VDEO ស្ថានភាពសេដ្ឋកិច្ចបាន និងកំពុងមានស្ថានភាពប្រសើរឡើងវិញបន្តិច ក្រោយពីបានធ្លាក់ក្នុងវិបត្តិអស់រយៈពល៦ឆ្នាំមក។ នៅក្នុងខែឧសភាកន្លងទៅ ទោះបីជាមិនមានការងារថ្មីត្រូវបានបង្កើតឡើងក៏ដោយ ក៏អត្រាអ្នកអត់ការងារធ្វើនៅថេរមិនកើនឡើងទេ។
ផ្ទុយទៅវិញ ការងារដែលបានបាត់បង់នៅក្នុងសម័យសេដ្ឋកិច្ចដើរថយក្រោយត្រូវបាន បង្កើតឡើងវិញ នេះបើយោងតាមតួលេខផ្លូវការចេញផ្សាយដោយក្រសួងការងារ។ អត្រានៃចំនួនអ្នកអត់ការងារធ្វើនៅសហរដ្ឋអាមេរិកក្នុងខែ ឧសភាកន្លងទៅមាន ៦,៣% រីឯចំនួនការងារដែលបានបង្កើតឡើង មាន ២១៧ ០០០ការងារ ពោលគឺតិចជាងបន្តិចបើធៀបនឹងខែមេសាដែលមាន ២៨២ ០០០ការងារ។ អ្នកអត់ការងារធ្វើចំនួន ៦,៣% គឺជាអត្រាមួយដ៏ទាបបើគិតជិត ៦ឆ្នាំកន្លងទៅ ហើយបើនិយាយពីចំនួនការងារដែលបានបង្កើតឡើងវិញ គឺសឹងតែស្មើនឹងកម្រិតដែលអាមេរិកធ្លាប់មាននៅមុនវិបត្តិទៅហើយ នេះបើយោងតាមការបញ្ជាក់របស់ក្រសួងការងារ។
ផ្អែកតាមការស៊ើបអង្កេតរបស់ក្រសួងការងារនៅតាមបណ្តារោងចក្រសហគ្រាស មួយចំនួនឲ្យដឹងថា ចំនួនការងារនៅក្នុងខែឧសភានៅទូទាំងប្រទេសបានឡើងដល់ចំនួន ១៣៨,៤៦លានការងារ ទល់នឹង ១៣៨,៣៦លានការងារដែលអាមេរិកមានក្នុងខែមករា ឆ្នាំ ២០០៨ ពោលនឹងផ្ទុះវិបត្តិសេដ្ឋកិច្ចក្នុងលោក។ វិបត្តិសេដ្ឋកិច្ចដែលបានធ្វើឲ្យអាមេរិកបាត់បង់ការងារចំនួន ៨ ៧០០ ០០០ការងារ។ ដោយឡែក តាំងពីឆ្នាំ ២០០៨ មក ចំនួនពលរដ្ឋអាមេរិកាំងបានកើនឡើង ១៤លាននាក់ តែអត្រាអ្នកអត់ការងារធ្វើនៅតែខ្ពស់ជាងមុនវិបត្តិ គឺប្រមាណជា ៥%។
បើគិតរយៈពេលពេញមួយឆ្នាំ អត្រាអ្នកអត់ការងារធ្វើបានថយចុះចំនួន ១,២ពិន្ទុដែលគិតជាចំនួនមនុស្សមាន ១ ៩០០ ០០០នាក់។ ម្យ៉ាងទៀត បើគិតជាមធ្យមក្នុងមួយខែសម្រាប់មួយឆ្នាំពេញ មានការងារជិត ២០០ ០០០ការងារត្រូវបានបង្កើតឡើង។ ជាក់ស្តែងក្នុងខែឧសភាកន្លងទៅ មានការងារថ្មីចំនួន ២១៧ ០០០ការងារត្រូវបានបង្កើតឡើង។
កំណើនចំនួនការងារនេះបានបង្ហាញយ៉ាងច្បាស់អំពីការងើបឡើងវិញនូវ សេដ្ឋកិច្ចអាមេរិកដែលបានធ្លាក់ក្នុងវិបត្តិអស់រយៈពេលជាច្រើន ឆ្នាំ។ អ្នកសេដ្ឋកិច្ចបានយល់ឃើញថា ដើម្បីទប់កុំឲ្យអត្រាអ្នកអត់ការងារធ្វើកើនឡើង ទីផ្សារការងារត្រូវតែបង្កើតការងារថ្មីយ៉ាងតិច ១០០ ០០០ការងារក្នុងមួយខែៗ៕
