បាកដាដៈ មនុស្សយ៉ាងតិច៣១នាក់បានត្រូវស្លាប់ ហើយ៤៦នាក់ទៀតបានត្រូវរបួសក្នុងអំពើហិង្សាថ្មីៗ កាលពីថ្ងៃទី៣ មិថុនា នៅកន្លែងផ្សេងៗគ្នាក្នុងប្រទេសអ៊ីរ៉ាក់ នេះបើតាមប្រភពព័ត៌មានប៉ូលិសរាយការណ៍ ហើយត្រូវបានវេបសាយបរទេសផ្សាយកាលពីថ្ងៃពុធ។
តាមប្រភពព័ត៌មាននេះ ក្នុងខេត្តអានបា (Anbar) មានមនុស្ស១៥នាក់ស្លាប់ ហើយ៤០នាក់ទៀតត្រូវរបួសក្នុងទីក្រុងហ្វាល់លូចា (Fallujah) ទីប្រជុំជនខេត្ត ស្ថិតនៅចម្ងាយប្រមាណ៥០គីឡូម៉ែត្រ ខាងលិចក្រុងបាកដាដ (Baghdad) ដែលស្ថិតក្រោមការត្រួតត្រារបស់ពួកបះបោរ។ នៅទីនោះសង្កាត់ជាច្រើនរងការវាយប្រហារតាមអាកាស និងការបាញ់កាំភ្លើងធំ និងកាំភ្លើងត្បាល់ (airstrikes, artillery and mortar shelling struck) ។
សូមបញ្ជាក់ថា បេសកកម្មជំនួយ អ.ស.ប សម្រាប់អ៊ីរ៉ាក់ MANUI បានឲ្យដឹងថា ជនជាតិអ៊ីរ៉ាក់ដល់ទៅ៨.៨៦៨នាក់ ក្នុងនោះមានជនស៊ីវិល៧.៨១៨នាក់ត្រូវស្លាប់ដោយអំពើហិង្សាក្នុងឆ្នាំ២០១៣ ។ នៅក្នុងខែឧសភា ២០១៤ មនុស្សសរុប៧៩៩នាក់បានត្រូវស្លាប់ ហើយ១.៤០៩នាក់ទៀតត្រូវរបួសដោយសារការវាយប្រហារនានានៅទូទាំងអ៊ីរ៉ាក់។
ជាក់ស្តែងគ្រាន់តែរយៈពេល១ថ្ងៃសោះ គឺកាលពីថ្ងៃទី៣០ ខែឧសភា មនុស្ស៥៤នាក់បានស្លាប់ដោយការបំផ្ទុះគ្រាប់បែកអត្តឃាត រថយន្តអត្តឃាត និងការវាយប្រហារដោយកាំភ្លើងធំ ៕ 
