ភ្នំពេញ ៖ បុរសនិងស្ត្រីជនជាតិចិន២នាក់ប្ដីប្រពន្ធជិះម៉ូតូសង់កូរ៉េ ធ្វើដំណើរតាមផ្លូវមុនីរ៉េត បានជ្រុលទៅបុកនិងម៉ូតូវេវអាល់ហ្វា បណ្ដាលអោយរងការខូចខាត ហើយម៉ូតូសង់កូរ៉េក៏ព្យាយាមបើករត់ប៉ុន្តែត្រូវសមត្ថកិច្ចដេញចាប់បាន កាលពីវេលាម៉ោង១និង១០នាទីរលងអាធ្រាត្រឈានចូលថ្ងៃទី៤ខែមិនាឆ្នាំ២០១៤ តាមបណ្ដោយផ្លូវមុនីរ៉េតមុខផ្ទះលេខ១៣៣ សង្កាត់បឹងសាឡាង ខណ្ឌទួលគោក។
ប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេបានឃើញបុរសនិងស្ត្រីជនជាតិចិន២នាក់ប្ដីប្រពន្ធជិះម៉ូតូសង់កូរ៉េ ពណ៌ក្រហម ពាក់ស្លាកលេខ ភ្នំពេញ 1A-0678 ធ្វើដំណើរតាមផ្លូវមុនីរ៉េត ក្នុងទិសដៅបញ្ច្រាសទិស ខណៈមកដល់ចំណុចមុខផ្ទះលេខ១៣៣ ក៏បានជិះទៅបុកចំម៉ូតូវ៉េវអាល់ហ្វា ពណ៌ខ្មៅ ពាក់ស្លាកលេខ ភ្នំពេញ 1BZ-4773 បណ្ដាលអោយម្ចាស់ម៉ូតូវេវអាល់ហ្វារងរបួសធ្ងន់ ឃើញដូចនោះ បុរសនិងស្ត្រីជនជាតិចិន២នាក់ប្ដីប្រពន្ធជិះម៉ូតូសង់កូរ៉េរងរបួសស្រាល ក៏ព្យាយាមជិះរត់ប៉ុន្តែត្រូវសមត្ថកិច្ចដេញចាប់បានមកវិញ។
ក្រោយពេលកើតសមត្ថកិច្ចបានចុះមកធ្វើការវាស់វែងនិងយកម៉ូតូទាំង២គ្រឿងយកទៅរក្សាទុកនៅអធិការដ្ឋាននគរបាលខណ្ឌទួលគោករង់ចាំធ្វើការដោះស្រាយតាមនីតិវិធីច្បាប់៕
