ភ្នំពេញ ៖ រថយន្តពីរគ្រឿងបានបុកគ្នាចំពេញទំហឹងនៅចំណុចផ្លូវបែកជាបួន បណ្តាលអោយរងការខូចខាតយ៉ាងដំណំ ដែលហេតុការណ៍នេះបានកើតឡើងកាលពីវេលាម៉ោង១និង១០នាទីរំលងអាធ្រាត្រឈានចូលថ្ងៃទី៧ខែមិថុនាឆ្នាំ២០១៤ ត្រង់ចំណុចផ្លូវលេខ២០៥កែងផ្លូវលេខ៣៨៤ ស្ថិតក្នុងសង្កាត់ទួលស្វាយព្រៃ២ ខណ្ឌចំការមន។ ប្រភពព័ត៍មានពី
កន្លែងកើតហេតុបានអោយដឹងថា នៅមុនពេលកើតហេតុមានរថយន្តការ៉េមួយគ្រឿងក្បាលរថយន្តពណ៌ខៀវ ពាក់ស្លាកលេខ ភ្នំពេញ 2C-1921 ដឹកសណ្ដែកបណ្ដុះជិះដោយមនុស្ស៤នាក់ ចេញពីម្ដុំចំការដូនយកសណ្ដែកបណ្ដុះមកអោយម៉ូយនៅផ្សារដើមគ ធ្វើដំណើរតាមបណ្តោយផ្លូវលេខ២០៥ ក្នុងទិសដៅពីលិចទៅកើត ខណៈមកដល់ចំណុចកើតហេតុជាផ្លូវកែង ស្រាប់
តែមានរថយន្ដមួយគ្រឿងម៉ាក លុចស៊ីសRX330 ពណ៌ស ពាក់ស្លាកលេខ ខេមរភូមិន្ទ09 2-8886 បើកធ្វើដំណើរដោយបុរស២នាក់ តាមបណ្ដោយផ្លូវលេខ៣៨៤ ទិសដៅពីត្បូងទៅជើង ក៏បុកគ្នាចំពេញទំហឹងនៅចំណុចផ្លូវបែកជាបួន បណ្ដាលអោយរថយន្ដទាំង២គ្រឿងរងការខាតទាំងសងខាង និងស្ត្រីម្នាក់រងរបួសបែកក្បាលនិងដាច់ចេញឈាម។
បន្ទាប់ពីកើតហេតុសមត្ថកិច្ចមូលដ្ឋានបានចុះមកអន្តរាគមន៍ដល់កន្លែងកើតហេតុ ដោយភាគីទាំង២ធ្វើការសម្របសម្រួលគ្នាដោយព្រមយករថយន្តទៅជួសជុលរៀងៗខ្លួន ដើម្បីបញ្ចប់រឿងនៅកន្លែងកើតហេតុ៕
