កំពង់ធំ៖ នៅព្រឹកថ្ងៃទី១២ ខែវិច្ឆិកា ឆ្នាំ២០២៤ បានប្រទះឃើញគ្រាប់មិនទាន់ផ្ទុះប្រភេទ 60 មីលីម៉ែត្រ នៅភូមិប្រាសាទអណ្ដែត ឃុំសណ្ដាន់ ស្រុកសណ្ដាន់ ខេត្តកំពង់ធំអាជ្ញាធរស្រុកបានចុះពិនិត្យ ដាក់សញ្ញាប្រុងប្រយ័ត្ន និងផ្សព្វផ្សាយឱ្យប្រជាពលរដ្ឋក្នុងមូលដ្ឋានប្រុងប្រយ័ត្ន រង់ចាំការចុះអន្តរាគមន៍របស់កម្លាំងបោសសម្អាតមីន និងយុទ្ធភណ្ឌមិនទាន់ផ្ទុះ។
លោក ឆឿន អឿន មន្ត្រីប៉ុស្តិ៍នគរបាលឃុំសណ្ដាន់ បានរាយការណ៍ថា គ្រាប់មីលីម៉ែត្រប្រភេទនេះមានសភាពច្រេះខាងក្រៅ ប៉ុន្តែអាចបង្កគ្រោះថ្នាក់បាន ប្រសិនបើមានការប៉ះទង្គិច។ គ្រាប់នេះត្រូវបានប្រជាពលរដ្ឋមិនស្គាល់ឈ្មោះ រើសយកពីកន្លែងភ្ជូររាស់ដី ហើយទុកចោលក្បែរគល់ដើមត្នោត នៅលើផ្លូវទៅដីស្រែ ភូមិប្រាសាទ ឃុំសណ្ដាន់។ ដោយសារមានហានិភ័យនេះ ក្រុមការងារប៉ុស្តិ៍នគរបាលសណ្ដាន់បានដាក់សញ្ញាប្រុងប្រយ័ត្ន និងរាយការណ៍ជូនកម្លាំងបោសសម្អាតមីន។
លោក ស៊ិន វណ្ណវុឌ្ឍ អភិបាលស្រុកសណ្ដាន់ បានចុះពិនិត្យកន្លែងនោះ និងណែនាំមេភូមិឱ្យផ្សព្វផ្សាយដល់ប្រជាពលរដ្ឋ និងអ្នកធ្វើដំណើរឆ្លងកាត់មានការប្រុងប្រយ័ត្នរហូតដល់មានកម្លាំងបោសសម្អាតមីនចុះអន្តរាគមន៍។
លោក ទេព សាម៉ុន ប្រធានផ្នែកផែនការនិងប្រតិបត្តិការជាន់ខ្ពស់នៃកម្លាំងបោសសម្អាតមីន បានឱ្យដឹងថា ករណីនេះគ្រោងនឹងចុះឆ្លើយតបនៅថ្ងៃទី១៩ ខែវិច្ឆិកា ខណៈដែលមន្ត្រីជំនាញកំពុងជាប់បេសកកម្ម និងមានបញ្ហាផ្ទាល់ខ្លួនបន្តិច៕វេហាស៍
