កំពង់ចាម: ជនសង្ស័យម្នាក់ ដែលធ្លាប់ជាប់ពន្ធនាគាររយៈពេល៦ឆ្នាំ ដោយសារករណីប្លន់ តែមិនព្រមកែប្រែគំនិតទេ គឺពេលចេញមកវិញនៅតែបន្តសកម្មភាពលួចប្លន់ដដែល ទីបំផុតត្រូវសមត្ថកិច្ចអាវុធហត្ថចាប់ឃាត់ខ្លួន កាលពីវេលាម៉ោង៣និង៣០នាទីល្ងាច ថ្ងៃទី២៨ ខែធ្នូ ឆ្នាំ២០១៦ ដែលនឹងត្រូវបញ្ជូនខ្លួនទៅតុលាការជាថ្មីម្ដងទៀត។
សមត្ថកិច្ចអាវុធហត្ថខេត្តកំពង់ចាមបានឲ្យដឹងថា ជនសង្ស័យដែលបានធ្វើសកម្មភាពលួចម៉ូតូនេះ មានឈ្មោះ ជា រតនា ភេទប្រុស អាយុ៣៧ឆ្នាំ មុខរបរសន្តិសុខឯកជនភ្នំពេញ មានទីលំនៅមិនពិតប្រាកដ ដោយបានលួចម៉ូតូ១គ្រឿង ម៉ាកសេ១២៥ សេរី២០១៤ ពាក់ស្លាកលេខ តាកែវ1J-2714 របស់ជនរងគ្រោះឈ្មោះអំ ចាន់ធឿន ភេទស្រី អាយុ២៨ឆ្នាំ នៅភូមិបឹងកុកទ២ សង្កាត់បឹងកុក ក្រុងកំពង់ចាម ដែលជនរងគ្រោះបានទុកនៅពីក្រោមផ្ទះរបស់ខ្លួន។
ក្រោយពីសមត្ថកិច្ចទទួលបានពាក់បណ្តឹងពីជនរងគ្រោះ ក៏បានផ្តល់ដំណឹងទៅកម្លាំងកងរាជអាវុធហត្ថរាជធានីភ្នំពេញ ដើម្បីសហការណ៍ ជាលទ្ធផលគឺឃាត់ខ្លួនបានជនសង្ស័យខាងលើ រួមជាមួយនិងវត្ថុតាង ម៉ូតូមួយគ្រឿងផងដែរ។
សមត្ថកិច្ចបានបញ្ជាក់ថាជនសង្ស័យកន្លងមកធ្លាប់ជាប់ពន្ធនាគារ រយៈពេល៦ឆ្នាំម្ដងរួចហើយ ពីបទប្លន់ប្រដាប់អាវុធ និងបច្ចុប្បន្នកំពុងប្រើប្រាស់សារធាតុញៀនផងដែរ។
បច្ចុប្បន្ន កម្លាំងជំនាញកំពុងតែកសាងសំណុំរឿង បញ្ជូនខ្លួនជនសង្ស័យទៅតុលាការ ដើម្បីចាត់ការបន្តតាមនិតិវិធីច្បាប់ ៕
