ខេត្តព្រះវិហារ កាលពីព្រឹកថ្ងៃទី២២ ខែតុលា ឆ្នាំ២០១៤ ឯកឧត្តម អ៊ុំ ម៉ារ៉ា អភិបាលនៃគណៈអភិបាលខេត្តព្រះវិហារបានអញ្ជើញជាគណៈអធិបតីភាពនៅក្នុងពិធីប្រជុំជំរឿនសហគមន៍កសិកម្មនៅទូរទាំងខេត្តព្រះវិហារ និងចែកពូជបន្លែរួមទាំងសំភារៈកសិកម្មដល់សហគមន៍អភិវឌ្ឍន៍កសិកម្ម ។
លោក ពឹង ទ្រីដា ប្រធានមន្ទីរកសិកម្មខេត្តព្រះវិហារមានប្រសាសន៍ថាៈ ក្នុងទិសដៅជម្រុញសេដ្ឋកិច្ចកសិកម្មរាជរដ្ឋាភិបាលបានបង្កើតច្បាប់ស្តីពីសហគមន៍កសិកម្មមានគោលបំណងលើកកំពស់ការចូលរួមដោយស្ម័គ្រចិត្តរបស់ប្រជាពលរដ្ឋខ្មែរគ្រប់រូបដែលមានមុខរបរចម្បងក្នុងក្របខណ្ឌនៃប្រព័ន្ធផលិកម្មកសិកម្ម កសិឧស្សហកម្ម កសិពាណិជ្ជកម្ម ឬសេវាកម្មពាក់ព័ន្ធផលិតកម្មកសិកម្ម ក្នុងការបង្កើត និងការអភិវឌ្ឍន៍សហគមន៍កសិកម្មសំដៅលើកកំពស់សេដ្ឋកិច្ចសង្គម និងវប្បធម៍របស់សមាជិក ព្រមទាំងរួមចំណែកក្នុងការអភិវឌ្ឍជាតិ ។
លោកបានបន្តទៀតថាៈ លទ្ធផលកិច្ចប្រជុំជំរឿនថ្ងៃនេះរកបាននូវបញ្ហាប្រឈម និងតំរូវការរបស់សហគមន៍កសិកម្មនីមួយៗ ដើម្បីឲ្យនាយកដ្ឋាន និងការិយាល័យអភិវឌ្ឍន៍សហគមន៍មានមូលដ្ឋានក្នុងការបង្កើតផែនការសកម្មភាពឲ្យស្របតាមតំរូវការ និងស្ថានភាពជាក់ស្តែងនៃសហគមន៍នីមួយៗ ។ ហើយនៅក្នុងខេត្តព្រះវិហារសហគមន៍អភិវឌ្ឍន៍កសិកម្មមានចំនួន ៤០ នៅទូរទាំង ៨ ក្រុង ស្រុក ។
ឯកឧត្តម អ៊ុំ ម៉ារ៉ា អភិបាលនៃគណៈអភិបាលខេត្តព្រះវិហារមានប្រសាសន៍ណេះសំណាលនឹងធ្វើការផ្តាំផ្ញើទៅដល់សហគមន៍ទាំងអស់ឲ្យខិតខំបន្ត និងពង្រឹងការងារសហគមន៍របស់ខ្លួនឲ្យទទួលបានជោគជ័យ ។ សហគមន៍នីមួយៗត្រូវក្តាប់ឲ្យបាននូវបញ្ហាប្រឈម និងតំរូវការរបស់សហគមន៍កសិកម្ម ដើម្បីឲ្យនាយកដ្ឋាននឹងការិយាល័យអភិវឌ្ឍន៍សហគមន៍មានមូលដ្ឋានក្នុងការបង្កើតផែនការសកម្មភាពឲ្យស្របតាមតំរូវការ និងស្ថានភាពជាក់ស្តែងនៃសហគមន៍របស់ខ្លួន ។
ឯកឧត្តមបានបន្តឲ្យដឹងថាៈ ដោយឡែកក្នុងឆ្នាំ២០១៤នេះមានសហគមន៍ចំនួន៨ បានសាកល្បងអនុវត្តកសិកម្មចុះកិច្ចសន្យា ដោយផលិតផលស្រូវសរីរាង្គផ្គត់ផ្គងលក់ជូនក្រុមហ៊ុន អមរូនរ៉ាយ ។ នៅក្នុងកម្មវិធីនេះឯកឧត្តមក៍បានចែកពូជបន្លែ និងសំភារៈកសិកម្មជូនសហគមន៍អភិវឌ្ឍន៍កសិកម្មទាំង៤០ផងដែរ ៕
