ក្រុងកៀវៈ អាជ្ញាធរអ៊ុយក្រែន រៀបរាប់កាលពីថ្ងៃទី៤ មិថុនា ថា ពួកឧទ្ទាមបំបែកខ្លួននិយមដល់ទៅជាង៣០០នាក់ ស្លាប់អំឡុងការវាយលុកទ្រង់ទ្រាយធំមួយរបស់រដ្ឋាភិបាលនៃប្រធានាធិបតីអ៊ុយក្រែនថ្មីលោក ប៉េត្រូ ប៉ូរ៉ូឆេនកូ (Petro Poroshenko) ប្រឆាំងពួកបំបែកខ្លួននិយមស្និទ្ធរុស្ស៊ីនៅភាគខាងកើតប្រទេសនាក្រុងស្លាវយ៉ានស្ក៍ (more than 300 rebel fighters had been killed and about 500 wounded in fierce fighting in the past 24 hours in and near the city of Slaviansk,) ។
នេះបើតាមវេបសាយបរទេសផ្សាយនៅថ្ងៃទី៥ ខែមិថុនា ឆ្នាំ២០១៤នេះ។ យោងតាមអ្នកនាំពាក្យរបស់ប្រតិបត្តិការប្រឆាំង ភេរវកម្មបើកធ្វើដោយរដ្ឋាភិបាល លោក វ្វ្លាឌីស្លាវ សេលេសនីយ៉ូវ ( the government forces spokesman, Vladyslav Seleznyov )ថា យុទ្ធជនឧទ្ទាមជាង៣០០នាក់ ត្រូវស្លាប់ និងប្រមាណជា៥០០នាក់ទៀតត្រូវរបួស ក្នុងការប្រយុទ្ធគ្នាយ៉ាងស្វិតស្វាញនានារយៈពេល២៤ ម៉ោងចុងក្រោយនេះក្នុងទីតាំងរបស់ពួកបំបែកខ្លួននៅក្រុងស្លាវយ៉ានស្ក៍ និងតំបន់ជុំវិញក្បែរៗនោះ។
ការប្រយុទ្ធនោះ ខាងកងទ័ពអ៊ុយក្រែនបាត់បង់ទាហាន២នាក់ ហើយទាហាន៤៥នាក់ទៀតត្រូវរបួស ។ ពួកបំបែកខ្លួននិយមពុំទាន់ប្រកាសពីតុល្យការផ្ទាល់របស់ពួកគេ ក្នុងពេលភ្លាមៗឡើយ ក្រោយការប្រយុទ្ធគ្នាយ៉ាងសាហាវកាលពីថ្ងៃទី៣ មិថុនា ដែលកងទ័ពរដ្ឋាភិបាលប្រើប្រាស់កងយន្តហោះ ឧទ្ធម្ភាគចក្រប្រយុទ្ធ និងកាំភ្លើងធំប៉ុនប៉ងកម្ចាត់ពួកបំបែកខ្លួននិយមដែលត្រួតត្រាក្រុងស្លាវយ៉ានស្ក៍ តាំងពីដើមខែមេសាមកម្ល៉េះ ។
ប៉ុន្តែ អ្នកនាំពាក្យក្រុមឧទ្ទាមបំបែកខ្លួន នាងស្តេឡា ខូរ៉ូស្ហេវ៉ា ( A spokeswoman for the rebels, Stella Khorosheva) បាននិយាយថា ការប្រយុទ្ធកាលពីរាត្រីកន្លងទៅនេះពិតជាមានមនុស្ស ស្លាប់ច្រើនកើនឡើងមែន តែមិនទាន់ដឹងពីចំនួនពិតប្រាកដនៅឡើយទេ។
លោកប្រធានាធិបតីអ៊ុយក្រែន ទើបជាប់ឆ្នោតថ្មី ប៉េត្រូ ប៉ូរ៉ូឆេនកូ (President-elect Petro Poroshenko )បាននិយាយថា កម្លាំងរដ្ឋាភិបាលបានបើកការវាយប្រហារលើកងកម្លាំងឧទ្ទាមដែលគាំទ្ររុស្ស៊ី ហើយក្នុងនោះក៏មានកងកម្លាំងរុស្ស៊ីចូលរួមគាំទ្រពួកគេដែរ ប៉ុន្តែ អាជ្ញាធរក្រុងម៉ូស្គូ បានបដិសេធ ហើយទទូចឲ្យអាជ្ញាធរក្រុងកៀវបញ្ឈប់ការប្រយុទ្ធ៕
