កំពង់ឆ្នាំង៖ នៅក្នុងកិច្ចប្រតិបត្តការ រយៈពេល១ឆ្នាំចាប់ពីថ្ងៃទី១៧ ខែវិច្ឆិកា ឆ្នាំ២០១៣ ដល់ថ្ងៃទី១៦ ខែវិច្ឆិកា ឆ្នាំ២០១៤សមត្ថកិច្ចនគរបាលនៃការិយាល័យប្រឆាំងគ្រឿងញៀនខេត្តបង្ក្រាបបាន ជនល្មើសប្រុសស្រីចំនួន៨៦នាក់ និងវត្ថុតាងជាថ្នាំញៀនចំនួន១២៨កញ្ចប់ នៅតាមបណ្តាក្រុង
ស្រុកទាំង៨នៃខេត្តកំពង់ឆ្នាំង។ លោកឧត្តមសេនីយ៍ត្រី ប្រាក់ វុទ្ធី ស្នងការខេត្តនគរបាលខេត្តកំពង់ឆ្នាំង បានថ្លែងអ្នកយកព័ត៌មានយើងដឹងថា៖នៅក្នុងរបាយការណ៍បូកសរុបការងារបង្ក្រាប បទល្មើសគ្រឿងញៀននៅក្នុងរយៈមួយឆ្នាំ សមត្ថកិច្ចនគរបាលខេត្តកំពង់ឆ្នាំងបានប្រតិបត្តការបង្ក្រាបបានចំនួន៣៩ករណី,អនុវត្តតាមដីកាចំនួន៥ករណី, និងកំពុងស្រាវជ្រាវបង្ក្រាបចំនួន៥ករណី ដែលក្នុងនោះមានករណីជួញដូរ១៥ករណី,ចែកចាយនិងប្រើប្រាស់ចំនួន៣ករណី,ប្រើប្រាស់ចំនួន២១ករណី។
ករណីខាងលើនេះបានបង្ក្រាបនៅក្នុងសង្កាត់ទាំង៤នៃក្រុងកំពង់ឆ្នាំង និង១៣ឃុំលើ៥ស្រុក ជាលទ្ធផលបានឃាត់ខ្លួនជនសង្ស័យបានចំនួន៨៦នាក់,ស្រី១៣នាក់ ដកហូតវត្ថុតាងថ្នាំញៀនយ៉ាម៉ាទឹកកកចំនួន១២៨កញ្ចប់,ជញ្ជីងថ្លឹងថ្នាំញៀនចំនួន៤,កាំភ្លើងខ្លីម៉ាកកា៥៩មួយដើម បង់មួយ គ្រាប់៧គ្រាប់,កាំបិតចុងស្រួច១១ដើម,ថង់សំរាប់ច្រកថ្នាំញៀន១កញ្ចប់ធំ និងឧបករណ៍ជក់ថ្នាំញៀនមួយចំនួនធំទៀត។
ដកហូតម៉ូតូសរុបចំនួន៣៦គ្រឿង,ទូរស័ព្ទដៃ៧គ្រឿង,វិទ្យុទាក់ទង៥គ្រឿង,ស៊ីមកាតថ្មី១១ស៊ីម, កងដៃធ្វើពីលោហៈធាតុពណ៌លឿងចំនួន៧កង,នាឡិកាដៃ១,ពិល៣,កាបូបដាក់ប្រាក់មួយ, ប្រាក់រៀលចំនួន១លាន២សែន៨ម៉ឺន៨ពាន់៦រយរៀល,ប្រាក់ដុល្លាអាមេរិក៤ោ៤ដុល្លា,ប្រាក់សាំងហ្គាពួរ២ដុល្លា,និងប្រាក់ថៃចំនួន១០០បាត។
បានកសាងនិងបញ្ជូនសំណុំរឿងចំនួន៣៩ករណី,អនុវត្តន៍ដីកា៥ករណី និងករណីស្រាវជ្រាវបាន៥ករណី,ជនសង្ស័យចំនួន៨៦នាក់នោះ និងវត្ថុតាងសម្ភារៈទាំងអស់បានបញ្ជូនទៅសាលាដំបូងខេត្ត ដើម្បីចាត់ការតាមនីតិវិធី។ លោកឧត្តមសេនីយ៍ត្រី ប្រាក់ វុទ្ធី បានបន្តអោយដឹងទៀតថា៖ក្នុងមួយឆ្នាំកន្លងមកនេះ នគរបាលប្រឆាំងគ្រឿងញៀន បានចុះធ្វើការអប់រំផ្សព្វផ្សាយច្បាប់,ផលប៉ះពាល់គ្រោះថ្នាក់នៃគ្រឿងញៀនដល់គ្រឹះស្ថានសិក្សា និងសហគមន៍បានចំនួន១១២លើក មានសិស្សានុសិស្ស និស្សិត និងប្រជាពលរដ្ឋចូលរួមសរុបចំនួន៥.១៦៨នាក់ ស្ថិតក្នុង៨ស្រុកនិងក្រុង។បានបញ្ជូនមុខសញ្ញាញៀនថ្នាំទៅមណ្ឌលកែប្រែបន្សាបគ្រឿងញៀនបាន១១នាក់។
ដោយឡែកទិសដៅអនុវត្តបន្តរបស់ស្នងការដ្ឋាននគរបាលខេត្តកំពង់ឆ្នាំងគឺ៖អប់រំបំបាត់ ប្រសិទ្ធិភាពដល់មុខសញ្ញាប្រើប្រាស់គ្រឿងញៀនតាមបណ្តាស្រុកក្រុងទូទាំងខេត្ត,បន្តចុះផ្សព្វផ្សាយអប់រំច្បាប់ស្តីពីផលប៉ះពាល់គ្រោះថ្នាក់ដោយសារគ្រឿងញៀនដល់គ្រឹះស្ថានសិក្សា និងសហគមន៍ក្នុងខេត្ត។បន្តសហការជាមួយអធិការដ្ឋាននគរបាលស្រុកក្រុងដើម្បីបង្ក្រាបមុខសញ្ញាគ្រឿងញៀន។លោកឧត្តមសេនីយ៍បានសំណូមពរដល់ប្រជាពលរដ្ឋ,មន្ត្រីរាជការ,អាណាព្យាបាលទាំង អស់រួមសហការជាមួយសមត្ថកិច្ច រាយការណ៍អោយបានទាន់ពេលវេលាពេលឃើញមុខសញ្ញាគ្រឿងញៀន ដើម្បីរួមចំណែកក្នុងការបង្ក្រាបទប់ស្កាត់ និងបំបាត់អោយអស់នូវមុខសញ្ញាគ្រឿងញៀន នៅតាមមូលដ្ឋានរបស់ខ្លួន។
ប្រជាពលរដ្ឋនិងសមត្ថកិច្ចនៅក្នុងខេត្តកំពង់ឆ្នាំងបានសុំសំណូមពរដល់ស្ថាប័នតុលាការខេត្តកំពង់ឆ្នាំង មេត្តាផ្តន្ទាទោសដល់មុខសញ្ញាគ្រឿងញៀនទាំងឡាយដែលសមត្ថកិច្ចបានចាប់បញ្ជូនទៅអោយបានម៉ឺងម៉ាត់ទៅតាមបញ្ញតិច្បាប់ មិនត្រូវអនុគ្រោះឬលើកលែងឡើយ។ព្រោះថាកន្លងមកមុខសញ្ញាគ្រឿងញៀនមួយចំនួនដែលជា កូនលោកធំ និងកូនអ្នកមានលុយគេសង្កេតឃើញគេរត់ការជាមួយស្ថាប័នតុលាការដោះលែងស្ងាត់ៗមិនបាន អនុវត្តន៍ទោសទៅតាមបញ្ញតិច្បាប់ឡើយជាហេតុធ្វើអោយមុខសញ្ញាទាំងនោះពេលចេញពីពន្ធនាគារខេត្តវិញពួកគេរឹត តែប្រ ព្រឹត្តបទល្មើសនេះទ្វេឡើង៕
