ខេត្តព្រះវិហារ៖ ការណែនាំរបស់ប្រធានមន្ទីរព័ត៌មានខេត្តព្រះវិហារ លោកស្រី ហែម សុគុណពិសី ដល់ថ្នាក់ដឹកនាំមន្ត្រីរាជការ និងមន្ត្រីកិច្ចសន្យាទាំងអស់នាពេលនោះ បានធ្វើឡើងក្នុងកិច្ចប្រជុំប្រចាំត្រីមាសទី២ និងលើកទិសដៅសកម្មភាពការងារបន្ត សម្រាប់ត្រីមាសទី៣ ឆ្នាំ២០២៥ នាថ្ងៃទី១០ ខែកក្កដា ឆ្នាំ២០២៥ នៅមន្ទីរព័ត៌មានខេត្តព្រះវិហារ។
ប្រធានមន្ទីរព័ត៌មានខេត្តព្រះវិហារ លោកស្រី ហែម សុគុណពិសី បានថ្លែង កោតសរសើរ និងវាយតម្លៃខ្ពស់ចំពោះថ្នាក់ដឹកនាំ មន្រ្តីរាជការ និងមន្ដ្រីកិច្ចសន្យាទាំងអស់ ដែលបានខិតខំប្រឹងប្រែងក្នុងការបំពេញការងារតាមជំនាញរបស់ខ្លួន ទាំងពេលកន្លងមក ក៏ដូចក្នុងពេលបច្ចុប្បន្ន ប្រកបដោយការយកចិត្តទុកដាក់ និងទទួលខុសត្រូវខ្ពស់ ដោយមិនគិតពីពេលវេលា ឬថ្ងៃឈប់សម្រាកនោះឡើយ។
ស្របពេលជាមួយគ្នានោះ លោកស្រី ហែម សុគុណពិសី បានផ្តល់ការណែនាំដល់មន្រ្តីក្រោមឱវាទទាំងអស់ ឱ្យបន្ដពង្រឹងរក្សាសាមគ្គីភាព ឯកភាពផ្ទៃក្នុង ធ្វើយ៉ាងណាត្រូវខិតខំប្រឹងប្រែង យកចិត្តទុកដាក់បំពេញ និងបង្កើនប្រសិទ្ធភាពការងាររបស់ខ្លួនបន្ថែមទៀត ដើម្បីលើកកម្ពស់ និងអភិវឌ្ឍវិស័យព័ត៌មានឱ្យកាន់តែរីកចម្រើន និងល្អប្រសើរជាងនេះថែមទៀត៕ដោយ៖ឡុង សំបូរ
