សៀមរាប : ផ្ទះអ្នកលក់ឥវ៉ាន់ចាបហួយដោយបានដាក់លក់សាំងនៅខាងក្នុងផ្ទះផងនោះមានទីតាំងស្ថិតនៅក្នុងភូមិខ្នាចាស់ សង្កាត់ជ្រាវ ក្រុងសៀមរាបនេះ ត្រូវបានអគ្គីភ័យឆាបឆេះអស់ទាំងស្រុង។ប្រភពព័ត៍មានពីបងប្អូនប្រជាពលរដ្ឋ ក៏ដូចជាម្ចាស់ផ្ទះបាននិយាយថានៅមុនពេលកើតហេតុក្នុងអំឡុងម៉ោងប្រមាណជា១០ព្រឹកថ្ងៃទី១២ខែមីនាឆ្នាំ២០១៤នេះខណ:ពេលដែលម្ចាស់ផ្ទះកពុងតែលក់ដូរឥវ៉ាន់នៅខាងមុខផ្ទះក៏ស្រាប់តែលឺសូរសម្លេងផ្ទុះនៅខាងក្រោយខ្នងរបស់ពួកគាត់ពេលនោះម្ចាស់ផ្ទះនិងបងប្អូនដែលនៅជិតខាងក៏បានងាកក្រោយមើលនិងបានឃើញកំប៉ុងហ្កាសនិងដបសាំងបានផ្ទុះនិងឆាបឆេះឡើងទៅខាងលើដំបូលផ្ទះបន្តមកអណ្តាតភ្លើងក៏បានឆេះរាលចូលទៅក្នុងផ្ទះនិងធ្វើឲ្យ
មានការឆេះខូចខាតដល់ផ្ទះអ្នកជិតខាងបន្តិបន្តួចតែមិនបណ្តាលឲ្យមានអ្នកណាម្នាក់ដែលនៅក្នុងផ្ទះមានគ្រោះថ្នាក់ដល់អាយុជីវិតនោះទេ គឺគ្រាន់តែធ្វើឲ្យខូចខាតនិងបាត់បង់ទ្រព្យសម្បត្តិជាឥវ៉ាន់ចាបហួយនិងសម្ភារះនៅក្នុងផ្ទះមួយភាគធំតែប៉ុណ្ណោះ។ប្រភពព័ត៍មានដ៏ដែលបានបន្តឲ្យដឹងទៀតថានៅពេលដែលភ្លើងកពុងតែឆាបឆេះនោះពួកគាត់បានទំនាក់ទំនងមកកាន់សមត្ថកិច្ចនិងអាជ្ញាធរមានសមត្ថកិច្ចឲ្យមកជួយធ្វើ
អន្តរាគមន៍ភ្លាមៗទើបកម្លាំងនគរបាលជំនាញការិយាល័យនគរបាលពន្លត់អគ្គីភ័យនៃស្នងការដ្ឋាននគរបាលខេត្តសៀមរាបទៅដល់ទីតាំងកើតហេតុនិងបានធ្វើការពន្លត់អគ្គីភ័យដែលកពុងតែឆេះឲ្យរលត់ទៅវិញដើម្បីមិនឲ្យភ្លើងនេះឆេះរាលដាលដល់ផ្ទះរបស់អ្នកជិតខាងបានទាន់ពេលវេលាផងដែរ។ក្នុងករណីដែលមានអគ្គីភ័យបានឆេះផ្ទះអ្នកលក់ឥវ៉ាន់ចាបហួយអស់១ខ្នងនេះលោកវរសេនីយ៍ត្រី ទិត្យ ណារ៉ុង
អធិការនគរបាលក្រុងសៀមរាបនៅនិងកន្លែងកើតហេតុបានមានប្រសាសន៍ផ្តាំផ្ញើនិងបានសុំណូមពរដល់គ្រប់ទីតាំងដែលបានបើកអាជីវកម្មគ្រប់ប្រភេទត្រូវតែយកចិត្តទុកដាក់ខ្ពស់ចំពោះហានិភ័យនៃករណីគ្រប់ប្រភេទពិសេសគឺករណីអគ្គីភ័យនេះតែម្តងដោយយើងជាម្ចាស់ត្រូវតែចេះការពារនិងមិនត្រូវថ្វេប្រហេះព្រោះគ្រោះអគ្គីភ័យនេះវាអាចកើតឡើងបានគ្រប់ពេលវេលាផងដែរ ៕ អត្ថបទដោយ លោក ខេង ខេមរា រូបភាព លោក ម៉ែន បូរិទ្ធ
