សៀមរាប:ក្រោយពីតុលាការអនុវត្តដីកាដោយជោគជ័យ កាលថ្ងៃទី៤ ខែមិថុនា ឆ្នាំ២០១៤ កន្លងទៅថ្មីៗនេះប្រជាពលរដ្ឋមួយគ្រួសារដែលចាញ់ក្តីបានលើកដៃសំពះដល់ប្រមុខរាជរដ្ឋាភិបាលកម្ពុជាជាពិសេសសម្ដេចតេជោហ៊ុនសែននិងសម្ដេចកត្តិព្រឹត្ធបណ្ឌិតប៊ុនរ៉ានីហ៊ុនសែនសូមជួយរកយុត្តិធ៌មជូនដល់ពួកគាត់ផងក្នុងនោះ បានលើកឡើងថា អាជ្ញាធរឃុបឃិត លួចធ្វើប្លង់ដីរបស់ខ្លួន ឲ្យភាគីម្ខាង។
ឈ្មោះ មាន ម៉ារឌី ហៅ ចិត្ត ជាកូនប្រុសលោក អ៊ូ ជឿន ភាគីចាញ់ក្តី បានឲ្យដឹងថា ដីដែលគ្រួសារខ្លួនរស់នៅ បានចាប់មានទំនាស់ នៅថ្ងៃទី២២ ខែសីហា ឆ្នាំ២០១៣។ ក្រោយមានទំនាស់ តុលាការបានចុះអនុវត្តដីកាចំនួនបីដងមកហើយ តែមុនថ្ងៃទី៤ ខែមិថុនា ឆ្នាំ២០១៤ តុលាការបានយកដីកាបង្គាប់ឲ្យអនុវត្តដោយស្ម័គ្រចិត្ត មកឲ្យគ្រួសាររបស់ខ្លួន រុះរើរបងក្រាក់ និងរោងសង្ក័សីចេញ ពីដីរបស់ខ្លួន (ដីទំនាស់) ក្នុងរយៈពេល ៧ថ្ងៃ បើមិនដូច្នេះទេ តុលាការចុះរុះរើ ដោយមិនទទួលរាល់ការខូចខាត ឬបាត់បង់ផ្សេងៗ។
ដោយខ្លាចអំណាចដីកាគ្រួសារខ្លួន បានរុះរើខ្លួនឯង។ លោកមានម៉ារឌីបន្ថែមថា ប៉ុន្តែនៅព្រឹកថ្ងៃទី៤មិថុនា ពេលតុលាការចាកចេញពីកន្លែងកើតហេតុ ក្រោយធ្វើកំណត់ហេតុចប់ ស្ត្រីមានអំណាច ជាប្រពន្ធលោក ហង្ស សុវណ្ណា ដែលជាភាគីជម្លោះ បានឲ្យកូនចៅរបស់ខ្លួនច្រើននាក់ មកដកបង្គោលក្រាក់ ដែលបោះកំណត់ព្រំដីរបស់ខ្លួនចោល មិនតែប៉ុណ្ណោះស្ត្រីមានអំណាចរូបនោះ បានទូរសព្ទ័ហៅមន្ត្រីតុលាការឲ្យមកចង្អុល បញ្ជាឲ្យរុះរើផ្ទះបាយរបស់ខ្លួនទៀត តែត្រូវបានរារាំង ព្រោះខុសពីក្នុងដីការ។ ម៉ារឌី បាននិយាយថា ការដែលស្ត្រីខាងលើបញ្ជាមន្ត្រីតុលាការបានតាមចិត្ត បញ្ជាក់ឲ្យឃើញថា ពិតជាអ្នកមានអំណាច។ ស្ត្រីនោះ ដំបូងឡើយ បានសុំដីគេនៅ ទីបំផុតគាត់ប្តឹងយកដីរបស់គេ ដោយជោគជ័យ តាមរយៈឃុបឃិត ជាមួយអាជ្ញាធរភូមិឃុំ លួចធ្វើប្លង់ស្ងាត់ៗ ទាំងម្ចាស់ កំពុងរស់នៅ។
យុវជនដដែលរៀបរាប់ថា គ្រួសារខ្លួន បានកាន់កាប់ដីទំនាស់នេះ ចាប់តាំងពីឆ្នាំ១៩៨៣ ហើយនៅឆ្នាំ១៩៨៦ ម្តាយរបស់លោក ហង្ស សុវណ្ណា បានមកសុំគ្រួសារគាត់ ជ្រកកោន ដោយសុំធ្វើផ្ទះនៅ ចាប់ពីពេលនោះមក ការរស់នៅជាធម្មតា ពុំមានទំនាស់អ្វីទេ។ លុះថ្ងៃទី២២ ខែសីហា ឆ្នាំ២០១៣ ក៏ស្រាប់តែប្រពន្ធលោក ហង្ស សុវណ្ណា នាំកូនចៅជាច្រើននាក់ មករុះរើរបង ដោយចោទថា ធ្វើលើដីរបស់គេ ដែលមានប្លង់។ តាមពិតប្លង់នោះ ទើបតែធ្វើនៅខែមេសា ឆ្នាំ២០១៣ គឺលួចធ្វើ ដើម្បីប្តឹងយកដី ដែលធ្លាប់សុំគេជ្រកកោន។ យុវជននោះបញ្ជាក់ថា ចាប់ពីពេលនោះមក ក៏មានការប្តឹងផ្តល់រហូត ហើយតុលាការបានចុះមកអនុវត្តឲ្យរុះរើរបង និងរោងជាបន្តបន្ទាប់ តែស្ថាប័នច្បាប់ ហាក់ដូចមិនស៊ើបប្រវត្តិរឿងសោះ បែរជាកាត់ក្តីឲ្យភាគី ធ្លាប់សុំដីជ្រកកោន ឈ្នះទៅវិញ។
លោកមានម៉ារឌីថា ក្រោយមានការប្តឹងផ្តល់គ្នា ភាគីជម្លោះ ដែលអាងអំណាច តែងធ្វើសកម្មភាពរំលោភបំពាន មកលើគ្រួសាររបស់គេជាបន្តបន្ទាប់ ជាក់ស្តែង កាលថ្ងៃទី១៥ ខែមិនា ឆ្នាំ២០១៤ គេបានយកឡាន ឡង់គ្រីស័រ ១គ្រឿង មកចតបិទច្រកចូលផ្ទះ បង្ខាំងមនុស្សមួយគ្រួសារ មិនឲ្យមានច្រកចេញចូល។
ទោះបីជាសុំអន្តរាគមន៍ពីអាជ្ញាធរ និងសមត្ថកិច្ចគ្រប់ជាន់ថ្នាក់ ក៏ពុំមាននណាម្នាក់ ហ៊ានយកឡាននោះចេញដែរ ប៉ូលិស រាប់ពីថ្នាក់តូចដល់ថ្នាក់ធំ ពេលមកដល់ឃើញហេតុការណ៍ បានត្រឹមគ្រវីក្បាល ក៏ត្រឡប់ទៅវិញអស់។ លុះពាក់កណ្តាលយប់ថ្ងៃទី១៦ ដោយឃើញភាពអយុត្តិធម៌ ប៉ូលិសទូទាំងខេត្តសៀមរាប គ្មានសមត្ថភាពដោះស្រាយ ពលរដ្ឋរស់នៅក្បែរខាង និងពលរដ្ឋ ដែលធ្វើដំណើរតាមផ្លូវ បាននាំគ្នាជួយលើកឡាននោះយកទៅដាក់កណ្តាលថ្នល់ បណ្តាលឲ្យកកស្ទះចរាចរណ៍ពេញថ្នល់ ទើបប៉ូលិស ហ៊ានទៅយកឡាននោះចេញ។
តាមពិតដោយសារឡាននោះ ជាឡានលោក ហង្ស សុវណ្ណា អតីតអ្នកគ្រប់គ្រងសណ្ឋាគារ បុរីអង្គរ បច្ចុប្បន្នគ្រប់គ្រងសណ្ឋាគារ ឡូទុសប្លង់ ជាសណ្ឋាគាររបស់លោក ឃឹម ប៊ុនសុង ចៅហ្វាយខេត្តសៀមរាបដែលទើបនិងកាន់តំណែងថ្មីៗ។ អីចឹងហើយបានជា មិនមានសមត្ថកិច្ចណា ហ៊ានអូសឡាននោះ ចេញពីការបិទច្រកបង្ខាំងមនុស្សទេ។
ក្រៅពីរៀបរាប់ និងភ័យខ្លាចពីការបាត់បង់ដី និងផ្ទះ យុវជនរួមទាំងក្រុមគ្រួសារ បានលើកដៃសំពះសុំឲ្យច្បាប់ ពិចារណា និងផ្តល់ភាពយុត្តិធម៌ដល់គ្រួសារគាត់ជាថ្មី ហើយអ្វីដែលកើតមាន ចំពោះក្រុមគ្រួសារខ្លួន គឺសុំឲ្យបានដឹងដល់សម្តេចហ៊ុនសែន និងសម្តេចកត្តិព្រឹទ្ធបណ្ឌិត។ នោះគឺធាតុពិត អ្នកមកសុំដីនៅ ហើយប្តឹងដណ្តើមយកដីម្ចាស់ដើម ព្រោះតែគេមានលុយ និងមានអំណាច។
