ត្បូងឃ្មុំ: កម្លាំងជំនាញនៃស្នងការដ្ឋាននគរបាលខេត្តត្បូងឃ្មុំ បានអនុវត្តន៏ដីកាបង្គាប់ឲ្យចាប់ខ្លួន អតីតមន្ត្រីនគរបាលការិយាល័យព្រហ្មទណ្ឌកំរឹតស្រាលម្នាក់ឈ្មោះព្រំ ទឹត្យា
ហៅលុច ជាមន្ត្រីនគរបាលខេត្តត្បូងឃ្មុំ ដែលត្រូវបានបណ្តេញចេញពីជួរ បន្ទាប់ពីបានទទួលការអប់រំ និងព្រមានជាច្រើនលើកតែគេមិនរាងចាល គឺជា មុខសញ្ញាជួញដូរនិងចែកចាយគ្រឿងញៀន ធ្វើសកម្មភាពក្នុងទឹកដីខេត្តត្បូងឃ្មុំ ដោយមិនញញើតជាមួយកងកម្លាំងមានសមត្ថកិច្ចឡើយ។
រសៀលថ្ងៃទី ២០ខែធ្នូ២០១៦ កម្លាំងជំនាញប្រឆាំងគ្រឿងញៀន ដឹកនាំដោយលោក វរសេនីយ៍ទោ ជា ជឿន បានតាមប្រមាញ់និងចាប់ខ្លួនជននេះ តាមអំណាចដីកាបង្គាប់អោយចាប់ខ្លួន លេខ១៥ចុះថ្ងៃទី២០ខែតុលា២០១៥ ខណៈជននេះកំពុងដឹកមាន់ជល់១ក្បាលចេញពីកាសុិណូមួយកន្លែង នៅភូមិក្រែកត្បូង ឃុំក្រែក ស្រុក ពញាក្រែក ខេត្តត្បូងឃ្មុំ ។
បច្ចុប្បន្នជននេះត្រូវបានឃាត់ខ្លួនបណ្តោះអាសន្ននៅស្នងការដ្ឋាននគរបាលខេត្ត និងត្រូវបញ្ជូនទៅតុលាការនៅថ្ងៃទី២៣ធ្នូ ខាងមុខនេះ។
ក្រោយពីបង្ក្រាបជនសង្ស័យខាងលើ លោកឧត្ដមសេនីយ៍ទោ បែន រត្ន័ ស្នងការនគរបាលខេត្តត្បូងឃ្មុំ បានប្រកាសឲ្យមន្ត្រីនគរបាលខេត្តត្បូងឃ្មុំណា ដែលមានជាប់ពាក់ព័ន្ធគ្រឿងញៀន ត្រូវបញ្ឈប់ជាបន្ទាន់ ហើយបើនៅតែបន្តទៀតនោះ លោកនឹងចាត់វិធានការតាមផ្លូវច្បាប់ដោយមិនលើកលែងឡើយ ៕
