ភ្នំពេញ-ព្រះសីហនុ៖ តាមព័ត៍មានក្ដៅៗ បានឲ្យដឹងថា ថ្មីៗនេះមានការដាក់ឲ្យដេញថ្លៃ នូវដែកចាស់ៗចំនួន ២០០០តោន (ពីរពាន់តោន) នៅស្ថានីយ៍រថភ្លើងចំនួន ២ គឺនៅស្ថានីយ៍រថភ្លើងភ្នំពេញចំនួន ៩០០តោន (ប្រាំបួនរយតោន) និងស្ថានីយ៍រថភ្លើង ក្រុងព្រះសីហនុចំនួន ១១០០តោន (មួយពាន់ មួយរយតោន) ។
ការដាក់ឲ្យដេញថ្លៃនោះ ត្រូវគេសង្ស័យថា អាចមានការឃុបឃិតគ្នា ជាលក្ខណៈប្រព័ន្ធ ក្នុងការប្រព្រិត្តអំពើ ពុករលួយមួយយ៉ាងធំ ធ្វើឲ្យបាត់បង់ចំណូល ថវិកាជាតិយ៉ាងច្រើន… ព្រោះថា ដែករ៉ៃ និងដែកទូររថភ្លើង ព្រមទាំងដែកចាស់ៗទាំងអស់ នៅក្នុងស្ថានីយ៍រថភ្លើងទាំង ២កន្លែងខាងលើ អាចមានចំនួនប្រមាណពីជាង ៤០០០តោន (បួនពាន់តោន) ទៅ ៥០០០តោន (ប្រាំពាន់តោន) ឯណោះ… ហេតុអីក៍គេដាក់នៅក្នុងទំរង់ បែបបទនៃការដេញថ្លៃតែចំនួន ២ពាន់តោនបែបនេះ ដោយមិន
ដាក់ដេញថ្លៃលក់ គ្រប់ចំនួនឲ្យអស់តែម្ដងទៅ…? តើដែកចាស់ៗផ្សេងទៀត គេទុកធ្វើអី… និងថា តើថ្ងៃក្រោយអាចនឹងមានការ ដាក់ឲ្យដេញថ្លៃដែកចាស់ៗ ដែលនៅសេសសល់ទាំងនោះ ទៀតដែរឬទេ? ប្រភពបានឲ្យដឹងទៀតថា សព្វថ្ងៃមានអ្នកដេញថ្លៃ ដែកចាស់ៗនោះបានហើយ… តែអ្វីដែលបាននិងកំពុងធ្វើឲ្យ មានការសង្ស័យបំផុតនៅត្រង់ថា អ្នកដែលដេញថ្លៃបាននោះ ចង់ដឹកដែកចាស់ៗទាំងនោះចេញ ដោយមិនទាន់មានការថ្លឹង ឲ្យបានដឹងពីចំនួនពិតប្រាកដ ពីពួកមន្ត្រីៗ
ជំនាញនៅឡើយទេ ។ ពោលគឺឮដំណឹងថា កាលពីយប់មិញ (យប់ថ្ងៃទី៤ មិថុនា) ពួកគេចង់សម្រុកដឹកចេញទាំងយប់… តែមិនទាន់មានឱកាសល្អ អាចធ្វើឲ្យពួកគេដឹកចេញ បានសម្រេចនៅឡើយទេ ។ តែយ៉ាងណាក៍ដោយ ពួកគេមានគម្រោង នឹងព្យាយាមដឹកដែក រាប់ពាន់តោនទាំងនោះចេញ នៅរសៀល និងយប់ថ្ងៃទី៥ មិថុនានេះវិញ ដែលមើលទៅប្រៀបដូចជា ការធ្វើឡើងដោយកញ្ឆក់កណ្ដៀត ឬតាមបែបត្រីងៀតឆ្លៀតពង ត្រីក្នុងស៊ងឆ្លៀតកើតកូនអីចឹង… ។
ម្យ៉ាងវិញទៀត ក៍មានការព្រួយបារម្ភដែរថា ខ្លាចក្រែងលោច្បាប់ ដឹកដែកចេញចំនួន ២ពាន់តោនពេលនេះ អាចនឹងធ្វើឲ្យដែកចាស់ៗ ដែលមានចំនួនសរុប ប្រមាណពីជាង ៤០០០តោន (បួនពាន់តោន) ទៅ ៥០០០តោន (ប្រាំពាន់តោន) នៅក្នុងស្ថានីយ៍រថភ្លើងទាំង ២កន្លែងនោះ បាត់អស់ទៅជាមួយគ្នា ទៅតាមពេលវេលា ដ៍អាថ៌កំបាំងផងដែរ ។ ក្រៅពី បញ្ហាខាងលើ ក៍មានការព្រួយបារម្ភទៀតថា ខ្លាចក្រែងលោអ្នកដេញថ្លៃបាន អាចនឹងឃុបឃិតគ្នាជាលក្ខណៈប្រព័ន្ធ ជាមួយក្រុមមន្ត្រីៗផ្នែកជញ្ជីងថ្លឹង ដើម្បីគៃបំបាត់ភ្នែកជញ្ជីង បំភាន់តួលេខពិតប្រាកដ នៃចំនួនដែកដែលមាន និងដែកដែលត្រូវដឹកចេញ… ធ្វើឲ្យរឿងនេះក្លាយទៅជាវប្បធម៌ដដែលៗ បណ្ដាលឲ្យរដ្ឋត្រូវប្រឈមមុខនឹង ការខាតបង់ចំណូលថវិកាជាតិ ជាបន្តទៀតឥតឈប់ឈរ ។ ឯផលប្រយោជន៍លុយកាក់ យ៉ាងច្រើនក្រាស់ក្រែល ដែលជាទ្រព្យសម្បត្តិរដ្ឋ បែរជាត្រូវធ្លាក់ទៅចូលក្នុងហោប៉ៅ របស់ពួកមន្ត្រីៗពុករលួយ ឡេមឡឺមមួយក្ដាប់តូច ជាមួយពួកឈ្មួញឯកជនទៅវិញ ។
ដើម្បីធ្វើឲ្យការលក់-ទិញ ដែកចាស់ៗរាប់ពាន់តោន នៅស្ថានីយ៍រថភ្លើងភ្នំពេញ និងក្រុងព្រះសីហនុ ត្រូវធ្វើឡើងដោយមានតម្លាភាព គួរជាទីជឿទុកចិត្តបាននោះ សាធារណជន បានសំណូមពរថា សូមឲ្យឯកឧត្តម ទេសរដ្ឋមន្ត្រី ឱម យ៉ិនទៀង ជាប្រធានអង្គភាព ប្រឆាំងអំពើពុករលួយ ត្រូវតែចាត់ការស្រាវជ្រាវ ស៊ើបអង្កេតករណីនេះជាបន្ទាន់ ដើម្បីជួយបង្ការទប់ស្កាត់ បាតុភាពមិនប្រក្រតី ដែលអាចកើតមានឡើង… ជាពិសេស ត្រូវជួយទប់ស្កាត់មិនឲ្យ មានការដឹកដែកចេញ ដោយមិន
មានការថ្លឹង ពីមន្ត្រីៗជំនាញឲ្យបានត្រឹមត្រូវ ទៅតាមស្ដង់ដារនោះឲ្យសោះ ។ ក្នុងនោះ បើអាចនឹងរកឃើញថា មានការជាប់ពាក់ព័ន្ធនឹង ការប្រព្រិត្តអំពើពុករលួយ ត្រូវតែចាត់ការដាក់ទណ្ឌកម្ម ឲ្យធ្ងន់ធ្ងរបំផុតទៅលើមន្ត្រីៗ ខិលខូចមួយក្ដាប់តូចទាំងនោះ ឲ្យស្របទៅតាមការ ប្ដេជ្ញាចិត្តខ្ពស់របស់ រាជរដ្ឋាភិបាលកម្ពុជា ក៍ដូចជាអង្គភាព ប្រឆាំងអំពើពុករលួយ ដើម្បីបន្តផ្ដល់ទំនុកចិត្ត ចំពោះប្រជាពលរដ្ឋគ្រប់ៗរូប ។ ជុំវិញព័ត៌មានទាំងនេះ គេហទំព័រយើង បានព្យាយាមទាក់ទង សុំការបំភ្លឺពី
អ្នកគ្រប់គ្រង ស្ថានីយ៍រថភ្លើងទាំង២កន្លែង និងអ្នកម៉ៅការដេញថ្លៃ បានដែកទាំងនោះ ព្រមទាំងមន្ត្រីនៅក្រសួងសេដ្ឋកិច្ច និងហិរញ្ញវត្ថុផងដែរ… តែមិនអាចទំនាក់ទំនង បាននៅឡើយទេ ។ គេហទំព័រយើង នៅរង់ចាំស្វាគមន៍នូវការបំភ្លឺ ពីអ្នកពាក់ព័ន្ធទាំងនោះគ្រប់ពេល…។ កន្លងមក សម្ដេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រី ប្រកបដោយគតិបណ្ឌិត នៃព្រះរាជាណាចក្រកម្ពុជា ក៍ដូចជាឯកឧត្តម ទេសរដ្ឋមន្ត្រី ឱម យ៉ិនទៀង ប្រធាន អង្គភាព ប្រឆាំងអំពើពុករលួយ តែងតែបានមានប្រសាសន៍ អប់រំទូន្មានផង អំពាវនាវផង និងព្រមានដោយត្រង់ៗផងថា សូមឲ្យមន្ត្រីៗរាជការ ជាពិសេសមន្ត្រីៗ ដែលមានតួនាទីសំខាន់ៗ ត្រូវតែនាំគ្នាឈប់ប្រព្រិត្ត អំពើពុករលួយជាបន្ទាន់… បើនៅតែចចែសរឹងរូស… នឹងត្រូវទទួលទោសទណ្ឌតាមច្បាប់ ដោយចៀសមិនរួចឡើ់យ ។
តែទោះបីយ៉ាងនេះក្ដី រហូតមកដល់សព្វថ្ងៃ គេបានសង្កេតឃើញថា នៅតែមានមន្ត្រីៗ ខិលខូចមួយក្ដាប់តូច ហ៊ានប្រព្រិត្តផ្គើននឹង ការអំពាវនាវទាំងនេះដដែល ដោយមិនមានការខ្លាចរអា ឬក៍ព្រឺរោមអ្វីទាល់តែសោះ…។ ប្រជារាស្ត្រ ប្រជាពលរដ្ឋ ប្រជាជនម្ចាស់ឆ្នោត នៅរង់ចាំមើលថា តើសម្ដេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រី ប្រកបដោយគតិបណ្ឌិត នៃព្រះរាជាណាចក្រកម្ពុជា និងឯកឧត្តម ទេសរដ្ឋមន្ត្រី ឱម យ៉ិនទៀង ប្រធានអង្គភាព ប្រឆាំងអំពើពុករលួយ
ព្រមទាំងថ្នាក់ដឹកនាំជាន់ខ្ពស់ នៃក្រសួងសេដ្ឋកិច្ច និងហិរញ្ញវត្ថុ ដែលមានឯកឧត្តម អូន ព័ន្ធមុនីរ័ត្ន ជារដ្ឋមន្ត្រីឡើងថ្មី (ជំនួសឯកឧត្តម គាត ឈន់ ) អាចនឹងមានចំណាត់ការ បានទាន់ពេលវេលាដែរឬទេ ពាក់ព័ន្ធនឹងការឃុបឃិតគ្នា ជាលក្ខណៈប្រព័ន្ធ ក្នុងការដាក់ឲ្យដេញថ្លៃ ដែកចាស់ៗនៅស្ថានីយ៍ រថភ្លើងទាំង២កន្លែងខាងលើនោះ…? គេហទំព័រយើង កំពុងតាមដានព័ត៌មាននេះ យ៉ាងយកចិត្តទុកដាក់បំផុត ដើម្បីយកមកសរសេរ បង្ហោះផ្សាយឆាប់ៗនេះទៀត… ៕ ដោយ៖ ឥន្ទ្រីយ៍ ទេព (រក្សាសិទ្ធិ ហាមចម្លង ផ្សព្វផ្សាយបន្ត) 
