ខេត្តព្រះសីហនុ៖ កញ្ញា ឈុន ដារី អភិបាលរងស្រុកស្ទឹងហាវ និង លោកស្រី ហេង ប៊ុនណា អាជីវករ ខេត្តព្រះសីហនុ និង សហការី បានអញ្ជើញសួរសុខទុក្ខ និង យកអំណោយចែកជូនកងទ័ពនៅទីបញ្ជាការតំបន់ប្រតិបត្តិការសឹករងខេត្តព្រះសីហនុកាលពីថ្ងៃទី០២ ខែ វិច្ឆិកា ឆ្នាំ ២០១៤
។ អំណោយដែលបានយកមកផ្តល់ជូននៅពេលនេះ រួមមាន អង្ការផ្កាម្លិះ ១០បាវ ប៊ីចេង ១០គីឡូ មីតុក្តា ២០កេស ត្រីខកំប៉ុង ១០ឡូ ទឹកសុទ្ធវីតាល ២៥កេះ ស្ករស ០១បាវ ទឹកត្រី ៤០ដប ប្រេងឆា ២ កេះ ទឹកស៊ីអ៊ិវ ៤០ដប អំបិលថៃ ១០គីឡូ ចំណីត្រី ១០បាវ ស្រាបៀរអង្គរ ១០កេះ និង សំភារៈការិយាល័យមានតុ ៦ ស្មើនឹង ៧២០ ដុល្លា កៅអី ១០ ស្មើនឹង ២៥០ ដុល្លាបន្ថែមទៀត ។
លោក ឧត្តមសេនីយ៍ត្រី សុខ សាកល មេបញ្ជាការតំបន់ប្រតិបត្តិការសឹករងខេត្តព្រះសីហនុ បានថ្លែងអំណរគុណដល់សប្បុរសជនដែលមានកញ្ញា ឈុន ដារី និង លោកស្រី ហេង ប៊ុនណា ព្រមទាំងសហការីដែលបានអញ្ជើញចុះមកសួរសុខទុក្ខ និងនាំយកអំណោយមួយចំនួនមកជួយឧបត្ថម្ភដល់កងទ័ពនៅទីបញ្ជាការតំបន់ប្រតិបត្តិការសឹករងខេត្តព្រះសីហនុ សរបញ្ជាក់
អោយឃើញពីទឹកចិត្តសប្បុរសធម៌ ដែលការបរិច្ចាកលះបង់នូវធនធានផ្ទាល់ខ្លួនដ៏ច្រើនសន្ធឹកសន្ធាប់ដល់កងទ័ពប្រតិបត្តិការសឹក រងខេត្តព្រះសីហនុ និងកងទ័ពដែលកំពុងតែឈរជើងការពារនៅតាមខ្សែបន្ទាត់ព្រំដែនទិសខេត្តកោះកុង ហើយសំភារៈការិយាល័យមួយចំនួនដែលបានផ្តល់ដល់ទីបញ្ជាការតំបន់ប្រតិបត្តិការសឹករងខេត្តផងដែរនាពេលនេះ។
កញ្ញា ឈុន ដារី តំណាងអោយសប្បុរសជន បានថ្លែងនូវការកោតសរសើរ ចំពោះវីរៈភាពដ៏អង់អាចក្លាហានរបស់បងៗកងទ័ព ដែលបានខិតខំបូជាកំលាំងកាយ ចិត្តឥតរុញរា ក្នុងបុព្វហេតុការពារជាតិមាតុភូមិ ការពារសេចក្តីសុខក្សេមក្សាន្តជូនប្រជាពលរដ្ឋ និងសូមបួងសួងសុំអោយបងៗកងទ័ពទាំងអស់មានសុខភាពល្អ កំលាំងពលំមាំមួន ឈ្មះអស់ជំងឺដង្កាត់ទាំងឡាយ
ជាពិសេសការថែបំប៉នសុខភាពជាការចាំបាច់ក្នុងការចូលរួមចំណែកការពារជាតុមាតុភូមិជូនជាតិ និងប្រជាពលរដ្ឋ ហើយអំណោយដែលបាននាំយកមកប្រគល់ជូននាពេលនេះ គឺជាទឹកចិត្តនៃការចែករំលែកជួយគ្នាក្នុងរវាងសប្បុរសជន ជាមួយនិងប្រតិបត្តិការសឹកខេត្តព្រះសីហនុ ហើយយើងនឹងខិតខំនិងរកអំណោយបន្តទៀត ដើម្បីជួយដល់កងយោធពលខេមរះភូមិន្ទបន្ថែមទៀត ៕
