ខេត្តកំពង់ធំ : មាត់ស្ទឹងព្រៃប្រស់ កំពុងតែធ្លាក់ក្នុងកណ្ដាប់ដៃឈ្មួញ ឈ្មោះ ក្រុមហ៊ុន វីរៈ ប៊ុនថាំ រំលោភយកចំណីស្ទឹង ដែលជាបឹងធម្មជាតិនេះ យកធ្វើជាកម្មសិទ្ធិផ្ទាល់ខ្លួន ដើម្បីសាងសង់ជាកន្លែង លក់ម្ហូបអាហារ ដោយមិនខ្វល់ពីការ កែលម្អរ និង អភិរក្ស បឹងព្រៃប្រស់របស់រាជរដ្ឋាភិបាល នោះឡើយ។
ប្រជាពលរដ្ឋបានសម្ដែងនូវការសោកស្ដាយយ៉ាងខ្លាំង ខណៈពេលដែលរមណីយដ្ឋានធម្មជាតិតាំងពីដូនតា មួយនេះ ត្រូវបានរំលោភយកពីសំណាក់ ក្រុមហ៊ុនវរៈ ប៊ុនថាំ ដោយផ្អែកទៅលើលិខិត កាន់ កាប់ ដែលចេញដោយអាជ្ញាធរ និងជំនាញពាក់ព័ន្ធ។
លោក អ៊ុន បុត្រ អភិបាលស្រុកកំពង់ស្វាយ ធ្លាប់បានឲ្យដឹងថា បឹងព្រៃប្រស់ ជាបឹងធម្មជាតិស្ថិតនៅខាងលិចស្ពានព្រៃប្រស់ ឃុំត្បែង ស្រុកកំពង់ស្វាយ ខេត្តកំពង់ធំ ម្ចាស់គេមានច្បាប់អនុញ្ញាតពីខេត្តចំណែកលោកមិនធ្លាប់បានចុះហត្ថលេខាលើ លិខិតកាប់កាប់ ដីព្រៃប្រស់នេះទេ ព្រោះលោកទើបតែមកកាន់តំណែងជាអភិបាលស្រុកកំពង់ស្វាយនេះ រយៈពេលខ្លី ចំពោះអ្នកចុះហត្ថលេខាលើដីនេះ គឺលោក អ៊ឹម ថន ជាអភិបាលស្រុក (មុន) ហើយបច្ចុប្បន្នគាត់បានចូលនិវត្តន៍ហើយ។
លោក អ៊ឹម សុឌីណា ប្រធានមន្ទីររៀបចំដែនដីនគរូបនីយកម្ម សុរិយោ និងសំណង់ បានបញ្ជាក់ថា ដីនេះគេមានច្បាប់អនុញ្ញាត ជាកម្មសិទ្ធិ ដែលទទួលស្គាល់លេខក្បាលដីពីប្រធានមន្ទីរមុនឈ្មោះ ឌិត ធន តាំងពីឆ្នាំ២០០៩។
តាមច្បាប់ភូមិបាល បឹងបួរ ស្ទឹង អូរ ប្រឡាយ ទន្លេ រួមទាំងបឹងធម្មជាតិនានា មិនត្រូវបានអនុញ្ញាតិឲ្យជំនាញចេញប័ណ្ណកម្មសិទ្ធិស្របច្បាប់ឲ្យទៅ បុគ្គលណាម្នាក់ឡើយ ប៉ុន្តែបច្ចុប្បន្ននេះ អាចជាអំណាចទឹកប្រាក់ របស់ក្រុមហ៊ុនវរះ
ប៊ុនថាំ ដែលកំពុងចាក់ដីលុប និងសាងសង់រំលោភយកបឹងធម្មជាតិព្រៃប្រស់ សម្រាប់បើកធ្វើអាជីវកម្មជាអាហារដ្ឋានយ៉ាងគឃ្លើន។
មហាជនបានរិះគន់ថា សោភ័ណភាព និងសម្រស់រមណីយដ្ឋាន ព្រៃប្រស់ ដែលជាបឹង ធម្មជាតិត្រូវបានរលាយហិចហោចដោយសា ឈ្មួញឃុបឃិតគ្នាជាមួយមន្ត្រីអាជ្ញាធរដៃដប់ជើងម្ភៃមួយចំនួន។ ទោះជាដីទីតាំងដីខាងលើជាដីកម្មសិទ្ធិក៏ដោយ វាបានប៉ះពាល់យ៉ាងធ្ងន់ធ្ងរ ដល់ទិដ្ឋភាព និងសោភ័ណភាពរមណីយដ្ឋាន ដូច្នេះក្រសួងទេសចរណ៍ និងអាជ្ញាធរ ខេត្តកំពង់ធំ រួមទាំងមន្ទីរពាក់ព័ន្ធ គួរតែពិចារណាឡើងវិញ។
គួររំលឹកថា ក្នុងតំណែងជាទេសរដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ លោក ជា សុផារ៉ា បានគិតគូរខ្ពស់ការពារផល់ប្រយោជន៍កម្មសិទ្ធិគ្រប់គ្រងដីស្របច្បាប់ របស់ប្រជាពលរដ្ឋ ក្នុងនោះលោកទាំងធ្លាប់ព្រមានផងដែរ និងដាក់ក្នុងបញ្ជីខ្មៅរាល់ទង្វើណា មានការរំលោភយកដីប្រជាពលរដ្ឋដីរបស់រដ្ឋ។ ថ្មីៗនេះឧញ៉ា ឡោក ហួរ មេឈ្មួញរំលោភយកដីប្រជាពលរដ្ឋរំលោភយកបឹងធម្មជាតិ រំលោភយកដីអតីតឡូត៍នេសាទនៅស្រុកកៀនស្វាយ មិនត្រឹងតែលោក ម៉ៅ ភិរុណ អភិបាល នៃគណៈអភិបាលខេត្តកណ្តាលចេញលិខិតបញ្ជាឲ្យបញ្ឈប់សម្មភាពនិងតម្រូវ អាជ្ញាធរស្រុកឧញ៉ា ឡោក ហួរ ប៉ុណ្ណោះទេ សូម្បីតែលោកទេសរដ្ឋមន្ត្រី ជា សុផារ៉ា ក៏បានចាត់ទុកឧញ៉ា ឡោក ហួរ នៅក្នុងបញ្ជីខ្មៅ ករណីរំលោភយកដីបឹងនោះដែរ។
ករណីនៅខេត្តកំពង់ធំ ប្រសិនបើអាជ្ញាធរខេត្តមិនមានវិធានការទប់ស្កាត់ទេនោះ ប្រជាពលរដ្ឋមានរំពឹងទៅលើទេសរដ្ឋមន្ត្រី និងចាត់មន្ត្រីជំនាញពិនិត្យ ដើម្បីទប់ស្កាត់រក្សាការពារ អភិរក្សបឹងធម្មជាតិព្រៃប្រស់ ទុកជាសម្បត្តិធម្មជាតិ របស់រដ្ឋ ហើយក៏ជាទីតាំងដែលប្រជាពលរដ្ឋទទួលស្គាល់ទាំងអស់គ្នាតាំងពីដូនតា នោះមកដែរ៕ ដោយ ប៊ុន រិទ្ធី
