បុរស២នាក់ទំនងស្រវឹងជិះរថយន្តមួយគ្រឿងបោះពួយលឿនដូចហោះជ្រុលទៅបុករបាំងថ្មពុះចែកទ្រូងផ្លូវបាក់អស់ចំនួន៣កង់ហើយរថយន្តក្រឡាប់ផ្អៀងទៅខាងស្ដាំរងការខូចខាតស្ទើរទាំងស្រុង ចំណែកអ្នកជិះក្នុងរថយន្តរងរបួសស្រាលបានចេញពីរថយន្តគេចពីកន្លែងកើតហេតុ
បា កាលពីវេលាម៉ោង១០យប់ថ្ងៃទី១៣ខែមករាឆ្នាំ២០១៥ តាមបណ្ដោយផ្លូវជាតិលេខ២ ស្ថិតក្នុងភូមិទួលរកា២ សង្កាត់ចាក់អង្រែក្រោម ខណ្ឌមានជ័យ។
ប្រភពព័ត៌មានពីកន្លែងកើតហេតុបានអោយដឹងថា គេឃើញរថយន្តមួយគ្រឿងម៉ាកមីស៊ុយប៊ីស៊ី ត្រាយតុន ពណ៌ទឹកប្រាក់ ពាក់ស្លាកលេខ រដ្ឋ១៧ 2-0868 ជិះធ្វើដំណើរដោយបុរស២នាក់ តាមបណ្ដោយផ្លូវជាតិលេខ២ ទិសដៅពីជើងទៅត្បូងក្នុងល្បឿនយ៉ាងលឿនស្រាប់តែមកដល់ចំណុចកើតហេតុទំនងអ្នកកាន់ចង្កូតរថយន្តស្រវឹងក៏រេចង្កូតបុករបាំងថ្មពុះចែកទ្រូងផ្លូវចំពេញទំហឹងបាក់អស់ចំនួន៣កង់ ហើយរថយន្តខ្ទេចមួយកំណាត់មុខ ផ្ទុះពោងសុវត្តិភាពទាំង២ និងក្រឡាប់ទៅជំហៀងខាងស្ដាំ ក៏ត្រូវបានប្រជាពលរដ្ឋធ្វើដំណើរតាមផ្លូវជួយក្រឡាប់រថយន្តមកវិញដោយអ្នកក្នុងជិះរថយន្តគ្រាន់តែរងរបួសស្រាលក៏បានចេញពីរថយន្តរួចគេចខ្លួនពីកន្លែងកើតហេតុបាត់។
បន្ទាប់ពីកើតហេតុសមត្ថកិច្ចមូលដ្ឋានក៏បានចុះមកអន្តរាគមន៍និងនិងជួយសំរួលចរាចរ និងបានទំនាក់ទំនងទៅសមត្ថកិច្ចជំនាញវាស់វែងយករថយន្តទៅរក្សាទុកនៅការិយាល័យចរាចរជើងគោកនៃស្នងការដ្ឋាននគរបាលរាជធានីភ្នំពេញធ្វើការដោះស្រាយតាមផ្លូវច្បាប់៕
