សៀមរាបៈក្រុមប្រជាពលរដ្ឋជាង១០០នាក់ដែលរស់នៅតំបន់ជុំវិញទីតាំងស្តុកសំរាមរបស់ក្រុមហ៊ុនហ្កាអ៊ីយ៉ា.ភីអិលស៊ីបានដាក់ពាក្យប្តឹងទៅអាជ្ញាធរខេត្តឲ្យជួយអន្តរាគមន៏ផ្លាស់ប្តូរទីតាំងរបស់ក្រុមហ៊ុននេះចេញជាបន្ទាន់បើពុំដូច្នោះទេពួកគេនឹងធ្វើកូដកម្មបិទផ្លូវដែលជាច្រកចូលរបស់ក្រុមហ៊ុននៅឆាប់ៗខាងមុខេះ។
ទីតាំងស្តុកសំរាមរបស់ក្រុមហ៊ុនឈ្មោះហ្កាអ៊ីយ៉ាស្ថិតនៅកណ្តាលក្រុងសៀមរាបស្ថិតក្នុងភូមិខ្នារសង្កាត់ជ្រាវ ទល់មុខអគ្គិសនីខេត្តសៀមរាប។ អ្នកស្រីគួចខាណៃតំណាងពលរដ្ឋក្នុងភូមិខ្នារសង្កាត់ជ្រាវបានឲ្យវាលឥន្ទ្រីដឹងថាដោយសាតែក្លិនស្អុយបានជះស្រោចស្រពគ្របដណ្តប់លើពលរដ្ឋរាប់សិបគ្រួសារជាច្រើនឆ្នាំរហូតទ្រាំលែងបាននៅថ្ងៃទី១១ខែធ្នូឆ្នាំ២០១៣ ពួកគាត់បានដាក់ពាក្យបណ្តឹងមួយច្បាប់ទៅអាជ្ញាធរ ឲ្យជួយមានវិធានការផ្លាស់ប្តូរ។
តែនៅថ្ងៃទី២៨ខែឆ្នាំ២០១៤សាលាខេត្តសៀមរាបបានចេញលិខិតជូនដំណឹងមួយច្បាប់មកអ្នកស្រីវិញដោយបញ្ជាក់ថាអាជ្ញាធរតម្រូវឲ្យខាងក្រុមហ៊ុនអនុវត្តនូវ៦ចំណុចទី១កាត់បន្ថយការរំខាងដោយសម្លេងគ្រប់បែបយ៉ាង។ ទី២ ត្រូវចល័តសំណល់ សំរាមចេញពីទីលានស្តុកឲ្យបានអស់ជាប្រចាំរៀងរាល់ថ្ងៃ។
ទី៣ ប្រើថ្នាំកំចាត់ក្លិនស្អុយតាមបច្ចេកទេសគឺជៀស វាងកុំឲ្យជះក្លិនស្អុយដល់ពលរដ្ឋជិតខាងនិងសាធារណៈជន។ទី៤ ត្រូវចាក់បេតុងទាំងកន្លែងស្តុកសំរាម និង ចំណុចប្រតិបត្តិការនានា ។ទី៥ ត្រូវមានប្រពន្ធ័ប្រឡាយបង្ហូរទឹកកខ្វក់ តាមបច្ចេកទេសជៀសវាងមានទឹកដក់ធ្វើឲ្យមានក្លិនស្អុយនិងសត្វចម្លងមេរោគគ្រប់ប្រភេទ។ទី៦ការដឹកជញ្ជូនសំណល់សំរាមត្រូវគ្របកៅស៊ូតង់ចងឲ្យជាប់ជៀសវាងធ្លាក់រាយប៉ាយជាហេតុបង្កការប៉ះពាល់ដល់សណ្តាប់ធ្នាប់សាធារណៈ ហើយត្រូវសម្អាតជា ប្រចាំចាប់ពីផ្លូវវាងក្រុង រហូតដល់ក្រុមហ៊ុន។
បើអនុវត្តមិនបាន៦ចំណុចខាងលើ ក្រុមហ៊ុនត្រូវផ្លាស់ប្តូរទីតាំង នោះចេញ។ អ្នកស្រីបន្ថែមថា ពីថ្ងៃជូនដំណឹងរបស់សាលាខេត្ត រហូតមកទល់ពេលនេះ ទាំងសម្លេងរំខាន ទាំងក្លិនស្អុយ នៅតែគ្របដណ្តប់មកលើពលរដ្ឋគ្មានថ្ងៃស្រាកស្រាន។ ក្លិនស្អុយមិនត្រឹមតែបង្កការលំបាក ក្នុងការរស់នៅប្រចាំថ្ងៃនោះទេនោះទេគឺថែមទាំងបង្កឲ្យកើតមាននូវជម្ងឺផ្លូវដង្ហើមដល់ក្មេងតូចជាច្រើននាក់ទៀត។
ដោយសាបញ្ហា ទាំងនេះទើបពួកគាត់សម្រេចដាក់ពាក្យបណ្តឹងជាថ្មី ។ ក្រោយដាក់ពាក្យប្តឹងជាថ្មី នៅព្រឹកថ្ងៃ ទី៣ខែមិថុនានេះ អាជ្ញាធរបានហៅពិភាគសារ ដោយអះអាងថា នៅថ្ងៃទី៦ខាងមុខនេះ នឹងដោះស្រាយគ្នា។ អ្នកស្រីបញ្ជាក់បន្ថែមថា អ្វីដែលពួកគាត់ចង់បានគឺ ផ្លាស់ប្តូរទីតាំង ហើយបើនៅថ្ងៃទី៦ខាងមុខនេះ ពុំមានលក្ខណ័ទាក់ទងនឹងការផ្លាស់ប្តូរទីតាំងស្តុកសំរាមនោះទេនៅថ្ងៃទី៨មិថុនាពួកគាត់អាចនឹងធ្វើកូដកម្មបិទផ្លូវ រហូតមានការផ្លាស់ប្តូរទីតាំងទើបបញ្ឍប់។
មន្ត្រីក្រុមប្រឹក្សាសង្កាត់ជ្រាវបានឲ្យដឹងដែរថាទាក់ទងនឹងការធ្វើកូដកម្មបិទផ្លូវនេះខាងពលរដ្ឋក៏បានផ្តល់ព័ត៏មានឲ្យខាងលោកដែរ។ចឹងទេអ្វីៗដែលកើតឡើងគឺជាសិទ្ធិរបស់ពួកគាត់ខាងលោកបានត្រឹមរាយការជូនថ្នាក់លើតែប៉ុណ្ណោះ។ កាលពីព្រឹកម៉ិញវាលឥន្ទ្រីមិនអាចស្វែងរកតំណាងក្រុមហ៊ុនប្រមូលសំរាមហ្កាអ៊ីយ៉ាទាក់ទងនឹងការប្តឹងឲ្យផ្លាស់ប្តូរទីតាំងបានទេដោយទូរស័ព្ទចូលគ្នានអ្នកទទួល៕
