ខេត្តព្រះសីហនុ៖ផ្លូវស្របតាមបណ្តោយមាត់សមុទ្រពីកំពង់ផែស្វយត័ក្រុងខេត្តព្រះសីហនុឆ្ពោះទៅស្រុកស្ទឹងហាវ ស្ដិតក្នុងភូមិទំនប់រលក សង្កាត់១ ក្រុងព្រះសីហនុ ត្រូវបានអ្នកធ្វើដំណើរឆ្លងកាត់ផ្លូវនេះសំដែងការត្អូញត្អែរគ្រប់ៗគ្នា។
ត្អូញត្អែរដោយសារតែផ្លូវនេះត្រូវបានគេយកទៅធ្វើជាកន្លែងចតរថយន្តដឹកទំនិញធំៗបន្តកន្ទុយគ្នាពេញតាមចិញ្ចើមផ្លូវមុនពេលចូលទៅដឹកឥវ៉ាន់នៅកំពង់ផែរបស់លោក ឧកញ៉ា សូ ជុងហួ និងយកធ្វើជាកន្លែងដាក់សម្ភារៈអេតចាយរបស់ថៅកែអេតចាយល្បីឈ្មោះម្នាក់ យ៉ាងអានាធិបតេយ្យ។
បញ្ហានេះបានធ្វើអោយផ្លូវដែលតូចស្រាប់ផងនោះកាន់តែរួមតូចថែមមួយកំរិតទៀតនិងកកស្ទះចរាចរណ៏ជារៀងរាល់ថ្ងៃជាពិសេសសោភណ្ឌភាពក្រុងតំបន់នេះត្រូវបានបំផ្លាញស្ទើរទាំងស្រុង។
គួរបញ្ជាក់ថានៅតាមចិញ្ចើមផ្លូវនេះក្រៅពីការចតរថយន្តធំ ,ការដាក់គំនរអេតចាយ ក៏មានការយកសំរាមមកគរទុកចោលយ៉ាងរាយប៉ាយនិងដាក់តាំងលក់ឥវ៉ាន់អានាធិបតេយ្យផងដែរ។
បញ្ហានេះ លោក អ៊ី សុខឡេង អភិបាលក្រុងព្រះសីហនុបានបញ្ជាក់ថានៅសប្តាហិ៏នេះនឹងរៀបចំសណ្តាប់ផ្លូវអោយបានល្អប្រសើរឡើងវិញដោយមិនអនុញ្ញាតអោយរថយន្តដឹកទំនិញធុនធំទាំងនោះនៅបន្តចតរងចាំដឹកឥវ៉ាន់លើចញ្ចើមផ្លូវនេះទៀតឡើយ។
ចំពោះគំនរអេតចាយទាំងនោះបើមិនរើចេញអោយអស់ទេរដ្ឋបាលក្រុងនឹងចាត់វិធានការណ៏ក្តៅដោយដឹកជញ្ជូនទុកយកមករក្សាទុកម្តុំ។
គួររំលឹកថាករណីខាងលើនេះមិនមែនជារឿងថ្មីទេគឺជារឿងដដែលៗបាននឹងបន្តកើតឡើងរាប់ឆ្នាំទៅហើយ។
បញ្ហានេះអាជ្ញាធរខេត្ត ក្រុងក៏ធ្លាប់បានចុះណែនាំជាច្រើនលើកច្រើនសារមកហើយដែរតែហាក់មិនទាន់ឃើញមានប្រសិទ្ធភាពសោះជាពិសេសម្ចាស់ទីតាំងអេតចាយ។
លោក អ៊ី សុខឡេង អភិបាលក្រុងបន្ថែមថាចាប់ពីពេលនេះតទៅយានយន្តទាំងអស់មិនអនុញ្ញាតអោយយកផ្លូវធ្វើចំណតទៀតឡើយ។ពោលគឺយានយន្តទាំងអស់ត្រូវតែចូលចតក្នុងចំណតអោយបានត្រឹមត្រូវ។
មួយវិញទៀតចំពោះផ្លូវជាតិលេខ៤ចំណុចឃ្លាំងលើ មុខរោងចក្រស្រាបៀរអង្គរគឺមិនអនុញ្ញាតអោយដាក់គ្រឿងចក្រពាសពេញចិញ្ចើមផ្លូវទៀតឡើយរួមទាំងរថយន្តដឹកទំនិញផងដែរព្រោះទីតាំងនេះជាច្រកដែលភ្ញៀវចូលមកលេងក្រុង។លោក អភិបាលក្រុងស្នើអោយផ្នែកពាក់ពន្ធ័ត្រូវចូលរួមអនុវត្តអោយមានប្រសិទ្ធភាពខ្ពស់៕
