ខេត្តរតនគិរី៖ ជនសង្ស័យម្នាក់ត្រូវបានកងរាជអាវុធហត្ថក្រុងបានលុងធ្វើការឃាត់ខ្លួនករណីរក្សាទុកនិងចែកចាយប្រើប្រាស់គ្រឿងញៀនខុសច្បាប់នៅក្រុងបានលុង។
ករណីឃាត់ខ្លួនជនសង្ស័យខាងលើនេះធ្វើឡើងនៅវេលាម៉ោង១១ថ្ងៃត្រង់ ថ្ងៃទី៨ ខែធ្នូ ឆ្នាំ២០១៦ នៅត្រង់ចំណុចផ្ទះសំណាក់ពន្លឺពេជ្រ និយាមកាម១៤.៥៩៩ និងនិយាមកាម១៨.៥៥៨ ស្ថិតក្នុងភូមិថ្មី សង្កាត់ឡាបានសៀក ក្រុងបានលុង ខេត្តរតនគិរី ដឹកនាំដោយលោកវរសេនីយ៍ត្រី ហៃ វណ្ណារ៉ា មេបញ្ជាការកងរាជអាវុធហត្ថក្រុងបានលុង ដោយមានការសម្របសម្រួលពីលោក លាវ ស្រេង ព្រះរាជអាជ្ញាអមសាលាដំបូងខេត្តរតនគិរីបាន ចុះបង្ក្រាបជាក់ស្តែង និងឃាត់ខ្លួនជនសង្ស័យម្នាក់មានឈ្មោះហ៊ុន វណ្ណៈ ភេទប្រុស អាយុ១៦ ឆ្នាំជនជាតិខ្មែរមុខរបរមិនពិតប្រាកដ មានទីលំនៅស្ថិតនៅភូមិថ្មី សង្កាត់ឡាបានសៀក ក្រុងបានលុង ខេត្តរតនគិរី។
លោកបានបន្តទៀតថា ការបង្ក្រាបករណីចែកចាយ និងប្រើប្រាស់គ្រឿងញៀន បានដកហូតនូវម្សៅក្រាមពណ៌សថ្លា (ម៉ាទឹកកកមួយកញ្ចប់ធំទម្ងន់៣,៤៥ក្រាម)ទូរស័ព្ទដៃម៉ាកIphone4 ពណ៌ខ្មៅចំនួន១គ្រឿង ម៉ូតូវ៉េវពណ៌ខ្មៅលាយក្រហម ពាក់ស្លាកលេខរតនគិរី1B-3283ចំនួន១គ្រឿង ព្រមទាំងសម្ភារៈវិចខ្ចប់និងប្រដាប់សេពគ្រឿងញៀនមួយចំនួនផងដែរ។
បច្ចុប្បន្នជនសង្ស័យខាងលើនេះកំពុងឃាត់ខ្លួននៅការិយាល័យគ្រឿងញៀននៃបញ្ជាការកងរាជអាវុធហត្ថខេត្តរតនគិរី ដើម្បីបំពេញសំណុំរឿងបញ្ជូនទៅសាលាដំបូងខេត្ត ចាត់ការទៅតាមនីតិវិធីច្បាប់ ៕ដោយ: យក្ខឡោម
