ម៉ាស៊ីនអត់ច្បាប់២កន្លែង ជ្រោកក្រោមរូបភាពជាដេប៉ូលក់ឈើ កំពុងតែធ្វើសកម្មភាពអារជ្រៀកឈើចុង១តឹកកន្លះ យ៉ាងគគ្រឹកគ្រេង ស្ថិតចំណុចគល់ស្ពានពោធិ ក្នុងឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង ។
ប្រភពពត៌មាន បានអោយដឹងថា ទីតាំងខាងលើ ជាដេប៉ូលក់ឈើ ហើយម្ចាស់ដេប៉ូ បាន បំពាក់នូវគ្រឿងម៉ាស៊ីន សម្រាប់អារជ្រៀកឈើ នៅខាងក្រោយដេប៉ូរបស់ខ្លួន ។ ការអារជ្រៀកឈើខាងលើជាប្រភេទឈើមិនទាន់គ្រប់អាយុ ដែលមានទំហំចាប់ពីចុង១តឹក ដល់១តឹកកន្លះ ដែលឈ្មួញខាងលើ អារជាប្រភេទឈើគ្រឿង ។ ឈើមូលទាំងអស់ ដែលដឹកចូលអារជ្រៀកក្នុងរោងម៉ាស៊ីន ទាំងពីរកន្លែងខាងលើនេះ សុទ្ធសឹងជាឈើដែលឈ្មួញបានទិញ និងដឹកពីភូមិសាស្ត្រឃុំឈើតុំ ស្រុកក្រគរ ខេត្តពោធិសាត់ ។
ពាក់ព័ន្ធពត៌មានខាងលើនេះ លោក ឯម វិចិត្រ នាយផ្នែករដ្ឋបាលព្រៃឈើ កំពង់ត្រឡាច បានអោយដឹងថា ដេប៉ូឈើខាងលើ ជាដេប៉ូមានច្បាប់ ប៉ុន្តែការដាក់ម៉ាស៊ីនអារជ្រៀកនោះ គឺគ្មានច្បាប់អនុញ្ញាតទេ លោកនិងបញ្ជាអោយកូនចៅ ចុះទៅត្រួតពិនិត្យមើលជាក់ស្តែង ។
មជ្ឈដ្ឋានទូទៅ បានរិះគន់ថាការ អារជ្រៀកឈើ មិនអាចធ្វើឡើងដោយស្ងាត់ៗ គ្មានសំលេង និងគ្មានភ្នែកមជ្ឈដ្ឋានទូទៅ បានឃើញ និងដឹងលឺនោះទេ ការអារបានដោយរលូនបែបនេះ ប្រហែលជានាយផ្នែករដ្ឋបាលព្រៃឈើ កំពង់ត្រឡាច និងសមត្ថកិច្ចពាក់ព័ន្ធ អាចត្រូវរ៉ូវជាមួយឈ្មួញក៍មិនដឹង ៕
