សៀមរាប : សាប៊ូទឹកក្លែងក្លាយចំនួន៥ប្រភេទមានចំនួន៥៧៥ដបធំ ក្នុងនោះមាន២៥ដបតូចត្រូវបាន លោក វរសេនីយ៍ឯក សឿន សេន នាយការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តសៀមរាបបានដឹកនាំកម្លាំងក្នុងអង្គភាពចុះធ្វើការតាមដានស្រាវជ្រាវនិងឈានដល់ការបង្ក្រាបបាននៅត្រង់ចំណុចខាងក្រោយផ្សារលើធំថ្មី ស្ថិតនៅក្នុងសង្កាត់ ស្លក្រាម ក្រុងសៀមរាប បន្ទាប់ពីសមត្ថកិច្ចបានទទួលពាក្យបណ្តឹងពីក្រុមហ៊ុនសាប៊ូទឹកទាំង៥ប្រភេទនេះថាមានអ្នកក្លែងបន្លំសាប៊ូពិតពីក្រុមហ៊ុនមកដើរលក់នៅក្នុងខេត្តសៀមរាប។
លោក វរសេនីយ៍ឯក សឿន សេន នៅនិងកន្លែងកើតហេតុបានឲ្យដឹងថា បន្ទាប់ពីកម្លាំងជំនាញរបស់លោក បានទទួលព័ត៍មាននិងកំណត់មុខសញ្ញាចំពោះអ្នកដែលដើរលក់នៅផលិទ្ធផលសាប៊ូទឹកក្លែងក្លាយចំនួន៥ប្រភេទមាន៥៧៥ដបធំ ដែលមានពីរក្រុមហ៊ុន បានដាក់ពាក្យបណ្តឹង ដោយក្រុមហ៊ុនទី១ ឈ្មោះ ពេជ្រ ប៊ី យូ ធី និង ទី ២ គិប ស្រ៊ុន នៅរាជធានីភ្នំពេញ នោះទើបជាក់ស្តែងនៅក្នុងអំឡុងម៉ោង១០ព្រឹកថ្ងៃទី០៧ខែមិថុនាឆ្នាំ២០១៤នេះ សមត្ថកិច្ចធ្វើការបង្ក្រាបបានតែម្តង។ ក្នុងនោះដែល តំណាងក្រុមហ៊ុន សាប៊ូ ទាំងពីរ ក្រុមហ៊ុនបានបញ្ជាក់ថា ( ដាក់សម្ភាស ) ។
លោក វរសេនីយ៍ឯក សឿន សេន នាយការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តសៀមរាប បានបញ្ជាក់ដល់អ្នកសារព័ត៍មានឲ្យដឹងទៀតថាដោយអនុវត្តតាមការយកចិត្តទុកជាប្រចាំពីសំណាក់លោក ឩត្តមសេនីយ៍ទោ សត ណាឌី ស្នងការនគរបាលខេត្តសៀមរាបក៏ដូចជាដើម្បីធ្វើឲ្យការអនុវត្តនូវគោលនយោបាយភូមិឃុំ មានសុវត្តិភាព ឲ្យកាន់តែមានតម្លាភាពនោះបើទោះបីជាជនខិលខូចបានប្រើគ្រប់រូបភាពបែបណាក៏ដោយក្នុងការប្រព្រឹត្តបទសេដ្ឋកិច្ចគ្រប់ប្រភេទនោះក៏មិនអាចរត់គេចពីសមត្ថកិច្ចជំនាញបានឡើយ ។
ដោយលោក បានធ្វើការសំណូមពរនិងអំពាវនាវដល់ប្រជាពលរដ្ឋទាំងអស់មុននិងទិញគ្រឿងឩបភោគ បរិភោគ ក៏ដូចជា សម្ភារ: ប្រើប្រាស់ផ្សេងៗត្រូវធ្វើការត្រួតពិនិត្យអំពីគុណភាពទំនិញនិងការបរិច្ឆេទ និងពិនិត្យមើលរូបសញ្ញាក្រុមហ៊ុនឲ្យបានត្រឹមត្រូវ ជៀសវាងកុំឲ្យចាញ់បោកជនខិលខូចដែលតែងតែដើរធ្វើសកម្មភាពលក់នូវផលិទ្ធផលក្លែងក្លាយពីក្រុមហ៊ុន ដែលវាអាចធ្វើឲ្យមានផលប៉ះពាល់ដល់សុខភាពនិងឈានដល់ប្រតិកម្មនិងបាត់បង់អាយុជីវិតថែមទៀតផង ៕ ដោយ លោក ខេង ខេមរា 
