្រាក់ជាង៥ មុឺនដុល្លារួចមកហើយនាពេលកន្លងទៅនៅក្នុងទីបញ្ជាការតំបន់ប្រតិបត្តិការសឹករងកំពង់ធំផងដែរ។
ឧត្តមសេនីយ៍ទោ សោម ស៊ុន បានណែនាំដល់ក្រុមវិស្វកម្ម ដែលមានភារកិច្ចស្ថាបនាផ្លូវបេតុងថ្មីនេះ ធ្វើយ៉ាងណាការស្ថាបនាផ្លូវនេះឲ្យមានគុណភាព និងសោភ័ណភាពល្អ ដើម្បីបម្រើឲ្យការធ្វើដំណើរ និងការដឹកជញ្ជូនផ្សេងៗដែលជាសេចក្តីត្រូវការចាំបាច់របស់អង្គភាព។
