កំពង់ចាម៖ នាថ្ងៃទី១៥ ខែសីហា ឆ្នាំ២០១៤ឯកឧត្តម លន់ លឹមថៃ អភិបាលខេត្តនិងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត និងជាប្រធានកិត្តិយសគណៈកម្មាធិការសាខាកាកបាទក្រហមខេត្តកំពង់ចាមបាននាំយកមកនូវអំណោយមនុស្សធម៌របស់កាកបាទក្រហមកម្ពុជា ចែកជូនគ្រួសាររងគ្រោះចំនួន៣៤៤គ្រួសារមកពីឃុំគគរ និងឃុំកោះរកា ស្រុកកំពង់សៀម ខេត្តកំពង់ចាម។
ពិធីនេះបានប្រព្រឹត្តទៅក្នុងបរិវេណវត្តទួលស្រែ ដោយមានការអញ្ជើញចូលរួមពីលោកវេជ្ជបណ្ឌិត សុខ ទ្បុង ប្រធាននាយកដ្ឋានសុខភាពនៃកាកបាទក្រហមកម្ពុជា ឯកឧត្ដមខ្លូត ផនប្រធានក្រុមប្រឹក្សាខេត្ត និងឯកឧត្ដមអភិបាលរងខេត្ត ព្រមទាំងថ្នាក់ដឹកនាំមន្ទីរអង្គភាព ស្ថាប័ននានា ជុំវិញខេត្ត អាជ្ញាធរស្រុក និងមន្ត្រីរាជការជាច្រើនរូបទៀត ។ លោក គឹម ឌី អភិបាលស្រុកកំពង់សៀម បានធ្វើរបាយការណ៍ពីស្ថានភាពទឹកជំនន់ក្នុងស្រុក ដោយបញ្ជាក់ថា៖ស្រុកកំពង់សៀមមាន ១៥ឃុំស្មើនឹង ១១១ភូមិ ក្នុងនោះឃុំដែលងាយរងគ្រោះ ដោយទឹកជំនន់មានចំនួន ១០ឃុំ ស្មើនឹង ៥៧ភូមិ ។
ទឹកជំនន់ឆ្នាំ២០១៤នេះ បានធ្វើឲ្យប៉ះពាល់ និងលិចភូមិចំនួន ៤០ភូមិ ដាច់ផ្លូវប្រវែង ៨៥មផ្លូវដីសប្រវែង ៦០.០៥០មផ្លូវបេតុងប្រវែង ៧១៩មលិចសាលារៀនចំនួន ២៣កន្លែង សាលាឃុំ និងប៉ុស្តិ៍រដ្ឋបាលឃុំចំនួន ១៥កន្លែង មណ្ឌលសុខភាពចំនួន ០៦កន្លែង វត្តចំនួន ២០វត្ត ស្លាប់មនុស្ស ៣នាក់ រុះរើផ្ទះ ដោយបាក់ច្រាំងចំនួន ២ខ្នង ប៉ះពាល់សន្ទូងចំនួន ៧៤ហ.ត ខូចទាំងស្រុងចំនួន ២៨ហ.ត និងដំណាំរួមផ្សំ២៤៨ហ.ត ខូចទាំងស្រុង និងបានជម្លៀសសត្វពាហៈនៈទៅកាន់ទីទួលសុវត្ថិភាពគោចំនួន ២.៤៤៨ក្បាល ក្របី ១២១ក្បាល ផងដែរ ។ថ្ងៃនេះប្រជាពលរដ្ឋចំនួន ៣៤៤គ្រួសារ ដែលបានជម្លៀសមកពីឃុំគគរ និងឃុំកោះរកា ទទួលបានការឧបត្ថម្ភស្បៀងអាហារពីកាកបាទក្រហមកម្ពុជា សម្រាប់សម្រួលបន្ទុកបានមួយគ្រា ។
បន្ទាប់ពីមតិសំណេះសំណាលរបស់លោកវេជ្ជបណ្ឌិត សុខ ទ្បុង រួចមក ឯកឧត្តម លន់ លឹមថៃបានពាំនាំនូវការសាកសួរសុខទុក្ខពីសំណាក់សម្តេចអគ្គមហាសេនាតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី-ហ៊ុន សែន ប្រធានកាកបាទក្រហមកម្ពុជា ដែលតែងតែគិតគូសុខទុក្ខ និងការលំបាក ចំពោះបងប្អូនប្រជាពលរដ្ឋទូទាំងប្រទេស និយាយរួម និងនិយាយដោយឡែក បងប្អូនប្រជាពលរដ្ឋដែលបាននិងកំពុងទទួលរងគ្រោះដោយសារទឹកជំនន់ នាពេលនេះ ។ 
ឯកឧត្តមលន់ លឹមថៃមានប្រសាសន៍ថា ប្រមុខរាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោហ៊ុន សែន ជានាយករដ្ឋមន្ត្រីនិងសម្ដេចកិតិព្រឹទ្ធបណ្ឌិតប៊ុន រ៉ានី ហ៊ុន សែនប្រធានកាកបាទក្រហមកម្ពុជាបានខិតខំគ្រប់លទ្ធភាព ដើម្បីកៀរគរធនធានគ្រប់បែបយ៉ាងដើម្បីជួយដោះស្រាយជីវភាពរស់នៅ និងថែរក្សាសុខភាពជូនដល់ប្រជាពលរដ្ឋនៅគ្រប់ទីកន្លែងដែលបានរងគ្រោះដោយគ្រោះទឹកជំនន់។ឯកឧត្តមបានបន្តទៀតថា រាជរដ្ឋាភិបាលកម្ពុជា បានសហការយ៉ាងជិតស្និទ្ធជាមួយនឹងកាកបាទក្រហមកម្ពុជា គណៈកម្មាធិការជាតិគ្រប់គ្រងគ្រោះមហន្តរាយ និងបណ្តាអង្គការជាតិនិងអន្តរជាតិនានា ក្នុងការជួយដោះស្រាយជំនួយមនុស្សធម៌ ដល់ប្រជាជនដែលរងគ្រោះដោយគ្រោះមហន្តរាយធម្មជាតិ ហើយរាជរដ្ឋាភិបាលក៏បានគិតគូដល់ការស្តារគម្រោងហេដ្ឋារចនាសម្ព័ន្ធនានា ដែលបានខូចខាតដោយគ្រោះទឹកជំនន់ ផងដែរ ។ ឯកឧត្ដមក៏បានសូមឲ្យមានការយោគយល់អធ្យាស្រ័យចំពោះ បងប្អូនដែលគ្រាន់តែមានទឹកលិចនៅខាងក្រោមផ្ទះគឺពុំបានទទួលនូវអំណោយនេះទេ ពោលគឺអំណោយទាំងអស់នេះសម្រាប់តែបងប្អូនទាំងពីរឃុំខាងលើ ដែលបានផ្លាស់ទីលំនៅមកស្នាក់នៅលើទួលស្រែ ចំនួនតែ៣៤៤គ្រួសារតែប៉ុណ្ណោះ ។
ឯកឧត្តមលន់ លឹមថៃក៏អំពាវនាវដល់មន្ទីរពាក់ព័ន្ធ ស្ថាប័នានា និងអាជ្ញាធរដែនដីត្រូវយកចិត្តទុកដាក់ខ្ពស់ជួយដោះស្រាយការលំបាកនានា ដែលបងប្អូនត្រូវបានជម្លៀសមករស់នៅលើទីទួលសុវត្ថិភាព និងណែនាំឲ្យប្រជាជនមានការប្រុងប្រយ័ត្នខ្ពស់ក្នុងការអនុវត្តអនាម័យ ជៀសវាងជំងឺរាករូស និងការពារប្រុងប្រយ័ត្នចំពោះកូនចៅ កុមារតូចៗ ចាស់ជរា ជនពិការ ដែលនាំឲ្យបាត់បង់អាយុជីវិតដោយសារតែការធ្វេសប្រហែស។
ដោយឡែក បងប្អូនទាំងអស់ ក៏ត្រូវចូលរួមចំណែកអនុវត្តនូវច្បាប់ចរាចរណ៍ នៅពេលបើកបរ ត្រូវពាក់មួក និងដាក់កញ្ចក់សុវត្ថិភាព ។ ក្នុងនោះក៏ត្រូវលុបបំបាត់ផងដែរ ចំពោះបញ្ហានេសាទត្រីដោយប្រើប្រាស់ឧបករណ៍ខុសច្បាប់ ។ មួយចំណែកទៀត បងប្អូន ក៏ត្រូវសហការជាមួយសមត្ថកិច្ចពាក់ព័ន្ធ ក្នុងការចូលរួមអនុវត្តគោលនយោបាយភូមិឃុំ មានសុវត្ថិភាព ផងដែរ ។ សូមបញ្ជាក់ថា អំណោយមនុស្សធម៌របស់កាកបាទក្រហមកម្ពុជាដែលបានចែកជូនប្រជាពលរដ្ឋទាំង ៣៤៤គ្រួសារ នាពេលនេះ ក្នុង ១គ្រួសារៗមាន ៖ អង្ករ ៣០គ.ក្រមី១កេសត្រីខ១០កំប៉ុង ភួយ ១ មុង១ សារ៉ុង១ និងក្រម៉ា១ផងដែរ ។ ដោយឡែក ឆ្លៀតឱកាសនោះដែរ ឯកឧត្តមលន់ លឹមថៃនិងប្រតិភូអមដំណើរ ក៏បាននាំយកបច្ច័យ និងអង្គរចំនួន ២បេ មី ២កេស និងត្រីខ ២យួរ ទៅប្រគេនព្រះសង្ឃ នៅវត្តទួលស្រែ ផងដែរ ៕
