ក្រុងសិង្ហបុរីៈ បន្ទាប់ពីទទួលការរិះគន់ និងគំរាមធ្ងន់ៗពីអាមេរិកជាច្រើនលើក និងការថ្លែងរបស់ជប៉ុននៅក្នុងប៉ុន្មានថ្ងៃមកនេះ ប្រទេសមហាអំណាចសេដ្ឋកិច្ចទី២លើពិភបលោក ចិនបានជេរប្រទេចនាយករដ្ឋមន្ត្រីជប៉ុនលោក ស៊ីនហ្សូ អាបេ និងរដ្ឋមន្ត្រីការពារជាតិអាមេរិក លោកឆាក់ ហាហ្គែលកាលពីថ្ងៃចន្ទ ដែលចោទប្រកាន់ក្រុងប៉េកាំងពីបទបង្កអស្ថិរភាពជាច្រើនក្នុងតំបន់ ពិសេសក្រោយពីមានជម្លោះដែនទឹកនៅសមុទ្រចិនខាងត្បូង។
នៅក្នុងវេទិកាសន្តិសុខអាស៊ីមួយក្នុងប្រទេសសិង្ហបុរី លោកឧត្តមសេនីយ៍ វ៉ាង គួនចុង នាយរងអគ្គសេនាធិការកងទ័ពរំដោះប្រជាជនចិនបានប្រើសម្តីខ្លាំងៗរិះគន់ជប៉ុន និងឆ្លើយតបចំពោះអាមេរិក ខណៈដែលមន្ត្រីជាន់ខ្ពស់នៃប្រទេសទាំងពីរដែលចូលចិត្តលើកម្តងហើយម្តងទៀតពីបញ្ហាសមុទ្រចិនខាងត្បូងនៅឯសន្និសីទនេះហើយថា សម្តីបែបនោះគឺមិនអាចទទួលយកបាននោះឡើយ។
លោកឆាក់ ហាហ្គែល រដ្ឋមន្ត្រីការពារជាតិអាមេរិក កាលពីថ្ងៃសៅរ៍បានព្រមានចិនដែលមានជម្លោះជាមួយហ្វីលីពីន និងវៀតណាមថាជាទង្វើបង្កអស្ថិរភាពនៅសមុទ្រចិនខាងត្បូង បន្ទាប់ពីលោកនាយករដ្ឋមន្ត្រីជប៉ុន ស៊ិនហ្សូ អាបេ កាលពីថ្ងៃសុក្រក្នុងកិច្ចសន្ទនាមួយបានជំរុញឲ្យប្រទេសទាំងឡាយគោរពគោលការណ៍ច្បាប់ ដែលសម្តីនេះសំដៅលើក្រុងប៉េកាំង។
សហរដ្ឋអាមេរិកប្ដេជ្ញាធ្វើជាសម្ព័ន្ធមិត្ត និងជាមិត្តនៅអាស៊ី លោក Hagel បានអំពាវនាវឲ្យមានដំណោះស្រាយសន្តិភាពក្នុងជម្លោះអន្តរជាតិ ហើយបានបញ្ចេញនូវសារនយោបាយដ៏គ្រោតគ្រាតទៅឲ្យប្រទេសចិន ដែលមានប្រតិភូជាមន្ត្រីជាន់ខ្ពស់ខាងកងទ័ពទៅចូលរួមក្នុងវេទិកា សន្តិសុខនៅប្រទេសសឹង្ហបុរីដែរ។
ក្នុងឱកាសថ្លែងសុន្ទរកថានៅក្នុងវេទិកានោះ លោកវ៉ាង គួណចុង បានថ្លែងថា សុន្ទរកថារបស់លោកស៊ិនហ្សូ អាបេ និងលោកឆាក់ ហាហ្គែល ប្រើសម្តីក្នុងវេទិកាគឺជាទង្វើបង្កហេតុមួយប្រឆាំងនឹងប្រទេសចិន ហើយលោកក៏បានបន្ថែមថា និយាយថា ចិននឹងមិនដែលស្វែងរកអនុត្តរភាព និងការឈ្លានពានលើបរទេសនោះឡើយ។
ប្រធានាធិបតីចិន ស៊ី ជីនពីង បានសន្យាថា មិនបង្កភាពវឹកវរនៅសមុទ្រចិនខាងត្បូង ប៉ុន្តែបន្ថែមថា ចិនក៏នឹងប្រើមធ្យោបាចចាំបាច់នានា ជាប្រតិកម្មតបតទៅនឹងការផ្គើនរបស់ប្រទេសជាប់ជម្លោះ នៅសមុទ្រចិនផងដែរ៕
