> បាត់ដំបង: មេល្បែងកន្ទុយលេខជាច្រើននាក់ត្រូវបានសមត្ថកិច្ចនៃការិយាល័យព្រហ្មទណ្ឌកំរិតស្រាល> ចុះបង្ក្រាប និងធ្វើការឃាត់ខ្លួនខណ:ដែលពួកគេកំពុងអង្គុយលក់យ៉ាងងងើលនៅតាមចិញ្ចើមថ្នល់> ក្រោមការជ្រោមជ្រែងពីលោកអធិការក្រុងដែលទើបនឹងផ្លាស់ប្តូរមកកាន់តំណែងថ្មីនិងជាអ្នករៀបចំ> គំរោងដើរប្រមូលលុយពីទីតាំងល្បែងគ្រប់ប្រភេទផងដែរ ។
> បន្ទាប់ពីទទួលបាននូវបទបញ្ជាពីលោកឧត្តមសេនីយ៍ ស ថេត ស្នងការនគរបាលខេត្ត
> រួចមកនៅរសៀលថ្ងៃទី16-1-15 លោក ម៉េង លៀង នាយការិយាល័ព្រហ្មទណ្ឌកំរិតស្រាលបាន> ដឹកនាំកំលាំងធ្វើការចុះបង្ក្រាបល្បែងកន្ទុយលេខដែលគេបានបើកលក់ស្ទើរតែគ្រប់ទីកន្លែងក្នុងក្រុង> បាត់ដំបង ដែលកន្លងមកសមត្ថកិច្ចធ្លាប់បានបង្ក្រាបជាច្រើនលើកច្រើនសាររួចមកហើយដែរ ប៉ុន្តែ> ពួកគេហាក់បីដូចជាមិនរាងចាលទាល់តែសោះ បើទោះបីជាពួកគេធ្លាប់បានធ្វើកិច្ចសន្យាយ៉ាងណា> ក៏ដោយក៏គេនៅតែបន្តសកម្មភាពយ៉ាងរលូននេះដោយសារតែមានសមត្ថកិច្ចមួយក្រុមជាអ្នកដើរ ប្រមូលលុយប្រចាំថ្ងៃ និងខ្លះទៀតដាក់ខែក៏មាន ។
> គួរបញ្ជាក់ថាកន្លងទៅថ្មីៗនេះលោក យឹម វិចិត្រ អធិការនគរបាលក្រុងបាត់ដំបងដែលទើប> នឹងផ្លាស់ប្តូរមកពីអធិការស្រុកថ្មគោលបានចាត់សេនាឆ្វេងស្តាំអោយចុះទៅធ្វើការគាស់អញ្ជើញ> មេល្បែងបាល់ធំៗក្នុងក្រុងអោយចូលខ្លួនមកជួបដើម្បីចរចាររឿងបង់លុយប្រចាំខែដោយលោក> អធិការបានកំណត់ក្នុងមួយកន្លែងត្រូវបង់លុយចំនួន200ដុល្លារសំរាប់ខែនីមួយៗ ។
> ការរអ៊ូរទាំរបស់មេល្បែងបាល់អំពីតំលៃកប់ពពកនេះមិនទាន់ទាំងសាបរលាបផងក៏ស្រាប់តែ> មានលេចឮព័ត៌មានថ្មីមួយទៀតបានកើតឡើងគឺលោកអធិការយឹម វិចិត្រ បានអោយកំលាំងដើរ ប្រមូលលុយតាមកន្លែងលក់កន្ទុយលេខ(ល្បែងឆ្នោត) ដោយតំរូវទៅតាមទីតាំងគឺមាន3ប្រភេទ> ទី1កន្លែងតូចគឺមួយថ្ងៃ5ពាន់រៀល ទី2ទីតាំងធំត្រូវបង់មួយថ្ងៃមួយមុឺនរៀល និងទី3បើទីតាំងណា> ពិបាកក្នុងការបង់ប្រចាំថ្ងៃគឺគេមានសិទ្ធិបង់ប្រចាំខែបានដោយក្នុងមួយខែ100ដុល្លារ ។
> ពាក់ព័ន្ធនឹងបញ្ហាដើរប្រមូលលុយពីសំណាក់លោកអធិការក្រុងដែលទើបនឹងមកកាន់
> តំណែងថ្មីនេះក៏មានការរិះគន់យ៉ាងខ្លាំងផងដែរពីសំណាក់ប្រជាពលរដ្ឋពិសេសក្នុងជួររបស់កងកំលាំង> នគរបាលដោយពួកគេបានលើកឡើងថាការផ្លាស់ប្តូរមកកាន់ជាអធិការក្រុងនេះគឺមកកើបលុយ> តែម្តងដោយមិនបានពិចារណាថាខ្លួនមាននាទីជាអ្វី ? ហើយគោលនយោបានភូមិ ឃុំមានសុវត្ថិភាព> ទាំង9ចំនុចនោះតើគេយកទៅទុកនៅឯណា? ។
> ស្ត្រីម្នាក់ដែលជាមេកន្ទុយលេខបានពោលនៅមុខសមរ្ថកិច្ចថា មុនពេលដែលកំលាំងចុះទៅ> បង្ក្រាបប្រមាណ10នាទីគឺកំលាំងប៉ូលីសក្រុងទើបតែយកលុយប្រចាំថ្ងៃចេញទៅផុតក៏ស្រាប់តែ> ប៉ូលីសខេត្តមកដល់ល្មម ហើយរូបគាត់បានគិតថាការលក់កន្ទុយលេខនេះប្រហែលជាបាមសុខសាន្ត ហើយព្រោះនៅពេលដែលពួកគេមកប្រមូលលុយគឺគេបានសន្យាថាគ្មានអ្នកណាហ៊ានមកចាប់ទេ> ព្រោះយើងបានបង់លុយរួចហើយ ប៉ុន្តែជាលទ្ធផលគឺត្រូវចាប់ខ្លួនដដែល ហើយគ្មានឃើញប៉ូលីស> ក្រុងណាចេញមុខមកដោះស្រាយទាល់តែសោះ ។
> នៅថ្ងៃដែលសមត្ថកិច្ចចុះបង្ក្រាបគឺជាថ្ងៃដែលឆ្នោតសៀមត្រូវចេញផងនោះ លោកវរ:សេនីយ៍> ទោ ម៉េង លៀង បានលើកឡើងថា លោកក៏បានដឹងឮដែរថាកំលាំងក្រុងបានចុះទៅប្រមូលលុយដាក់> ថ្ងៃឬដាក់ខែ ប៉ុន្តែចំពោះលោកគឺត្រូវតែបង្ក្រាបទៅលើល្បែងសុីសងគ្រប់ប្រភេទដោយសុំគោលការ> ពីលោកស្នងការដើម្បីធ្វើអោយបានក្នុងរឿងនេះ ។
> លោកនាយការិយាល័យបានសង្កត់ធ្ងន់ថា ការបង្ក្រាបលើកនេះគឺនឹងសុំគោលការ ទៅលោកព្រះរាជអាជ្ញាធ្វើការអប់រំជាលើកចុងក្រោយព្រោះការបង្ក្រាបកន្លង មកមានការធ្វើកិច្ចសន្យាច្រើនលើក> ច្រើនសាររួចមកហើយដូច្នេះគឺមិនអាចអប់រំណែនាំតទៅទៀតបានទេ ត្រូវតែធ្វើអោយបានតឹងរុឹង> ទៅតាមផ្លូវច្បាប់ ។ មជ្ឈដ្ឋានជាច្រើនកំពុងតែចាំមើលថាតើលោកអធិការក្រុងនឹងបន្តសកម្មភាព> ដើរប្រមូលលុយទៅលើល្បែងផ្សេងទៀតដែរឬទេ? ៕
