ភ្នំពេញ ៖ បុរសម្នាក់បានមកប្ដឹងសមត្ថកិច្ចមូលដ្ឋានប៉ុស្ដិ៍នគរបាលផ្សារដើមគថាខ្លួនត្រូវគេលួចម៉ូតូបាត់ ខណៈដែលគាត់ជិះម៉ូតូឈប់បត់ជើងតូចនៅក្បែរផ្ទះរបស់គាត់ត្រូវជនឆ្លៀតឱកាសបន្លំលួចយកទៅបាត់តែម្ដងកាលពីវេលាម៉ោង១១និង១០នាទីយប់ស្ថិតនៅចំណុចផ្ទះលេខ៥៦A តាមបណ្ដោយផ្លូវ២០៦ ក្នុងសង្កាត់ផ្សារដើមគ ខណ្ឌទួលគោក។
យោងតាមការនិយាយរៀបរាប់ពីបុរសដែលបាត់ម៉ូតូមួយគ្រឿងម៉ាកស្កុបពី ពណ៌ ស មិនសូវចាំ ស្លាក់លេខ ខាងលើនេះបានអោយដឹងថា នៅមុនពេលកើតហេតុរូបគាត់ទើបតែត្រឡប់មកពីហូបអីជាមួយមិត្តភ័ក្តិនៅខាងក្រៅរៀងស្រវឹងបន្តិច ហើយនៅពេលដែលរូបគាត់ជិះម៉ូតូត្រឡប់មកផ្ទះវិញខណៈមកដល់មុខផ្ទះរបស់គាត់រួចគាត់ក៏ឈប់ម៉ូតូហើយបានដើរចេញពីម៉ូតូប្រហែលជា១០ម៉ែត្រទៅបត់ជើងតូចនៅក្បែរនោះស្រាប់តែពេលនោះមានជនសង្ស័យចំនួន២នាក់បានជិះម៉ូតូមួយគ្រឿងមិនស្គាល់ម៉ាកបានមកឈប់ក្បែរម៉ូតូគាត់ហើយក៏ឡើងជិះម៉ូតូគាត់គេចខ្លួនបាត់ភ្លាមៗតែម្ដង។
សមត្ថកិច្ចបានអោយដឹងថា បុរសខាងលើនេះគាត់ឈ្មោះ វុត្ថា អាយុ៤០ឆ្នាំស្នាក់នៅផ្ទះលេខ43C ក្នុងសង្កាត់ផ្សារដើមគ ខណ្ឌទួលគោក ហើយសមត្ថកិច្ចបានឱ្យដឹងទៀតថា ចំពោះករណីខាងលើនេះជាការធ្វេសប្រហែសរបស់ម្ចាស់ម៉ូតូដែលគាត់ទៅបត់ជើងតូចឆ្ងាយពីម៉ូតូខ្លួនឯងហើយទុកសោចោលជាប់នៅនិងម៉ូតូថែមទៀតធ្វើអោយជនឆ្លៀតឱកាសបន្លំលួចយកទៅបាត់តែម្ដង។
ទាក់ទិននិងករណីនេះបុរសខាងលើក៏ត្រូវបាននគរបាលប៉ុស្ដិ៍ផ្សារដើមគធ្វើការសាកសួរជំហានដំបូងសិនព្រោះថាគាត់និយាយមិនសូវត្រូវព្រោះគាត់រៀងស្រវឹងទើបសមត្ថកិច្ចប្រាប់អោយគាត់ទៅសម្រាកសិនចាំស្អែកព្រឹកមកដាក់ពាក្យបណ្ដឹងតាមក្រោយ៕
