ខេត្តបន្ទាយមានជ័យ៖ កងរាជអាវុធហត្ថខេត្តឃាត់ក្មេងប្រុសស្ទាវ៥នាក់ដែលញៀន និងបង្ខំឲ្យក្មេងស្រីម្នាក់ប្រើប្រាស់ដែរនោះត្រូវបានអវុធហត្ថឃាត់ខ្លួនបញ្ជូនទៅតុលាការនាព្រឹកនេះថ្ងៃទី៦ខែមេសា ឆ្នាំ២០១៥ បន្ទាប់ពីបងក្មេងស្រីរងគ្រោះប្តឹងសមត្ថកិច្ចជួយអន្តរាគមន៍។លោកឧត្ត
មសេនីយ៍ត្រី ឱ បូរិន្ទមេបញ្ជាការកងរាជអាវុធហត្ថខេត្តបន្ទាយមានជ័យបានឲ្យដឹងនៅថ្ងៃទី៦ ខែមេសានេះថាក្រោយពីទទួលបានពាក្យបណ្តឹងពីបងក្មេងស្រីរងគ្រោះឈ្មោះ ឡ ស អ អាយុ ២០ឆ្នាំ មានទីលំនៅបណ្តោះអាសន្ន ក្នុងភូមិគោរដ្ឋាន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ដោយចោទថាក្មេងប្រុស ៥នាក់នេះបានអូសទាញឲ្យប្អូនស្រីរបស់ខ្លួនប្រើប្រាស់ថ្នាំញៀន រហូតដល់យកម៉ូតូខ្សែកនិងទ្រព្យសម្បត្តិជាច្រើនទៅលក់ដើម្បីយកទៅទិញគ្រឿងញៀនប្រើប្រាស់រហូតដល់ញៀនថ្នាំ ។
សមត្ថកិច្ចជំនាញបានឃាត់ខ្លួនក្មេងប្រុស៥នាក់ រួមមាន ១-ឈ្មោះ ជា ណារី ២-ឈ្មោះ ពៅ ពិសី ៣-ឈ្មោះ ពៅពិសិដ្ឋ ៤-ឈ្មោះ សួន សុណៃ ៥-ឈ្មោះ លន់វាសនា។
លោកឧត្តមសេនីយ៍ត្រី ឱ បូរិន្ទ មេបញ្ជាការ អាវុធហត្ថខេត្តបន្ទាយមានជ័យបានបញ្ជាក់បន្ថែមថាក្នុងពេលឃាត់ខ្លួនយុវជន និងយុវតីខាងលើសមត្ថកិច្ចបានរកឃើញវត្ថុតាងល្មើសមានឧបករណ៍សម្រាប់សេពគ្រឿងញៀនមួយចំនួននិងរថយន្តម៉ាកតូយ៉ូតាឡង់គ្រីស័រ១គ្រឿង ពណ៌បៃតងចាស់ពាក់ស្លាកលេខ ២K-០៩៩៥ហើយជនទាំងនេះជាមុខសញ្ញាជួញដូរចែកចាយ និងប្រើប្រាស់គ្រឿងញៀន។មកដល់ពេលនេះសមត្ថកិច្ចអាវុធហត្ថជំនាញបានសាងសំណុំរឿងជនទាំងអស់ខាងលើបានបញ្ជូនខ្លួនរួចហើយទៅតុលាការខេត្តដើម្បីចាត់ការតាមនីតិវិធីច្បាប់៕គង្គា
