កំពង់ស្ពឺ ៖ មុខសញ្ញាចែកចាយគ្រឿងញៀនម្នាក់ត្រូវបានកងរាជអាវុធហត្ថ ស្រុកសំរោងទង ធ្វើការឃាត់ខ្លួនដកហូតថ្នាំញៀន ២កញ្ចប់តូច និងបក្ខពួកម្នាក់ទៀតរត់គេចខ្លួនបាត់សមត្ថកិច្ចកំពុងស្រាវជ្រាវបន្ត ។
ការបង្ក្រាបមុខសញ្ញាជួញដូរគ្រឿងញៀនខាងលើធ្វើឡើង កាលពីវេលាម៉ោង ១១ និង ៣០នាទីថ្ងៃត្រង់ ថ្ងៃទី ២០ ខែមករា ឆ្នាំ២០១៧ តាមបណ្តោយផ្លូវជាតិលេខ៤៤ ក្នុងភូមិបៀតសូរ ឃុំខ្ទុំក្រាំង ស្រុកសំរោងទង ខេត្តកំពង់ស្ពឺ ។
លោកវរ:សរនីយ៍ត្រី វិន ឡេងហួង មេបញ្ជាការ កងរាជអាវុធហត្ថ ស្រុកសំរោងទងប្រាប់ថា ដោយមានការសង្ស័យមានមុខសញ្ញាជាក្រុមចែកចាយគ្រឿងញៀនធ្វើសកម្មភាពលក់ថ្នាំញៀនកំលាំងដើតល្បាតតាមគោលដៅក្នុងនោះប្រទះឃើញបានឃាត់ខ្លួនបានម្នាក់ ហើយបក្ខពួកវាម្នាក់ទៀតបានជិះម៉ូតូគេចខ្លួនបាត់ ។ លោកបន្តថា ក្រោយពីឃាត់ខ្លួនសមត្ថកិច្ចដកហូតបានម្សៅក្រាមពណ៌សរចំនួន ០២កញ្ចប់តូច និងទូរស័ព្ធចុចពិល ០១គ្រឿង ។
លោកបន្តថា ជនសង្ស័យមាន ឈ្មោះខុម វុទ្ធី ភេទប្រុស អាយុ ២៥ឆ្នាំ នៅភូមិបៀតសូរ ឃុំខ្ទុំក្រាំង ស្រុសំរោងទង និងបក្ខពួកម្នាក់ទៀតរត់បាត់ ។ លោកបន្តថា មុខសញ្ញាដែលឃាត់ខ្លួនសមត្ថកិច្ចកំពុងធ្វើការសាកសួរ និងស្រាវជ្រាវបន្តទៀត ។
បច្ចុប្បន្នជនសង្ស័យត្រូវបានសមត្ថកិច្ចរៀបចំកសាងសំណុំរឿងដើម្បីបញ្ជូនទៅកាន់តុលាការចាត់ការតាមផ្លូវច្បាប់ ។
