កំពង់ឆ្នាំង៖ “ព្រះទីនាំងសារ៉ាយអណ្តែតចង្ហាន់ហុយ” ជាឈ្មោះទូកងមួយដែលពេលប្រកួតជាប់លំដាប់ថ្នាក់លេខ១ ជារៀងរាល់ឆ្នាំមិនដែលចាញ់គរឡើយក្នុងទិវាបុណ្យអំទូកកន្លងមក។ទូកប្រណាំងដ៏ល្បីមួយ នេះ បន្ទាប់ពីជួសជុលនិងលាបថ្នាំថ្មីរួចមក ត្រូវបានគណៈ កម្មការទូកធ្វើពិធីក្រុងពាលី
ដើម្បីដាក់ចុះពីបង្គងក្នុងងវត្តវិហារហ្លួង ហៅវត្តផ្សារស្ថិតក្នុងឃុំផ្សារ ស្រុកបរិបូរណ៏ខេត្ត កាលពីថ្ងៃទី ២២ ខែតុលា ឆ្នាំ២០១៤ ហើយបានដង្ហែរតាមដងផ្លូវជាតិលេខ៥ ចុះទៅកំពង់ទឹកឃុំឆ្នុកទ្រូ និងបានសំចត នៅភូមិកំពង់ព្រះគរគី ដើម្បីអោយក្រុមកីឡាករស្នាក់នៅធ្វើការហ្វឹតហាត់នៅទីនោះមុននឹងចេញទៅធ្វើការប្រកួត។
លោក សេង ប៊ុនហេង ប្រធានគណៈកម្មការដឹកនាំទូកប្រណាំងខាងលើនេះ បានប្រាប់ថា៖ ទូក ឈ្មោះ “ព្រះទីនាំងសារាយអណ្តែតចង្ហាន់ហុយ” ធ្លាប់បានទទួលចំណាត់ថ្នាក់លេខ១ចំនួន៣លើកនិងចំណាត់ថ្នាក់លើសភណ្ឌ័ភាពលេខ១ចំនួន១លើក ។
ទូកនេះមានចំណុះកីឡាករ៤៨នាក់ដែល នឹងត្រូវហ្វឹកហាត់នៅក្នុងភូមិកំពង់ព្រះគរគី ឃុំឆ្នុកទ្រូ រហូតដល់ថ្ងៃទី០៣ ខែវិឆ្ឆិកា ទើបទៅចូលរួមការប្រកួតសាកល្បងជាមួយទូកក្នុងខេត្តដទៃទៀតនៅស្រុកកំពង់ត្រឡាច មុននឹងចេញដំណើរទៅចូលរួមប្រកួតនៅរាជធានីភ្នំពេញ ដែលនឹងប្រព្រឹត្តឡើងពីថ្ងៃទី៥ ដល់ថ្ងៃទី ៧ ខែវិឆ្ឆិកា ខាងមុខននេះ ។
គណៈកម្មាការទូកងខាងលើនេះបានរំឮកពីប្រវត្តិឈ្មោះទូកនោះថា៖កាលពីយូរលង់មកហើយមានចៅអធិការវត្តមួយអង្គព្រោះតែស្រុកទេសកើតកលយុគសង្គ្រាមបានលាក់ឈើមួយដើមទុក។លុះស្រុកសាន្តត្រាន បានយកឈើនោះធ្វើជាទូកង ហើយបាននិមន្តបិណ្ឌបាតទៅទីឆ្ងាយៗណាស់ តាមទូកងនោះ មានល្បឿនលឿនខ្លាំងណាស់ ទោះទៅដល់ទីណាក៏ដោយ ពេលត្រឡប់មកដល់វត្តវិញចង្ហាន់នៅតែក្តៅហុយដដែល ទើបអោយឈ្មោះទូកនោះថា៖ ទូកចង្ហាន់ហុយ។ឯពាក្យថាសារ៉ាយអណ្តែត គឺកាលដែលព្រះចៅអធិការនោះយកឈើទៅលាក់ទុកយូរខែឆ្នាំ ខ្លាចធ្វើអោយប្រេះខូច ព្រះអង្គបានយកសារ៉ាយទៅគ្របពីលើឈើនោះ។
ចំណែកពាក្យថា ព្រះទីនាំង គឺក្រោយពីដឹងថា៖ ទូកនោះមានល្បឿនលឿនអស្ចារ្យ ព្រះគ្រូចៅអធិការបានយកទៅថ្វាយស្តេចមួយអង្គកាលពីសម័យនោះទុកជាព្រះទីនាំងក្នុងការធ្វើសឹកសង្គ្រាម ក៏ដូចជាសម្រាប់យាងទៅទីឆ្ងាយៗបានទាន់ចិត្ត ទើបតំណរក្រោយៗមកទើបគេហៅថាព្រះទីនាំង ហើយនៅពេលក្រោយមកវត្តផ្សារនេះតែង មានទូកងប្រណាំងរបស់វត្ត និងបានដាក់ឈ្មោះថា “ព្រះទីនាំងសារ៉ាយអណ្តែតចង្ហាន់ហុយ” តៗគ្នាមក។
លោក ថាន់ សារុំ អភិបាលរងស្រុកបររិបូណ៌ និងលោក ប៊ិន សុផាន មេឃុំផ្សារ សំណូមពរធ្វើការអំពាវដល់សប្បុរសជនទាំងអស់ សូមមេត្តាជួយឧបត្ថម្ភគាំទ្រទូកងខាងលើនេះតាមសទ្ធាផងចុះ ព្រោះសព្វថ្ងៃកីឡាករអុំទូកកំពុងខ្វះខាតជីវភាពក្នុងពេលស្នាក់នៅហាត់ហ្វឹកហ្វឺនអុំទូក ដើម្បីត្រៀមចេញទៅប្រកួតនៅក្នុងទិវាបុណ្យអុំទូកនៅក្នុងរាជធានីភ្នំពេញនាពេលខាងមុខនេះ៕
