ភ្នំពេញ ៖ ករណីយល់ច្រលំមួយបានបង្កអោយមានការភ្ញាក់ផ្អើល រវាងម្ចាស់ហាងជាមួយនិងភ្ញៀវដែលចូលទៅផឹកស៊ី ព្រោះតែមានការយល់ច្រលំរឿងលុយ ដោយខាងម្ចាស់ហាងថាភ្ញៀវផឹកស៊ីមិនទាន់ឱ្យលុយប៉ុន្តែភ្ញៀវថាបានឱ្យលុយទៅកូនចៅម្ចាស់ហាងរួចហើយ។
ហេតុការណ៍នេះបានកើតឡើងកាលពីវេលាម៉ោង ៧និង១៥នាទីយប់ថ្ងៃទី៣ខែមិថុនាឆ្នាំ២០១៤ នៅក្នុងហាងដែលមានយីហ្វេមេឌា នៅជិតកន្លែងដាក់ស្លាកលេខចាស់ ស្ថិតនៅក្នុងសង្កាត់វាលវង់ ខណ្ឌ៧មករា។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញបុរសចំនួន៥នាក់បានចូលទៅផឹកស៊ីនៅហាងខាងលើ លុះផឹកស៊ីស្រវឹងរួចរាល់បុរសម្នាក់ក្នុងចំណោមបុរស៥នាក់មិនចង់ឱ្យពួកម៉ាកចេញលុយក៏ដើរសំដៅទៅនារីម្នាក់ហើយបានដកលុយក្រដាស៥០ដុល្លារមួយសន្លឹក ដាក់ចូលទៅក្នុងសៀវភៅគិតលុយ រួចបានដើរមកតុវិញដើម្បីចាំលុយអាប់។ មួយសន្ទុះក្រោយមកមិនឃើញបុគ្គលិកក្នុងហាងយកលុយមកអាប់ឱ្យខ្លួនក៏ទៅសួរនាំ។ ពេលនោះភាគីម្ចាស់ហាងបាននិយាយទៅកាន់ភ្ញៀវថាមិនទាន់គិតលុយឱ្យហាងទេ ភ្លាមៗភ្ញៀវតបវិញថា បានឱ្យលុយទៅបុគ្គលិកស្រីរួចហើយប៉ុន្តែបុគ្គលិកស្រីនោះថាមិនទាន់បានទទួលលុយពីភ្ញៀវទេ ទើបបង្កឱ្យមានការឈ្លោះប្រកែកគ្នាតែម្តង។
បន្ទាប់ពីកើតហេតុសមត្ថកិច្ចមូលដ្ឋានក៏បានចុះមកសម្រួល ដល់កន្លែងកើតហេតុការណ៍ ហើយក្រុមភ្ញៀវដែលរងការចោទប្រកាន់ថាផឹកស៊ីមិនទាន់ឱ្យលុយបានសំណូមពរ ដល់សមត្ថកិច្ចសុំឱ្យហាងឆែកកាមេរ៉ាសុវត្តិភាព ប៉ុន្តែម្ចាស់ហាងថាមិនបាច់ឆែកទេព្រោះកន្លែងឱ្យលុយនោះនៅចំហៀងមិនអាចមើលឃើញទេ។
ចុងក្រោយសមត្ថកិច្ចសុំនាំខ្លួនភ្ញៀវទាំង៥នាក់ទៅកាន់ប៉ុស្តិ៍ដើម្បីសួរនាំតែក្រុមបុរសទាំង៥នាក់ឆ្លើយថាមិនទៅទេហើយក៏បន្តចរចារគ្នានៅមុខហាងតែម្ដង៕
