ខេត្តបន្ទាយមានជ័យ៖
ពិព័រណ៍បុព្វបុរសនៃអាណាចក្រខ្មែរនៅសារមន្ទីរខេត្តបន្ទាយមានជ័យបានសម្ពោធបើកអោយភ្ញៀវជាតិអន្តរជាតិចូលទស្សនាវត្ថុបុរាណរាប់ពាន់មុខសម្បូរបែបល្អវិចិត្រចាប់ពីថ្ងៃទី២០ខែតុលាឆ្នាំ២០១៤ជាផ្លូវការតទៅ។ ប៉ុន្តែអ្វីដែលសំខាន់ក្នុងពិព័រណ៍នេះគឺ ភ្ញៀវនឹងបានទស្សនា វត្ថុស័ក្តសិទ្ធិដ៏កម្រ គឺថ្មរូបអណ្តើកអណ្តែត ដែលអាចស្រង់ទឹកលាបមុខ ខ្លួនប្រាណ ដើម្បីលើកកម្កើងបុណ្យសក្កិលាភសក្ការៈនិងជោគជាតារាសីជាដើម។ លោក ឃឹម សារឹទ្ធ រដ្ឋលេខាធិការក្រសួងវប្បធម៌និងវិចិត្រសិល្ប៍ះនិងលោក គោស៊ុំ សារឿត អភិបាលខេត្តបន្ទាយមានជ័យ និងអភិបាលរងខេត្ត និងមន្ត្រី សាស្ត្រាចារ្យ និស្សិត និងលោកស្រី ចយ ហាន់ណាន់ ក្លាក (Mrs Joyce Hannan Clark) ប្រធានក្រុមប្រឹក្សាភិបាល នៃអង្គការគាំពារមរតក បានចូលរួមពិធីដ៏មហោឡារឹកនោះ។ទីតាំងសារមន្ទីរខេត្តបន្ទាយមានជ័យ ស្ថិតនៅក្នុងបរិវេណវេទិកាខេត្ត ជ្រុងខាងកើត ភូមិ៣ សង្កាត់ព្រះពន្លា ក្រុងសិរីសោភ័ំណ ឬចំកណ្តាលក្រុងតែម្តង។
ពិព័រណ៍បុព្វបុរស នៃអាណាចក្រខ្មែរ នៅសារមន្ទីរខេត្តបន្ទាយមានជ័យ នាពេលនេះ មានតែមួយកន្លែងគត់ ក្នុងប្រទេសកម្ពុជា និងក្នុងពិភពលោក។ ពិព័រណ៍នេះ សហការរៀបចំដោយក្រសួងវប្បធម៌ និងវិចិត្រសិល្ប: និងឧបត្ថម្ភ ដោយអង្គការកេរមរតក ដើម្បីរួមចំណែកការពារបេតិកភ័ណ្ឌ នៅប្រទេសកម្ពុជា។ ពិព័រណ៍មានតាំងបង្ហាញភាជន៍ ឧបករណ៍ធ្វើពីដែក សំរឹទ្ធិ អង្កាំកែវ អង្កាំថ្ម ព្រមទាំងបង្ហាញពីវិធីកប់សព បុព្វបុរស និងវត្ថុសំណែន ដែលរកឃើញនៅភូមិសូភី និងគោកទ្រាស ដែលជាស្ថានីយ៍ ចុងសម័យបុរេប្រវត្តិ។បំណងមួយទៀត គឺពង្រឹងបច្ចេកទេស តាំងពិព័រណ៍ អោយកាន់តែប្រសើរឡើង ព្រមទាំងផ្សព្វផ្សាយព័ត៌មាន អំពីបេតិកភ័ណ្ឌវប្បធម៌ ពិសេសៗរបស់កម្ពុជា។ ពិព័រណ៍ក៏មានគោលបំណង ទាក់ទាញភ្ញៀវទេសចរជាតិ និងអន្តរជាតិ អោយមកទស្សនា។
លោក ហេង សុផាឌី អគ្គនាយករង អគ្គនាយកដ្ឋានបេតិកភ័ណ្ឌ ធ្វើជាមគ្គុទេសក៍ បង្ហាញមន្ត្រីថ្នាក់ដឹកនាំ និងភ្ញៀវត្រួសៗ ពីការស្រាវជ្រាវបុរេប្រវត្តិសាស្ត្រ នៅប្រទេសកម្ពុជា ដោយអ្នកប្រាជ្ញបរទេស និងខ្មែរ លើស្ថានីយ៍ចាស់ និងថ្មី ជាច្រើន ស្ថិតយុគសំរឹទ្ធិ ដែក..មានចំណាស់ពី ២.០០០ ទៅ ៣.៥០០ ឆ្នាំមុន គ.ស។ ការរកឃើញ និងការសិក្សាស្រាវជ្រាវ ស្ថានីយ៍បុរាណ កាន់តែច្រើន នាំអោយើងយល់ កាន់តែស៊ីជម្រៅ ពីអតីតកាលនៃប្រទេសកម្ពុជា ចាប់ពីបុរេប្រវត្តិ រហូតដល់ក្លាយជារដ្ឋ មហាអំណាច អាណាចក្រ ខ្មែរ នៅអាស៊ីអាគ្នេយ៍។
តាមពិតនៅបន្ទាយមានជ័យ មានស្ថានីយ៍បុរាណវិទ្យា ទេពកោសា-ស្នាយ ឃុំរហាល ស្រុកព្រះនេត្រព្រះ និងទីកំណាយខុសច្បាប់ កន្លងមក ច្រើនកន្លែងទៀត ដែលរកឃើញលទ្ធផល ពីចំណាស់នៃប្រទេស និងជាតិពន្ធុ ប្រជាជាតិខ្មែរ លើទឹកដី ទាំងបុរេប្រវត្តិសាស្ត្រ និងប្រវត្តិសាស្ត្ររបស់ខ្លួន ពុំដូចប្រទេសជិតខាង ដែលទើបកកើតជារដ្ឋ ក្រោយ គ.ស នោះទេ។ធ្វើកំណាយ ដើម្បីលួចប្លន់វត្ថុបុរាណ បុរេប្រវត្តិទាំងនោះ មានរាប់សិបកន្លែង គឺនៅស្រុកថ្មពួក ស្វាយចេក ភ្នំស្រុក អូរជ្រៅ ព្រះនេត្រព្រះ ម៉ាឡៃ។ស្ថានីយ៍ភូមិសូភី ឃុំសូភី ស្រុកអូរជ្រៅ ស្ថិតនៅកណ្តាលភូមិដ៏ធំ រកឃើញដំបូងនៅឆ្នាំ ២០០៧ ជាវាលកប់សពបុព្វបុរសដ៏ធំ ក្នុងតំបន់។
ផ្នូរបុរាណរាប់រយ ត្រូវរកឃើញ ពេលជីកដីសាងសង់។ ក្រសួងវប្បធម៌ និងសាកលវិទ្យាល័យស៊ីតនី ប្រទេសអូស្ត្រាលី បានធ្វើកំណាយសង្គ្រោះ ២លើក។ ការសិក្សាសរីរ:វិទ្យា បង្ហាញថា ផ្នូរបញ្ចុះសពមនុស្សជំទង់ និងកូនក្មេង រួមនឹងសំណែនបន្លុងសពដូចជា ឆ្អឹងសត្វ អង្កាំ អលង្ការ សំរឹទ្ធិ ចង្ក្រង់ ខ្នារអំបោះ វត្ថុធ្វើពីដែក និងភាជន៍។ល។ឯស្ថានីយ៍គោកទ្រាស ភូមិឃុំបន្ទាយឆ្មារ ស្រុកថ្មពួក ស្ថិតនៅ ៥ គម ឦសានប្រាសាទបន្ទាយឆ្មារ រកឃើញឆ្នាំ ២០០៦ ហើយក្រសួងវប្បធម៌ បានធ្វើកំណាយផ្លូវការ នៅឆ្នាំ ២០១២ ពេលរាជរដ្ឋាភិបាល សា្ថបនាផ្លូវជាតិលេខ៥៦ វាង ហើយចំលើផ្នូរសព ដែលរកឃើញ ៦ មានបញ្ចុះសំណែន ស្រដៀងនៅភូមិសូភីដែរ តែ
ថែមមានវត្ថុធ្វើពីមាស និងរកឃើញកាកសំណល់ ពពួកខ្យងខ្ចៅ គ្រុំ។ល។ លោក ហេង សុផាឌី អគ្គនាយករង និងលោក យង់ តាំងគួយ និងលោកស្រី ចយហាន់ណាន់ ក្លាក អោយដឹងថា សម្ភារៈ និងវត្ថុបូរាណ តាំងពិព័រណ៍ គឺរក្សាទុកជូនសារមន្ទីរ តរហូតទៅ ហើយបានបើកអោយ សាធារណ: ជនទស្សនា រាល់ថ្ងៃ។ លោក ឃឹម សារីទ្ធិ រដ្ឋលេខាធិការក្រសួងវប្បធម៌ និងវិចិត្រសិល្ប: ស្នើអោយមន្ទីរអប់រំ យុវជន និងកីឡាខេត្ត គ្រឹះស្ថានសិក្សាសាធារណ: និងឯកជន រៀបចំអោយគ្រូ សិស្ស និស្សិត ទស្សនាស្វែងយល់ជាកញ្ចប់ នៅសារមន្ទីរខេត្ត សារមន្ទីរបុរាណវិទ្យា ទេពកោសា-ស្នាយ នៅស្រុកព្រះនេត្រព្រះ សារមន្ទីរស្រុកស្វាយចេក និង និងតាមប្រាសាទ បុរាណដ្ឋានដទៃទៀត ដើម្បីអោយពួកគេ បានយល់ដឹង ស្រឡាញ់ ផ្សព្វផ្សាយ និងចូលរួមថែរក្សាការពារ និងលើកកម្ពស់វប្បធម៌ កេរមរតក បេតិកភ័ណ្ឌខ្មែរ៕
