ភ្នំពេញ៖ ម៉ូតូអេសហ្សិនមួយគ្រឿង ពណ៌ក្រហម ពាក់ស្លាកលេខ 1BW-2225 ត្រូវប្រជាពលរដ្ឋប្រទះឃើញបញ្ឈរចោល៤ថ្ងៃនៅចំណុចផ្ទះលេខ ១៦ ភូមិ៤ ស្ថិតក្នុងសង្កាត់ផ្សារដើមថ្កូវ មិនឃើញមានម្ចាស់មកយក ក៏រាយការណ៍មកសមត្ថកិច្ចទើបដឹងថា ម្ចាស់ម៉ូតូជួបគ្រោះថ្នាក់ចរាចរណ៍។
ស្ត្រីដែលបានមករាយការណ៍ប្រាប់សមត្ថកិច្ចឲ្យយកម៉ូតូមករក្សាទុកនៅអធិការដ្ឋាននគរបាលខណ្ឌចំការមនខាងលើនេះ ឈ្មោះ យឹម ប៊ុនណា ភេទស្រី អាយុ៣៩ឆ្នាំ ។ដោយឡែកម្ចាស់ម៉ូតូដែលបានដាក់ពាក្យបណ្តឹងបាត់ម៉ូតូដែលមានភិនភាគដូចខាងលើ ឈ្មោះ ចាន់ ដារ៉ារ័ត្ន ភេទប្រុស អាយុ២៤ឆ្នាំ ជាបុគ្កលិកកាស៊ីណូណាហ្គា ។ តាមប្រភពព័ត៌មានពីឈ្មោះ ស្ត្រី ឈ្មោះ យឹម ប៊ុនណា បានឲ្យដឹងថា រូបគាត់បានឃើញម៉ូតូខាងលើចតចោលនៅមុខផ្ទះរបស់គាត់អស់រយៈពេល៤ថ្ងៃមកហើយ មិនឃើញមានម្ចាស់មកយកទើបរូបគាត់រាយការណ៍មកសមត្ថកិច្ចដើម្បីយកមករក្សាទុកនៅអធិការដ្ឋាននគរបាលខណ្ឌចំការមន ។ លុះដល់ពេលមកដល់អធិការដ្ឋាននគរបាលខណ្ឌចំការមន ទើបដឹងថា មានយុវជនម្នាក់បានមកដាក់ពាក្យបណ្តឹងស្វែករកម៉ូតូរបស់ខ្លួនដែលបានបាត់កាលពីយប់ថ្ងៃទី១១ ខែឧសភា ឆ្នាំ២០១៤ ដោយសាររូបគេចេញពីហូបការបងប្អូន ហើយជួបហេតុការណ៍គ្រោះថ្នាក់ចរាចរណ៍ ។
ក្រោយពីទទួលបានសេចក្តីរាយការណ៍ពីស្ត្រីឈ្មោះ យឹម ប៊ុនណារួចហើយ សមត្ថកិច្ចក៏ទំនាក់ទំនងទៅម្ចាស់ម៉ូតូឈ្មោះ ចាន់ ដារ៉ារ័ត្ន មកសួរនាំ ដើម្បីប្រគល់ម៉ូតូឲ្យម្ចាស់ដើមវិញ ៕
