កំពង់ធំៈ រថយន្តសេរីទំនើប លុចស៊ីស ដឹកឈើគ្រញូងបំរ៉ុងលោតឆត្រ ត្រូវបានលោក សាយ ណូរ៉ា ព្រះរាជ អាជ្ញារង អមសាលាដំបូងខេត្តកំពង់ធំ ដឹកនាំកំលាំងផ្នែករដ្ឋបាលព្រៃឈើស្ទោង សង្កាត់កំពង់ស្វាយ ព្រមទាំង កំលាំងតំបន់ប្រតិបត្តិការសឹករងកំពង់ធំ ប៉ូលិស ប៉េអ៊ឹម ចុះបង្ក្រាបបាន នៅចំនុច ភូមិ ត្រពាំងចម្បក់ ឃុំ ត្រពាំងឬស្សី ស្រុកកំពង់ស្វាយ ខេត្តកំពង់ធំ។
កិច្ចសហប្រតិបត្តិការបង្ក្រាបនេះ ត្រូវបានធ្វើឡើង នៅវេលាម៉ោង ១.៤៧នាទីរសៀល ថ្ងៃទី ៩ ខែ មិថុនា ឆ្នាំ ២០១៤ ស្ទាក់ចាប់បានរថយន្ត ម៉ាកលុចស៊ីស ពណ៌ ខ្មៅ ពាក់ស្លាកលេខ បាត់ដំបង 2A-1881 ព្រមទាំងវត្ថុតាងមានឈើគ្រញូង នៅក្នុងឡានមានចំនួន ១៥៥ដុំ មានប្រវែង ១ម៉ែត្រ រថយន្ត នឹងមនុស្ស២នាក់ ត្រូវបានគេស្គាល់ឈ្មោះ អ៊ឹម ធី ភេទ ប្រុស អាយុ ៤៤
ឆ្នាំ ជាមន្ត្រីទាហាននៅកងពលលេខ ៧០ រស់នៅភូមិ ដំណាក់ត្រយឹង សង្កាត់ចោមចៅ រាជធានីភ្នំពេញ ទី ២ជាជនជាតិវៀតណាម បានទើបតែ ចូលសញ្ញាតិខ្មែរ ដែលមានទាំង អត្តសញ្ញាណប័ណ្ណ វៀតណាម និងអត្តសញ្ញាណខ្មែរ ឈ្មោះ សុខ សុធី ភេទ ប្រុស អាយុ ៣៧ឆ្នាំ រស់នៅភូមិព្រែកជីក សង្កាត់សំបូរមាស ក្រុងកំពង់ចាម ខេត្តកំពង់ចាម ត្រូវបាននាំយកមកផ្នែករដ្ឋបាលព្រៃឈើស្ទោង ។
តាមការឲ្យដឹងពីសមត្ថកិច្ចបានឲ្យដឹងថា មុនពេលបង្ក្រាបរថយន្តលុចស៊ីសមួយគ្រឿងនេះ ត្រូវបានបណ្តាញ សម្ងាត់រាយការណ៍ មកថាមានរថយន្តមួយគ្រឿង បានធ្វើដំណើរនៅលើកំណាត់ ផ្លូវជាតិ៦២ ដែលលាត សន្ធឹងពីខេត្តព្រះវិហារ សំដៅទៅខេត្តកំពង់ចាម ដោយឆ្លងកាត់ខេត្តកំពង់ធំ ទើបបានរាយការណ៍ជូន លោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ ទើបបានចាត់ឲ្យលោក សាយ ណូរ៉ា ព្រះរាជអាជ្ញារង ដឹកនាំ ចុះបង្ក្រាប។ 
