ខេត្តព្រះសីហនុ លោកស្រី គង់ បូរី ប្រធានសម្របសម្រួលគម្រោង HTC របស់អង្គការ AHF ខេត្ត ព្រះសីហនុ បានមានប្រសាសន៌ថា អង្គការបានសហការជាមួយមន្ទីរសុខាភិបាល និងអង្គការដៃគូអភិវឌ្ឍន៌ធ្វើយុទ្ធនាការផ្សព្វផ្សាយធ្វើតេស្តឈាមនៅចុងម្រាមដៃរកមេរោគអេដស៌ដោយស្មគ្រ័
ចិត្ត និងផ្តល់ប្រឹក្សារក្សាការសម្ងាត់ជូនដល់កម្មករោងចក្រ ក្រុមហ៊ុន អង្គការដៃគូរ ក្លឹបកំសាន្ត និងកងកម្លាំងប្រដាប់អាវុធ រយះពេល៥ថ្ងៃ គឺចាប់ពីថ្ងៃទី២៧ ដល់ថ្ងៃទី៣០ខែវិច្ឆិកា ឆ្នាំ២០១៤ និងថ្ងៃទី០៣ ខែធ្នូ២០១៤មួយថ្ងៃទៀត ដើម្បីរកអ្នកឆ្លងមេរោគអេដស៌ថ្មីនៅក្នុងខេត្តព្រះសីហនុ ។
លោកស្រី គង់ បូរី បានបន្តថា អង្គការ AHF ជាអង្គការអន្តរជាតិមួយធ្វើការទាក់ទងទៅនឹងអេដស៌ អាយ វី ផ្តល់ការថែទាំ និងព្យាបាលដោយឪសថប្រឆាំងនឹងមេរោគអេដស៌ក្នុងប្រទេសកម្ពុជា ដោយឡែកនៅខេត្តព្រះសីហនុ យើងមានគម្រោងពីរ គម្រោងទី១ គឺធ្វើការលើផ្នែកគ្លីនិកទាក់ទងទៅនឹងការថែទាំសុខភាព និងផ្តល់ថ្នាំដល់អ្នកផ្ទុកមេរោគអេដស៌ក្នុងខេត្តព្រះសីហនុ និងគម្រោងទី២ ចាប់ផ្តើមពីខែ០៥ ឆ្នាំ២០១៣ គឺគម្រោង HPC មានន័យថា គម្រោងធ្វើតេស្តឈាមរកមេរោគអេដស៌ដោយស្មគ្រ័ចិត្ត រក្សាការសម្ងាត់នៅតាមសហគមន៌ប្រជាពលរដ្ឋ ដើម្បីផ្សាភ្ជាប់ពីសហគមន៌មកកាន់គ្លីនិក ។
លោកស្រីប្រធានបានបន្តទៀតថា គោលបំណងទី១ គឺស្វែងរកអ្នកដែលឆ្លងមេរោគថ្មី ដើម្បីឪ្យពួកគាត់បានមកទទួលសេវាព្យាបាលដោយឥតគិតថ្លៃ និងទាន់ពេលវេលា ។ យុទ្ធនាការរយះពេល៥ថ្ងៃនេះ ក្នុងគោលបំណងចូលរួមចំណែកស្វែងរកការឆ្លងមេរោគអដស៌ថ្មី ឪ្យសមស្របទៅនឹងយុទ្ធសាស្ត្ររបស់រាជរដ្ឋាភិបាលកម្ពុជា ដើម្បីផ្សាភ្ជាប់ការទទួលសេវាឪ្យបានទាន់ពេលវេលា ចូលរួមកាត់បន្ថយការរីករាលដាលមេរោគអេដស៌ និងជំងឺអេដស៌ព្រមទាំងការស្លាប់ ការរើសអើងនៅក្នុងសហគមន៌ទូទាំងប្រទេសកម្ពុជា ជាពិសេសក្នុងខេត្តព្រះសីហនុ ។
អង្គកាផ្តល់រការថែទាំ និងព្យាបាលអ្នកជំងឺអេដស៌ AHF បានធ្វើការជាមួយប្រជាពលរដ្ឋ ក្រុមបុរសស្រឡាញ់បុរស កងរាជអាវុធហត្ថ កងខេមរះភូមិន្ទ ប៉ូលីស ក្រុមអ្នកចំណាកស្រុក ក្រុមកម្មករនេសាទ កម្មករសំណង់ ជាដើមដើម្បីរកមេរោគអដស៌ និងប្រឹក្សាឪ្យមកទទួលយកឪសថប្រឆាំងនិងជំងឺអដស៌ ។
ជាលទ្ធផលការធ្វើតេស្តឈាមរកមេរោគអេដស៌ដោយស្មគ្រ័ចិត្តនៅថ្ងៃទី២៧ខែវិច្ឆិកា ឆ្នាំ២០១៤ ទៅលើគោលដៅចំនួន០៦ មានរោងចក្រញ៉ូស្តារ រោងចក្រ VRT ក្រុមហ៊ុនម៉ុងរិទ្ធី ដូងប្រេង បា សមុទ្រមាស បា បារាំង និងឧត្តុនិយមសរុបបានចំនួន ៣២៥នាក់ ក្នុងនោះវិជ្ជមានចំនួន ០២នាក់ ស្រី០១ ប្រុស០១ ។ ចែកស្រោមអនាម័យចំនួន៣.២០០ស្រោម ព្រមទាំងធ្វើការអប់រំដល់កម្មកររោងចក្រ និងបា បានចំនួន ៥១៣នាក់ ៕ 
