ភ្នំពេញ ៖ កម្លាំងប៉ូលិសខណ្ឌសែនសុខ ប្រមាណជា ៣០នាក់ ដឹកនាំដោយ លោក ម៉ក់ ហុង អធិការនគរបាលខណ្ឌសែនសុខ កាលពីវេលាម៉ោង ១២ និង ១០នាទី យប់រំលងអាធ្រាត្រឈានចូលថ្ងៃទី១៩ កុម្ភៈ ២០១៤ បានបើកប្រតិបត្តិការបង្ក្រាបក្រុមប្រើប្រាស់ និងចែកចាយថ្នាំញៀន ស្ថិតក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ ដោយឃាត់ខ្លួនមនុស្សប្រុស ២នាក់ ស្រីម្នាក់ និងថ្នាំញៀនប្រភេទម៉ាទឹកកក ៤កញ្ចប់ ព្រមទាំងឧបករណ៍សម្រាប់ប្រើប្រាស់គ្រឿងញៀនមួយចំនួនទៀត។
ប្រតិបត្តិការចុះបង្ក្រាបគ្រឿងញៀនខាងលើនេះលោកអធិការ ម៉ក់ ហុង បានអោយដឹងដែរថាមុនឈានដល់ការឃាត់ខ្លួនអ្នកប្រើប្រាស់និងចែកចាយខាងលើនេះគឺ គាត់បានដាក់កម្លាំងល្បាតក្នុងភូមិត្រពាំងឈូកដែលជាចំណុចសំបូរទៅដោយអ្នកចែកចាយនិងប្រើប្រាស់ច្រើនស្ទើរាប់មិនអស់ទោះជាមានការបង្ក្រាបយ៉ាងណាក៏ដោយ ហើយចំពោះការឃាត់ខ្លួនជនសង្ស័យដែលប្រើប្រាស់គ្រឿងញៀនខាងលើនិងឆែក
រកឃើញគ្រឿងញៀនប្រភេទម៉ាទឹកកកចំនួន៤កញ្ចប់ ព្រមទាំងឧបករណ៍ប្រើប្រាស់មួយចំនួនទៀត។បច្ចុប្បន្នជនសង្ស័យខាលើត្រូវធ្វើការឃាត់ខ្លួននាំទៅអធិការដ្ឋាននគរបាលខណ្ឌសែនសុខ ដើម្បីកសាងសំណុំរឿងបញ្ជូនទៅតុលាការចាត់ការតាមច្បាប់៕ 
