ភ្នំពេញ ៖ បុរស២នាក់បានរងរបួសធ្ងន់ធ្ងរ ខណៈពេលស្រវឹងស្រាជោកជាំហើយជិះម៉ូតូវេវអាល់ហ្វា ពណ៌ទឹកប្រាក់ មួយគ្រឿងក្នុងល្បឿនលឿនដូចហោះបញ្ច្រាស់ផ្លូវជ្រុលទៅបុកនិងសរបេតុងមួយដើមដែលទុកចោលលើផ្លូវ កាលពីវេលាម៉ោង១និង២០នាទីរំលងអាធ្រាត្រឈានចូលថ្ងៃទី៦ខែ
មិថុនាឆ្នាំ២០១៤ ត្រង់ចំណុចមុខផ្សារទំនើបសុវណ្ណា តាមបណ្ដោយផ្លូវលេខ២៧១ ស្ថិតក្នុងសង្កាត់ទំនប់ទឹក ខណ្ឌចំការមន។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុ មានបុរស២នាក់បានជិះម៉ូតូមួយគ្រឿងម៉ាកហុងដាវេវអាល់ហ្វា ពណ៌ទឹកប្រាក់ ពាក់ស្លាកលេខ បន្ទាយមានជ័យ 1G-9653 ជិះធ្វើដំណើរតាមបណ្ដោយផ្លូវលេខ២៧១ ទិសដៅពីត្បូងទៅជើង បញ្ច្រាស់ទិស ក៏បានបុកសរសបេតុងមួយដើមដែលគេទុលចោលនៅលើផ្លូវបណ្ដាលអោយដួលបោកនិងថ្នល់រងរបួសធ្ងន់។ បន្ទាប់ពីកើតហេតុសមត្ថកិច្ចមូលដ្ឋានបានចុះមកអន្តរាគមន៍ ហើយម្ចាស់ផ្ទះដែលដឹងខ្លួនខុសព្រោះបាន គ្រឿងសំណង់ដាក់ចូលចំណីផ្លូវ ទើបបង្កអោយជនរងគ្រោះជួបគ្រោះថ្នាក់បែបនេះ ហើយម្ចាស់ផ្ទះក៏បានអោយលុយចំនួន៣០០ដុល្លារដល់ជនរងគ្រោះដើម្បីព្យាបាលរបួសនិងជួសជុលម៉ូតូដើម្បីបញ្ចប់រឿង ហើយជនរងគ្រោះក៏យល់ព្រមទទួលសំណងនិងបានទៅមន្ទីរពេទ្យខ្មែរសូវៀតដើម្បីព្យាបាលរបួស៕
