ភ្នំពេញ ៖ ម៉ូតូ២គ្រឿងមួយគ្រឿងម៉ាកហុងដាឃ្លិក និងមួយគ្រឿងទៀតម៉ាកឆាលី បានបុកគ្នានៅ កណ្ដាលផ្លូវហើយម្ចាស់រងរបួសរៀងៗខ្លួនហើយក៏ត្រូវគេបញ្ជូនទៅសង្គ្រោះនៅមន្ទីរពេទ្យភ្លាម គ្មានអ្នកនៅមើលម៉ូតូឡើយ ដោយព្រោះតែសមត្ថកិច្ចយឺតយ៉ាវចុះអន្តរាគមន៍។
ហេតុការណ៍នេះបានកើតឡើងកាលពីវេលាម៉ោង១០និង២០នាទីយប់ថ្ងៃទី៨ខែមិថុនាឆ្នាំ២០១៤ នៅត្រង់ចំណុចក្បែរក្រុមហ៊ុនអែតវ៉ូត តាមបណ្ដោយផ្លូវសហព័ន្ធរុស្ស៊ី ក្នុងសង្កាត់កាកាប ខណ្ឌពោធិ៍សែនជ័យ។
ប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុមានម៉ូតូម៉ាកហុងដាឃ្លិក មួយគ្រឿង ពណ៌ស ពាក់ស្លាកលេខ ភ្នំពេញ 1S-1606 ជិះគ្នា២នាក់បានធ្វើដំណើរតាមបណ្ដោយផ្លូវ សហព័ន្ធរុស្ស៊ីក្នុងទិសដៅបញ្ច្រាស់ផ្លូវពីកើតទៅលិច ស្រាប់តែមកដល់ចំណុចកើតហេតុខាងលើ ក៏បានវ៉ាក់អើជាមួយម៉ូតូម៉ាកឆាលី ពណ៌ស ពាក់ស្លាកលេខ ភ្នំពេញ 1N-9306 ជិះដោយយុវជនម្នាក់ ក្នុងទិសដៅពីលិចមកកើតក៏ធ្វើអោយម៉ូតូទាំង២គ្រឿងបុកគ្នាចំពីមុខយ៉ាងពេញទំហឹងបណ្ដាលអោយម្ចាស់ម៉ូតូទាំងសងខាងរបួសធ្ងន់ធ្ងរត្រូវបានបញ្ជូនទៅមន្ទីរភ្លាមៗ។
បន្ទាប់ពីម្ចាស់ម៉ូតូទាំងសងខាងទៅមន្ទីរពេទ្យអស់ហើយគ្មានអ្នកនៅមើលម៉ូតូឡើយគឺនៅដួលច្រងាងនៅកណ្ដាលថ្នល់មិនឃើញមានសមត្ថកិច្ចចុះមកអន្តរាគមន៍ឡើយ។ប្រហែលជាកន្លះម៉ោងក្រោយ មកទើបបានសមត្ថកិច្ចចុះមកវាស់វែងយកម៉ូតូទាំង២គ្រឿងខាងលើនេះទៅរក្សាទុកនៅអធិការដ្ឋាន នគរបាលខណ្ឌពោធិ៍សែនជ័យដើម្បីរង់ចាំដោះស្រាយគ្នានៅពេលក្រោយ៕
