ភ្នំពេញ ៖ បុរសម្នាក់បានមកលោតទឹកទន្លេមុខវត្តឧណ្ណាឡោម បង្កឱ្យមានការភ្ញាក់ផ្អើលដល់ ប្រជាពលរដ្ឋនិងបានស្រែកប្រាប់ទូកនេសាទជនជាតិចាមជួយស្រង់មកដាក់លើគោកមាត់ច្រាំងទន្លេ ហេតុការណ៍ភ្ញាក់ផ្អើលនេះបានកើតឡើងនៅវេលាម៉ោង១១និង១៥នាទីយប់ថ្ងៃទី៤ខែមិថុនា ឆ្នាំ
២០១៤ នៅចំណុចចក្នុងទន្លេមុខវត្តឧណ្ណាឡោម ស្ថិតនៅក្នុងសង្កាត់ជ័យជំនះ ខណ្ឌដូនពេញ។
ជនរងគ្រោះមានឈ្មោះ ថោង សុខជា ភេទប្រុសអាយុ២៦ឆ្នាំ ស្នាក់នៅតាមវត្តម្តុំពោធិ៍ចិនតុង មានស្រុកកំណើតនៅស្រុកត្រាំកក់ ខេត្តតាកែវ ។
យោងតាមប្រព័ត៌មានពីអ្នកឃើញហេតុការណ៍បានឱ្យថា នៅមុនពេលកើតហេតុគេឃើញបុរសម្នាក់ស្លៀកខោខ្លី ពណ៌ខ្មៅហើយអត់មានពាក់អាវទេ បានដើរមកលោតទឹកទន្លេនៅមុខវត្តឧណ្ណាឡោម ឃើញដូច្នេះប្រជាពលរដ្ឋបានស្រែកហៅទូកនេសាទចាម ឱ្យជួយស្រង់ជនរងគ្រោះឡើងមកលើគោកវិញ។ ពេលស្រង់ឡើងមកលើគោកវិញ ប្រជាពលរដ្ឋបានសួរមូលហេតុ ប៉ុន្តែ ជនរងគ្រោះបានឆ្លើយពីនេះពីនោះស្ដាប់គ្នាមិនទំនងមានសតិមិនល្អបែបរវើរវាយមិនដឹងស្អីទេនិងបានត្រឹមតែលើកដៃសំពះប្រជាពលរដ្ឋកុំអោយវ៉ៃរូបគេទៅវិញ។
ក្រោយពេលកើតហេតុសមត្ថកិច្ចមូលដ្ឋានបានចុះមកត្រួតពិនិត្យនិងមិនបានសួរនាំអ្វីទេ ហើយសមត្ថកិច្ចក៏បានហៅរ៉ឺម៉កម៉ូតូកង់៣ឱ្យឌុបបុរសម្នាក់នេះត្រឡប់ទៅកន្លែងស្នាក់នៅវិញ៕
