សៀមរាប:កម្លាំងនគរបាលប្រឆាំងបទល្មើសសេដ្ឋកិច្ចខេត្ត បានឃាត់ខ្លួនស្ត្រីចំនួន២នាក់ កំពុងចែកចាយផលិតផលសាប៊ូក្លែងក្លាយ នៅក្នុងទីផ្សារក្រុងសៀមរាប ត្រង់ចំណុចផ្សារលើធំថ្មី ផ្នែកខាងក្រោយបញ្ជូនទៅស្ថាប័នតុលាការនៅថ្ងៃស្អែកនេះ។
នាយការិយាល័យនគរបាល ប្រឆាំងបទល្មើសសេដ្ឋកិច្ចខេត្តសៀមរាប លោកវរសេនីយ៍ទោ សឿន សេន បានឲ្យដឹងថា ការឃាត់ខ្លួនស្ត្រី២នាក់ខាងលើ ធ្វើឡើងតាមបញ្ជាលោកស្រីឈួន សុភា ព្រះរាជអាជ្ញារង។ ជនសង្ស័យ ទី១ ឈ្មោះ សៀង ពៅ អាយុ២៤ឆ្នាំ ទី២ ឈ្មោះ គឹម ធីតា អាយុ ២៨ឆ្នាំ ពួកនាងទាំងពីរ មានអាសយដ្ឋានក្រុងភ្នំពេញ។
លោកបញ្ជាក់ថា បន្ទាប់ពីឃាត់ខ្លួន គឺបានដកហូតសាប៊ូដុសខ្លួនក្លែងក្លាយ ៥ប្រភេទចំនួន២៣កេស ស្មើ៥៥០ដបធំនិង២៥ដបតូច។ សាប៊ូក្លែងក្លាយទាំង ៥ប្រភេទ ត្រូវមេខ្លោង ក្លែងបន្លំម៉ាកសញ្ញារបស់ក្រុមហ៊ុនចំនួនពីរ គឺក្រុមហ៊ុន ពេជ្រយូធី និងគិប ស្រុន។ សាប៊ូក្រុមហ៊ុនទាំងពីរខាងលើ ដែលបាននាំចូលពីប្រទេសម៉ាឡេស៊ី គឺបានបង់ពន្ធ ត្រឹមត្រូវ ដោយលក់ចេញ១ដបតម្លៃ១៦០០០រៀល ប៉ុន្តែសាប៊ូក្លែងក្លាយនេះ ក្រុមអ្នកចែកចាយលក់តម្លៃត្រឹមតែ ៨០០០ រៀលប៉ុណ្ណោះ នេះជាការរំលោភកម្មសិទ្ធិបញ្ញាមួយយ៉ាងធំ។
លោកបន្ថែមថា តាមការពិនិត្យ ឡាបូ របស់ជំនាញផលិតផលក្លែងក្លាយនេះ អាចបង្កបញ្ហាសុខភាពស្បែក ដូចជារលាកស្បែក និងបង្កឲ្យមានរោគសើស្បែកជាច្រើនរូបភាព។ ផលិតផលទាំងនេះ គឺត្រូវកំទេចចោល ព្រោះ ពាក់ពន្ធ័ដល់ជីវិតមនុស្ស។ ព្រះរាជអាជ្ញារងអមសាលាដំបូងខេត្តសៀមរាប លោកស្រី ឈួន សុភា ដែលដឹកនាំប្រតិបត្តិការ បានថ្លែង តាមទូរស័ព្ទប្រាប់អ្នកកាសែតថា ជនសង្ស័យទាំងពីរនាក់ចាំបាច់ត្រូវបញ្ជូនទៅតុលាការ។
លោក សឿន សេន បញ្ជាក់កាលពីព្រឹកម៉ិញថា ពួកនាងទាំងពីរនាក់ នឹងត្រូវបញ្ជូនទៅតុលាការនៅថ្ងៃស្អែក បន្ទាប់ពីសាកសួររួចរាល់ ព្រោះជាប់ពាក់ព័ន្ធតាមផ្លូវច្បាប់ ស្តីពី ម៉ាកពាណិជ្ជនាម និងការប្រកួតប្រជែង មិនស្មោះត្រង់ តាមមាត្រា៦៤៕
