ខេត្តរតនគិរី:ប្រជាពលរដ្ឋចំនួន៣គ្រួសារដែលទទួលរងអគ្គីភ័យឆាបឆេះផ្ទះ បានទទួលអំណោយពីអាជ្ញាធរសង្កាត់ សប្បុរសជនACក្នុងមូលដ្ឋាន។លោក ទុន ពៅ ចៅសង្កាត់កាចាញ និងនគរបាល ប៉ុស្ថ៍ ព្រមទាំងសប្បុរសជន នៅព្រឹកថ្ងៃទី១១ ខែមិនា ឆ្នាំ២០១៧នេះ បានចុះពិនិត្យលំនៅដ្ឋានដែលរងការឆាបឆេះ ចំនួន៣ខ្នង ស្មើរនិង៣គ្រួសារ ក្នុងនោះមួយខ្នងត្រូវរងនូវការឆាបឆេះ និងខូចខាតអស់ទាំងស្រុង ។
អំណោយផ្តល់ដល់អ្នករងគ្រោះនៅពេលនោះក្នុងមួយគ្រួសារៗ រួមមាន: អង្ករ៥០គីឡូក្រាម មី១កេស និងគ្រឿងឧបភោគបរិភោគ ចំណែកចវិកា ចំនួន៤០ម៉ឺនរៀលដែលផ្ទះមួយខ្នងបានឆេះទាំងស្រុង ចវិកា១៥ម៉ឺនរៀលនិង១០ម៉ឺនរៀលបានទៅលំនៅដ្ឋានដែលអមសងខាង។
គួរបញ្ជាក់ផងដែរថា កាលពីថ្ងៃទី១០ ខែមិនា ឆ្នាំ២០១៧ មានអគ្គីភ័យមួយបានកើតឡើង បណ្ដាលឲ្យផ្ទះមួយខ្នងឆេះអស់ទាំងស្រុង ២ខ្នងទៀត ដែលនៅសងខាងក៏ទទួលរងការឆេះមួយចំនួនធំផងដែរ។ មូលហេតុដែលនាំអោយមានអគ្គីភ័យនេះកើតឡើង ដោយសារតែបុរសដែលមានខ្នងផ្ទះនៅកណ្តាល បានដាំបាយសម្រាប់វិចខ្ចប់ទៅចំការ ប៉ុន្តែក្រោយដាំបាយរួច គាត់បានពន្លត់ភ្លើងក្នុងចង្រ្កាននោះដែរ តែមិនដឹងថាភ្លើងនោះរលត់មិនទាន់អស់ ទើបបណ្ដាលឲ្យឆេះឡើង ក្រោយពេលដែលពួកគាត់នាំក្រុមគ្រួសារទៅចំការអស់ សូម្បីអ្នកជិតខាងមិនអាចជួយពន្លត់បានឡើយ មិនតែប៉ុណ្ណោះអគ្គីភ័យបានឆេះរាលដាលដល់ផ្ទះអមសងខាងរបស់គាត់ទៀត ប៉ុន្តែមិនខូចខាតទាំងស្រុងនោះទេ។
មិនមានការបញ្ជាក់ថា តើការខូចខាតអំពីអគ្គីភ័យនេះ មានទំហំប៉ុន្មានោះទេ គ្រាន់តែបញ្ជាក់ថា សូម្បីតែអត្តសញ្ញាណប័ណ្ណ និង កន្ទុយប័ណ្ណបោះឆ្នោតក៏ត្រូវបានឆេះអស់ទាំងស្រុងផងដែរ។
លោក ទុន ពៅ ចៅសង្កាត់កាចាញ ក្នុងឪកាសផ្តល់អំណោយនាព្រឹកថ្ងៃទី១១ ខែមិនានេះមានប្រសាសន៍ថា អំណោយដែលផ្តល់ជាបឋមនេះ គឺបានមកពីការគៀងគរពីអាជ្ញាធរក្នុងមូលដ្ឋាន សប្បុរសជនក្នុងមូលដ្ឋាន។
លោកថា នឹងអំពាវនាវទៅកាកបាតក្រហម ដើម្បីផ្តល់អំណោយបន្ថែមទៀតនាពេលក្រោយ។
លោក ទុន ពៅ បានអំពាវនាវដល់ប្រជាពលរដ្ឋ សូមអោយមានការប្រុងប្រយ័ត្នខ្ពស់ ចំពោះអគ្គីភ័យដែលកើតឡើងជាយថាហេតុ ដែលបណ្តាលមកពីការធ្វេសប្រហែស ជាពិសេសក្នុងរដូវក្តៅបច្ចុប្បន្ននេះ។
អំណោយបឋម បន្ទាន់ភ្លាមៗ ពីអាជ្ញាធរមូលដ្ឋាននេះ ត្រូវគេសម្លឹងឃើញថា បានជម្រុញឲ្យប្រពលរដ្ឋក្នុងមូលដ្ឋានមានភាពកក់ក្ដៅ ព្រមទាំងពួកគាត់បានថ្លែងអំណរគុណ ថា បើទោះជាពួកគាត់ជួបគ្រោះមហន្តរាយយ៉ាងធ្ងន់ធរយ៉ាងនេះក្ដី ក៏ពួកគាត់នៅមានថ្នាក់ដឹកនាំរបស់រាជរដ្ឋាភិបាល នៅយកចិត្តទុកដាក់ និងមិនទុកឲ្យពួកគាត់រងទុកវេទនានោះទេ៕តាជួង
