កំពង់ឆ្នាំង៖ យុវជននិងយុវតី២នាក់បានរងរបួសធ្ងន់ធ្ងរ និងយុវជនម្នាក់ទៀតរងរបួសស្រាលនៅក្នុងគ្រោះថ្នាក់ចរាចរណ៍រវាងម៉ូតូសង់កូរ៉េ បុកជាមួយម៉ូតូឌ្រីមស្មាស់រីវ៉ូ ក្នុងទិសដៅច្រាស់គ្នាពេញទំហឹង។ហេតុការណ៍នេះបានកើតឡើងនៅវេលាម៉ោង២និង១៥នាទីថ្ងៃទី០៨ ខែមិថុនា ឆ្នាំ២០១៤ នៅតាមផ្លូវក្រាលគ្រួសក្រហម ស្ថិតក្នុងភូមិក្តុល ឃុំក្រាំងស្គារ ស្រុកទឹកផុស ខេត្តកំពង់ឆ្នាំង។
ប្រភពពីប្រជាពលរដ្ឋនៅកន្លែងកើតហេតុបានបញ្ជាក់ប្រាប់ថា៖មុនពេលកើតហេតុគេឃើញយុវតីម្នាក់បានជិះម៉ូតូសង់កូរ៉េពណ៌ក្រហមតែឯងពីជើងមកត្បូងក្នុងល្បឿនយឺត លុះមកដល់ចំណុចកើតហេតុស្រាប់តែមានម៉ូតូស្មាស់រីវ៉ូ ពណ៌ខ្មៅ បើកបរ និងជិះដោយយុវជន២នាក់ដែលគេស្គាល់ថាជាកូនរបស់ឈ្មោះហេង ហើយបើកក្នុងល្បឿនយ៉ាងលឿន ក្នុងទិសដៅច្រាស់គ្នាក៍បានបុកម៉ូតូយុវតីរងគ្រោះពេញទំហឹង បណ្តាលអោយរូបនាងខ្ទាតពីម៉ូតូប្រវែងជិត១០ម៉ែត្រនិងបានធ្លាក់ចូលក្នុងប្រឡាយទឹករបួសធ្ងន់ធ្ងរ។
ដោយឡែកយុវជនបង្កទាំង២នាក់ម្នាក់របួសស្រាល ម្នាក់ទៀតរបួសធ្ងន់បែកមុខបែកមាត់។ ក្រោយពីកើតហេតុជនបង្កម្នាក់ដែលរងរបួសស្រាលបានរត់សំដៅទៅវាយលើយុវតី រងគ្រោះទៀត ទោះបីអ្នកស្រុកជួយឃាត់យ៉ាងណាក៍មិនព្រមស្តាប់ ដោយគេបានបញ្ចេញ អត្តចរឹកក្រអឺតក្រទម ខណៈនោះអ្នកស្រុកបានទាញដំបងប្រុងវាយទៅលើជនបង្កវិញ ទើបគេសុខចិត្តនាំគ្នាគេម្នាក់ទៀតទៅរកពេទ្យជួយព្យាបាល។
ចំណែកយុវតីរងគ្រោះត្រូវបានប្រជាពលរដ្ឋនាំគ្នាជួយដឹកបញ្ជូនទៅសង្គ្រោះនៅមណ្ឌលសុខភាពភ្លាមៗដែរ។ ហើយម៉ូតូទាំង២គ្រឿងត្រូវបានអ្នកស្រុកនៅក្បែរនោះមិនអោយយកទៅណាទេ ដោយរង់ចាំសមត្ថកិច្ចមកធ្វើការវាស់វែង កសាងសំណុំរឿងដោះ ស្រាយគ្នាតាមនិតិវិធីច្បាប់៕![20140607124252.mp4_snapshot_00.03_[2014.06.08_09.51.04]](https://i0.wp.com/khemaradaily.com/wp-content/uploads/2014/06/20140607124252.mp4_snapshot_00.03_2014.06.08_09.51.041.jpg?resize=448%2C252&ssl=1)
