ភ្នំពេញ៖ នារីជនជាតិចិនម្នាក់ដែលទើបតែចេញពីភោជនីយដ្ឋានមួយកន្លែងបានបើករថយន្តថយ ក្រោយទៅប៉ះរថយន្តមួយគ្រឿងដែលចតនៅក្បែរនោះ ហើយបួងចង្កូតទៅមុខជ្រុលបុកម៉ូតូ មួយគ្រឿងអូសគៀបជាបនិងរនាំងដែកចែកទ្រូងផ្លូវបាក់អស់៤ផ្ទាំងធ្វើអោយម្ចាស់ម៉ូតូរង
របួសស្រាល ហើយអ្វីដែលគួរអោយចំឡែកនោះគឺម្ចាស់រថយន្តបង្កបានចុះពីលើរថយន្តមកអង្គុយផឹកស្រាបៀធ្វើ មិនដឹង ហាក់ដូចជាគ្មានរឿងអ្វីកើតឡើង។ ហេតុការណ៍នេះបានកើតឡើងកាលពីវេលាម៉ោង១១ និង២០នាទីយប់ស្ថិតនៅត្រង់ចំណុចមុខភោជនីយដ្ឋាន គូរ ស៊ាង វៀន តាមបណ្ដោយផ្លូវព្រះមុនីវង្ស ស្ថិតក្នុងសង្កាត់បឹងកេងកង២ ខណ្ឌចំការមន។
យោងតាមប្រភពព័ត៌មានពីសមត្ថកិច្ចចរាចរនៃខណ្ឌចំការមនបានអោយដឹងថា មុនពេលកើតហេតុ គឺមាននារីជនជាតិចិនម្នាក់បានថយរថយន្តមួយគ្រឿងម៉ាក លុចស៊ីសRX300 ពណ៌ខ្មៅ ពាក់ស្លាកលេខ ភ្នំពេញ 2E-6029 ចេញពីភោជនីយដ្ឋាន គូរ ស៊ាង វៀន ក៏បានបុកប៉ះក្បាលរថយន្ត មួយគ្រឿងម៉ាកស្តារិច មួយគ្រឿងពណ៌ស្ករ ពាក់ស្លាកលេខ ភ្នំពេញ 2W-4703 ដែលកំពុងចតស្ងៀម ក្បែរចិញ្ចើមផ្លូវមុខភោជនីយដ្ឋាននោះដែរ ក៏ធ្វើអោយនារីដែលបើករថយន្តលុចស៊ីសខាងលើ ភ័យពេកក៏បួងចង្កូតរថយន្តទៅមុខក្នុងល្បឿនលឿនជ្រុលទៅបុកម៉ូតូមួយគ្រឿងម៉ាកហុងដាឌ្រីម ធុនសេ១១០ ពណ៌ខ្មៅ ពាក់ស្លាកលេខ ភ្នំពេញ 1BS-9093 ជិះដោយយុវជនម្នាក់ដែលកំពុងធ្វើ ដំណើរតាមបណ្ដោយផ្លូវព្រះមុនីវង្សទិសដៅពីត្បូងទៅជើង ចំពេញទំហឹងហើយអូសម៉ូតូបោកផ្ទប់និង រនាំងចែកទ្រូងផ្លូវបាក់អស់ចំនួន៤ផ្ទាំងគៀបជាប់ទៅមុខលែងរួច បណ្ដាលអោយយុវជនរងគ្រោះ រងរបួសស្រាល អ្វីដែលហួសចិត្តបន្ទាប់ពីបង្កហេតុរួច នារីដែលបើករថយន្តបង្កបានចុះពីលើរថយន្ត ហើយចូលទៅក្នុងភោជនីយដ្ឋានអង្គុយផឹកស្រាបៀធ្វើមិនដឹង។
ក្រោយពេលកើតហេតុសមត្ថកិច្ចមូលដ្ឋានបានចុះមកអន្តរាគមន៍និងវាស់វែងយករថយន្តបង្កនិងម៉ូតូរួមទាំងឃាត់ខ្លួននារីដែលបើកបរថយន្តបង្ក ខណៈនោះក៏មានការអន្តរាគមន៍ពីអ្នកបើករថយន្ត ទំនើបៗមកកាងមិនអោយយកម្ចាស់រថយន្តបង្កនោះឡើយ។ តែទោះជាយ៉ាងណាសមត្ថកិច្ចនៅតែធ្វើការទៅតាមផ្លូវច្បាប់ដោយឃាត់ខ្លួនម្ចាស់រថយន្តបង្កហេតុ រួមទាំងឃាត់បុរសម្នាក់ដែលមកកាងនោះទៅការិយាល័យចរាចរជើងគោកនៃស្នងការដ្ឋាននគរបាលរាជធានីភ្នំពេញដើម្បីធ្វើការដោះស្រាយតាមផ្លូវច្បាប់៕
