ភ្នំពេញ ៖ រថយន្តកូរ៉ូឡាអាក់ទីសមួយគ្រឿងបើកបរក្នុងលឿនបានជ្រុលទៅបុកជាមួយរថយន្តឡិចស៊ីស RX300កំពុងឈប់ស្តុប បណ្តាលឱ្យរថយន្តកូរ៉ូឡារងការខូចខាតមួយកំណាត់មុខនិងបែកពោងការពារចំណែកឯរថយន្តឡិចស៊ីសរុលទៅមុខនិងបង្វិលក្បាលរថយន្តទៅប៉ះនិងក្លោងទ្វារចូលក្រសួងមហាផ្ទៃ ហេតុការណ៍នេះកើតឡើងកាលពីវេលាម៉ោង៨និង១៥នាទីយប់ថ្ងៃទី២ ខែមិថុនា ឆ្នាំ២០១៤ នៅត្រង់ចំណុច កែងស្តុបក្រសួងមហាផ្ទៃ ស្ថិតនៅក្នុងសង្កាត់ទន្លេបាសាក់ ខណ្ឌចំការមន។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្តមួយគ្រឿងម៉ាកតូយ៉ូតា កូរ៉ូឡាអាក់ទីស ពណ៌ទឹកប្រាក់ ពាក់ស្លាកលេខភ្នំពេញ 2Q-9559 បើកបរដោយបុរសម្នាក់និងរួមដំណើរដោយបុរសម្នាក់ទៀត ក្នុងល្បឿនយ៉ាងលឿនទាំងស្ថានភាពស្រវឹងជោកជាំ តាមបណ្ដោយផ្លូវព្រះនរោត្ដម ទិសដៅពីជើងទៅត្បូង ខណៈមកដល់
ចំណុចកើតហេតុក៏បានជ្រុល ទៅបុកជាមួយនិងរថយន្តឡិចស៊ីសRX300 មួយគ្រឿង ពណ៌ស្ករ ពាក់ស្លាកលេខភ្នំពេញ 2T-19 69 ដែលកំពុងឈប់ស្តុប ចំពីមុខយ៉ាងពេញទំហឹងបណ្តាលឱ្យរថយន្តកូរ៉ូឡារងការខូចខាតមួយកំណាត់មុខនិងបែកពោងការពារ ចំណែកឯរថយន្តឡិចស៊ីសរុលនិងបែរក្បាលរថយន្តទៅប៉ះនិងក្លោងទ្វារចូលទៅក្រសួងមហាផ្ទៃរងការខូចខាត
និងបែកពោងការពារផងដែរ ប៉ុន្តែអ្នកបើកបរពុំមានរងរបួសនោះទេ ។ គួរបញ្ជាក់ថា បន្ទាប់ពីកើតហេតុនៅពេលសមត្ថកិច្ចមូលដ្ឋានចុះទៅពិនិត្យកន្លែងកើតហេតុ បែរជាគេឃើញបុរសម្នាក់ពាក់អាវពណ៌ខ្មៅ ជាអ្នកបើកបររថយន្តកូរ៉ូឡាស្ថិតក្នុងស្ថានភាពស្រវឹងជោកជាំបានជេរប្រមាថយ៉ាងចាស់ដៃទៅលើម្ចាស់រថយន្តឡិចស៊ីស និងសមត្ថកិច្ចមូលដ្ឋាន ព្រមទាំងគំរាម
រកវ៉ៃទាំងសមត្ថកិច្ចនិងម្ចាស់រថយន្តឡិចស៊ីសទៀតផង។ ក្រោយពេលកើតហេតុបុរសបើករថយន្តកូរ៉ូឡាដែលជេរប្រមាថនិងគំរាមវ៉ៃសមត្ថកិច្ចនិងម្ចាស់រថយន្តឡិចស៊ីស ត្រូវសមត្ថកិច្ចជំនាញចរាចរមកវាស់វែងនិងយករថយន្តទាំងពីរគ្រឿងព្រមទាំងជនបង្កទៅសាកសួរនៅការិយាល័យចរាចរជើងគោកនៃស្នងការដ្ឋាននគរបាលរាជធានីភ្នំពេញដើម្បី ធ្វើការដោះស្រាយតាមផ្លូវច្បាប់៕
