កំពង់ចាម៖ បន្ទាប់ពីមានករណីប្លន់អ្នកលក់មាសអស់ជិត២ម៉ឺនដុល្លារ នៅផ្សារធំថ្មី ក្រុងកំពង់ចាម និងប្លន់នៅតាមបណ្ដាខេត្តជាច្រើនទៀត ត្រូវបានកម្លាំងនាយកដ្ឋាននគរបាលព្រហ្មទណ្ឌ នៃក្រសួងមហាផ្ទៃ សហការណ៍ជាមួយ កម្លាំងនគរបាលព្រហ្មទណ្ឌខេត្តកំពង់ចាម
តាមប្រមាញ់ចាប់ខ្លួនជនសង្ស័យ ជាបន្តបន្ទាប់បានចំនួន៦នាក់ ក្នុងនោះជនសង្ស័យចំនួន៣នាក់ ១-ឈ្មោះពៅ សំអឿន ភេទប្រុស អាយុ៣៥ឆ្នាំ នៅភូមិវែង សង្កាត់ពន់សាំង ខ័ណ្ឌព្រែកប្រា រាជធានីភ្នំពេញ ២-ឈ្មោះសុខ ស៊ីនួន ភេទប្រុស អាយុ៥៧ឆ្នាំ នៅភូមិនាងគង្ហីង សង្កាត់សំបូរមាស ក្រុងកំពង់ចាម ៣-ឈ្មោះស្រី សំអឿន ភេទប្រុស អាយុ៤៧ឆ្នាំ នៅភូមិ២៣ សង្កាត់បឹងកក់២ រាជធានីភ្នំពេញ ត្រូវបានសមត្ថកិច្ចតាមចាប់ខ្លួននៅខេត្តសៀមរាប កាលពីថ្ងៃទី១០ ខែកុម្ភៈ ឆ្នាំ២០១៧ ចំណែកស្ត្រីម្នាក់ឈ្មោះសុខ វណ្ណី ហៅភិន អាយុ៤៧ឆ្នាំ ស្នាក់នៅផ្ទះជួលមុខវត្តឈូកវ៉ា សង្កាត់គោករការ ខ័ណ្ឌព្រែកព្នៅ រាជធានីភ្នំពេញ ត្រូវចាប់ខ្លួននៅរាជធានីភ្នំពេញ កាលពីថ្ងៃទី១៤ ខែកុម្ភៈ ឆ្នាំ២០១៧ និងបក្សពួក២នាក់ទៀត ១ឈ្មោះសួង អេង ហៅញ ភេទប្រុស អាយុ៤៤ឆ្នាំ នៅឃុំលើកដែក ស្រុកកោះធំ ខេត្តកណ្ដាល ២-ឈ្មោះញែម យី ភេទប្រុស អាយុ៤៧ឆ្នាំ នៅឃុំមហាខ្ញូង ស្រុកកោះសូទិន ខេត្តកំពង់ចាម (ពីបទលួចមានស្ថានទម្ងន់ កាលពីថ្ងៃទី២១ ខែវិច្ឆិកា ឆ្នាំ២០១៣ នៅភូមិទី៥ ឃុំព្រែកតានង់ ស្រុកកោះសូទិន ខេត្តកំពង់ចាម) ត្រូវសមត្ថកិច្ចចាប់ខ្លួននៅថ្ងៃទី៨ ខែមេសា ឆ្នាំ២០១៧ ហើយបញ្ជូនមកកាន់ស្នងការដ្ឋាននគរបាលខេត្តកំពង់ចាម។
ដែលក្រុមចោរប្រដាប់ទាំងនេះមានបក្ខពួកចំនួន៨នាក់ តែងតែធ្វើសកម្មភាពប្លន់នៅតាមបណ្ដាខេត្តនានា មានដូចជានៅខេត្តកំពង់ចាម១លើក ខេត្តកំពត១លើក ខេត្តពោធិ៍សាត់១លើក ខេត្តព្រះសីហនុ២លើក ខេត្តកំពង់ធំ២លើក ខេត្តសៀមរាប២លើក និងខេត្តព្រះវិហារ២លើកផងដែរ។
គួររំលឹកផងដែរថា ក្រុមចោរប្រដាប់អាវុធចំនួន៣នាក់ ស្លៀកពាក់ស៊ីវិល និងពាក់មួកសុវត្ថិភាព បានធ្វើសកម្មភាពឆក់ប្លន់អាជីវករលក់មាសអស់ជិត២ម៉ឺនដុល្លារទាំងព្រឹក ខណៈដែលជនរងគ្រោះបានយកគ្រឿងមាសប្រាក់ចុះពីលើរថយន្តដើម្បីដាក់តាំងលក់ ដោយក្រុមចោរបានយកកាំភ្លើងខ្លីភ្ជង់គម្រាមបាញ់សម្លាប់អ្នកដែលចង់ចូលទៅជួយផងដែរ។
ហេតុការណ៍នេះបានកើតមានឡើងកាលពីវេលាម៉ោង៧និង២០នាទីព្រឹក ថ្ងៃទី៥ កុម្ភៈ ២០១៧ នៅចំណុចមុខផ្ទះលក់មាសយីហោ «សុខ លក្ខិណា» ដែលមានទីតាំងខាងលិចផ្សារធំថ្មី ស្ថិតក្នុងភូមិទី១២ សង្កាត់កំពង់ចាម ក្រុងកំពង់ចាម ។
សមត្ថកិច្ចបានឲ្យដឹងថា នៅពេលកើតហេតុគឺជនរងគ្រោះដែលជាអាជីវករលក់មាសឈ្មោះ សេង លក្ខិណា ភេទស្រី អាយុ៤៥ឆ្នាំ បានយកគ្រឿងអលង្ការរបស់ខ្លួនទៅដាក់តាំងលក់ដូចសព្វមួយដង ដោយជិះរថយន្តម៉ាកឡិចស៊ីស១គ្រឿង ខណៈដែលមកដល់មុខហាង ជនរងគ្រោះកាន់កាបូបដាក់គ្រឿងអលង្ការ ចុះពីលើរថយន្តភ្លាម ស្រាប់តែមានចោរ៣នាក់ជិះម៉ូតូ១គ្រឿង ប្រដាប់ដោយអាវុធខ្លី២ដើមបានមកដល់ ក៏ឆក់យកកាបូបដាក់គ្រឿងអលង្ការនោះ ព្រមទាំងគម្រាមបាញ់សម្លាប់អ្នកដែលបានឃើញហេតុការណ៍ ហើយក្រុមចោរបានឡើងជិះម៉ូតូរត់ទៅខាងលិចផ្សារ រួចបត់ឡើងទៅផ្លូវជាតិលេខ៧ថ្មីបាត់ស្រោលតែម្តង ដោយមានរថយន្ត១គ្រឿងជិះបិទគូទផងដែរ។
ក្រោយពីមានករណីប្លន់កើតឡើងភ្លាមកម្លាំងសមត្ថកិច្ចបានទៅដល់កន្លែងកើតហេតុ ដើម្បីធ្វើការស្រាវជ្រាវផងដែរ។
ចំពោះទ្រព្យសម្បតិ្តដែលត្រូវបាត់បង់ ប្រមាណជា២ម៉ឺនដុល្លារ ក្នុងនោះមានប្រាក់ចំនួន៣០០០ដុល្លារសហរដ្ឋអាមេរិក ប្រាក់ខ្មែរ៤លានរៀល គ្រឿងអលង្ការសរុបជិត១ម៉ឺនដុល្លារអាមេរិក និងប្រាក់ថៃ១០ម៉ឺនបាត ព្រមទាំងទូរស័ព្ទដៃចំនួន៤គ្រឿងផងដែរ។
តាមកាមេរ៉ាសុវត្ថិភាពដែលចាប់បានសកម្មភាពរបស់ក្រុមចោរទាំងនោះ អាចសន្និដ្ឋានបានថា ជាមុខសញ្ញាចាស់ ដែលធ្លាប់ធ្វើសកម្មភាពឆក់ប្លន់នៅតាមបណ្ដាខេត្តក្រុងផ្សេងៗនាពេលកន្លងមក ៕
