ស៊ីរីៈ ការបោះឆ្នោតប្រធានាធិបតីស៊ីរី បានចាប់បើកធ្វើកាលពីថ្ងៃអង្គារ នៅក្នុងពេលដែលសង្គ្រាមស៊ីវិលកំពុងតែឆាបឆេះឥតស្រាកស្រាន្ត ខណៈពលរដ្ឋស៊ីរីប្រមាណជា ១៥លាននាក់ ដែលមានសិទ្ធិចេញទៅបោះឆ្នោត។ នេះបើតាមវេបសាយបរទេសអាល់ហ្សាហ្សីរ៉ា កាលពីថ្ងៃអង្គារ។ នៅក្នុងការបោះឆ្នោតលើកទី១នេះ ក្នុងប្រទេសដែលកំពុងញាំញីដោយសង្គ្រាមស៊ីវិលជាង៣ឆ្នាំនោះ ការបោះឆ្នោតនឹងអាចប្រព្រឹត្តទៅបានតែនៅតាមតំបន់ ដែលស្ថិតក្រោមការគ្រប់គ្រងរបស់ទាហានរដ្ឋាភិបាលតែប៉ុណ្ណោះ ហើយក៏មិនអាចរៀបចំធ្វើ នៅតាមតំបន់ ដែលស្ថិតក្រោមការគ្រប់គ្រងរបស់ក្រុមឧទ្ទាមបាននោះទេ។
លើសពីនេះ គ្មានការចូលរួមពីក្រុមឧទ្ទាមនោះឡើយ ហើយគេរំពឹងរួចទៅហើយថា លោកបាស្ហា អាល់អាសាដ នឹងត្រូវជាប់ឆ្នោតជាប្រធានាធិបតីជាបន្តទៀត។ កាលពីថ្ងៃចន្ទ ក្រុមឧទ្ទាមបានបាញ់កាំភ្លើងត្បាល់ផ្លោងដាក់តំបន់មួយចំនួន ក៏ដូចជាបញ្ជាការដ្ឋានសន្តិសុខ និងបណ្តាលំនៅឋាននានា នៅជិត មហាវិទ្យាល័យ the Faculty of Art of the Damascus University បណ្តាលឲ្យខូចខាតផ្ទះសម្បែង និងមនុស្សរងរបួសជាច្រើន និងបានអំពាវនាវកុំឲ្យប្រជាពលរដ្ឋទៅបោះឆ្នោត។
គួរបញ្ជាក់ថា ការបោះឆ្នោតនៅថ្ងៃអង្គារនេះ គឺជាការបោះឆ្នោតប្រធានាធិបតីលើកដំបូងបង្អស់ នៅក្នុងប្រទេសស៊ីរី ក្នុងរយៈពេល ៥០ឆ្នាំកន្លងទៅនេះ ដែលអំណាចទាំងអស់ត្រូវបានត្រកូលរបស់លោកអាសាដជាអ្នកកាន់កាប់ តាំងពីឪពុក បន្តមកដល់កូន។ លោកបាស្ហា អាល់អាសាដ បានឡើងកាន់តំណែងជាប្រធានាធិបតីស៊ីរី កាលពីឆ្នាំ២០០០បន្តពីលោក ហាហ្វេស អាល់អាសាដ (Hafez al-Assad) ជាឪពុក។
កាលពីខែមីនា ឆ្នាំ២០១១ នៅក្នុងអំឡុងបដិវត្តន៍អារ៉ាប់ ប្រជាជនស៊ីរីបាននាំគ្នាចេញធ្វើបាតុកម្មទាមទារឲ្យមានការ ផ្លាស់ប្តូររបបនយោបាយ ក៏ប៉ុន្តែ ក្រោយពីទទួលរងនូវការបង្ក្រាបដោយហិង្សាពីសំណាក់រដ្ឋាភិបាល បាតុកម្មអហិង្សានេះក៏បានប្រែក្លាយទៅជាអំពើបះបោរប្រដាប់អាវុធ ហើយរាលដាលទៅជាសង្គ្រាមស៊ីវិល រហូតមកទល់នឹងពេលបច្ចុប្បន្ន៕
